Minčukoŭ napałochaŭ malinavy parašok na luku. Što za jon? FOTA
Žycharka doma №17 u druhim zavułku Bahracijona vyjaviła horki padazronaha parašku malinavaha koleru na kanalizacyjnych lukach kala padjezdaŭ, — pišuć «Minsk-Naviny».
Adrazu ŭźnikła niekalki mierkavańniaŭ nakont taho, što heta za rečyva i ci biaśpiečnaje jano dla ludziej i žyvioł.
Nivodnaja z žyllova-kamunalnych słužbaŭ Partyzanskaha rajona nie paćvierdziła taho, što źjaŭleńnie parašku na lukach — sprava ruk ich rabotnikaŭ.
U ŽKH Partyzanskaha rajona adkazali, što nie tak daŭno pravodzili deratyzacyju ŭ tym rajonie.
«My tak nieachajna nie pracujem. Atrutu raskładvajem u niedastupnych dla čałavieka miescach. Kali patrabujecca apracoŭka lukaŭ, to santechnik zdymaje viečka, a my źmiaščajem prynady ŭ śpiecyjalnyja pakunački va ŭstupy kałodzieža, kab jany nie kantaktavali z vadoj. Luk adrazu začyniajuć. U adkrytym dostupie atrutu dla pacukoŭ nie raźmiaščajem», — zapeŭniła doktar-epidemijołah Centra prafiłaktyčnaj dezynfiekcyi Viera Kučerava.
Jana ž udakładniła, što rečyvy, jakija ŭžyvajuć na pradpryjemstvie dla deratyzacyi, inšaha koleru.
U centry hihijeny i epidemijałohii Partyzanskaha rajona nahadali, što pa instrukcyi, kali niechta zaŭvažyŭ nieviadomaje rečyva na vulicy, to nieabchodna adrazu vykikać MNS.
«My nie majem prava navat padychodzić blizka da hetaha miesca, tolki z dazvołu MNS. Što tam za rečyva, adkazać nie možam, nichto da nas nie źviartaŭsia», — adkazali ŭ centry.
U Minskvodakanale adkazali, što časam paznačajuć luki ŭ niejkich svaich metach, ale kab paraškom, dy jašče takoha jarkaha koleru, takoha nie moža być.
Žychary źviarnulisia da śpiecyjalistaŭ Centra prafiłaktyčnaj dezynfiekcyi, tyja ŭziali proby rečyva dla łabaratornaha daśledavańnia. Vyśvietlili: heta dakładna nie atruta dla pacukoŭ.
Najbolš realistyčnaj viersijaj taho, što heta za parašok, akazałasia mierkavańnie śpiecyjalistaŭ Inśpiekcyi achovy žyviolnaha i raślinnaha śvietu. Tam adkazali, što rečyva źjaviłasia tolki la adnaho domu ŭ stalicy. I chutčej za ŭsio, heta prosta farba choli, jakuju mahła rassypać miascovaja dziatva.
Zaraz sumieś źnikła, ale kamunalščyki prosiać, kali niešta padobnaje źjavicca ŭ vašym dvary, paviedamić pra heta ŭ adpaviednyja słužby.