Łukašenka zajaviŭ, što intehracyju tarmozić Rasija
Alaksandr Łukašenka zajaviŭ, što Rasija «tarmozić» pieramovy pa intehracyi i zaklikaŭ vyjści na kankretyku pierad sustrečaj prezidentaŭ, paviedamlaje ria.ru
Pavodle jaho słoŭ, pieramoŭnaja hrupa ad rasijskaha boku i ŭrad RF paabiacali, ale ŭžo dvojčy adkładali vyrašeńnie pytańniaŭ, jakija tyčacca intehracyi. Łukašenka ŭdakładniŭ, što pry hetym taktyka viadzieńnia pieramovaŭ była vybudavanaja.
«Užo prajšło stolki pieramovaŭ…. Mnie siońnia dakładvajuć, što adny abiacańni. Pieramoŭnaja hrupa natyknułasia na niejkaje pytańnie, urad Rasii, u tym liku premjer Miadźviedzieŭ, abiacaje dać usie kamandy, rasparadžeńni, kab u kompleksie vyrašać pytańni … Paabiacali, zabylisia. Druhi raz paabiacali, zabylisia», — skazaŭ Łukašenka.
«Naprykład, u nas siońnia kala 80 pradpryjemstvaŭ zakrytyja Raśsielhasnahladam ci niejkim tam orhanam u Rasii, a moža być, i ŭradam. Chutčej za ŭsio, uradam, — skazaŭ jon. — Zakrytyja dla pastavak našaj pradukcyi ŭ Rasiju. Prytym z nadumanych pryčynaŭ. Bo možna pryniać i abhruntavać luboje rašeńnie… Kali my tak adno z adnym siońnia budujem adnosiny, słuchajcie, pra jakuju ahulnuju valutu i ŭvachodžańnie abo abjadnańnie dziaržaŭ možna havaryć… Treba rasčyścić. Hetaha prosta być nie pavinna ŭ adnosinach pamiž dźviuma dziaržavami».
U jakaści jašče adnaho prykładu kiraŭnik dziaržavy pryvioŭ dostup da dziaržzamovaŭ. Pa jaho słovach, «usie pavinnyja być u roŭnych umovach. I pradpryjemstvy Rasii, i Biełarusi. Abo pramysłovaja kaapieracyja, pra jakuju my šmat havorym. Ci padatkovy manieŭr, jaki padkinuli zamiest mytnych pošlin, pra jakija my damaŭlalisia, što ich naohuł u JEAES być nie pavinna. Nie toje što ŭ Sajuznaj dziaržavie.
Abo skončylisia ŭžo faktyčna terminy pa pieramovach na pastaŭki pryrodnaha hazu i nafty na budučyniu».
«Biez vyrašeńnia hetych pytańniaŭ i razmaŭlać niama pra što, z našaha boku. To bok, masa prablem», — padsumavaŭ Alaksandr Łukašenka.
