«Ja prezident, ja z vami razmaŭlaju, jak chaču»: Zialenski dapuściŭ asablivy status ruskaj movy na Danbasie
president.gov.ua
U budučyni ruskaja mova moža atrymać asablivy status na Danbasie. Padobny scenar u razmovie z žurnalistam partała «Ukrainskija naviny» dapuściŭ prezident Ukrainy Uładzimir Zialenski.
Kiraŭnika dziaržavy karespandent raspytaŭ prosta na vulicy paśla pres-kanfierencyi pa vynikach samitu Ukraina — ES. Videazapis hetaj hutarki apublikavany na sajcie internet-vydańnia.
Zialenskaha ŭ pačatku razmovy žurnalist prosić prakamientavać inicyjatyvu kiraŭnika ofisa ŭkrainskaha lidara Andreja Bohdana, jaki na minułym tydni zajaviŭ, što, na jaho dumku, u Danieckaj i Łuhanskaj abłaściach ruskaj movie nieabchodna nadać status rehijanalnaj.
«Ideja Andreja [Bohdana] — heta jaho ideja», — adkazvaje na heta pa-ŭkrainsku prezident. Adnak, akramia kiraŭnika jaho administracyi, praciahvaje Zialenski, pra heta taksama «kažuć ludzi». «Ja dumaju, što, kali spynim vajnu, treba dać ludziam u Daniecku razmaŭlać na toj movie, na jakoj jany chočuć», — zajaŭlaje Zialenski. U hetym, na jaho dumku, «u cełym» niama prablemy.
«Prosta takaja była infarmacyjnaja vajna, što nielha razmaŭlać na ruskaj movie, — adznačaje kiraŭnik dziaržavy ŭžo na ruskaj. — Ja voś prezident, i ja razmaŭlaju z vami jak chaču». Takim čynam, reziumavaŭ Zialenski, kali ŭ žycharoŭ «DNR» i «ŁNR» budzie «niejkaje admysłovaje prašeńnie» (naprykład, «kab jany dakumienty mahli zapaŭniać na ruskaj movie»), «vialikaj prablemy ŭ tym, kab heta abmierkavać», nie budzie.