Kiraŭnik Bieraściejščyny dapuściŭ, što akumulatarny zavod, suprać jakoha pratestujuć žychary, zakryjuć
Pra heta Anatol Lis zajaviŭ na sustrečy z 13 aktyvistami, jakaja prajšła ŭ abłvykankamie ŭ sieradu 12 červienia, piša Radyjo Svaboda.
Sustreča praciŭnikaŭ budaŭnictva akumulatarnaha zavodu pad Bieraściem z kiraŭnictvam abłvykankamu prachodziła za začynienymi dźviaryma. Na jaje nie dapuścili žurnalistaŭ, vieści videa- i aŭdyjozapis razmovy z čynoŭnikami aktyvistam zabaranili.
Razmova praciahvałasia try hadziny i skončyłasia abiacańniem uładaŭ pravieryć usie fakty parušeńniaŭ, pradjaŭlenyja aktyvistami, i na praciahu nastupnaha tydnia pryniać rašeńnie ab spynieńni ŭvodu ŭ ekspluatacyju zavodu.
«My damahalisia hetaj sustrečy apošnija paŭtara hoda, i narešcie jana adbyłasia, — raskazaŭ žurnalistam adzin z aktyvistaŭ, juryst Raman Kiślak. — Z našaj razmovy było vidać, što ŭłady zrazumieli — pratesty nia spyniacca, davieru da słovaŭ čynoŭnikaŭ u ludziej niama».
Pa słovach Ramana Kiślaka, kiraŭnik abłvykankamu Anatol Lis padčas razmovy niekalki razoŭ dapuściŭ mahčymaść zabarony ŭvodu ŭ ekspluatacyju zavodu kampanii «AjPaŭer». Jon daručyŭ painfarmavać aktyvistaŭ pra vyniki pravierki ahučanych imi faktaŭ parušeńniaŭ.
Za dzień da sustrečy ŭ abłvykankamie ŭ budynku zavodu akumulatarnych batarej prajšła pres-kanferencyja z udziełam menedžeraŭ kampanii-ŭładalnika. Praciŭnikaŭ budaŭnictva zavodu na jaje nie dapuścili, a žurnalistaŭ zapeŭnili, što ŭsie nieabchodnyja dla pačatku paŭnavartasnaj pracy dazvoły (ciapier zavod pracuje ŭ puska-naładačnym režymie) nieŭzabavie buduć atrymanyja.
Akcyi pratestu suprać zapusku zavodu akumulatarnych batarej pad Bieraściem adbyvajucca ŭ abłasnym centry kožnuju niadzielu, pačynajučy ź lutaha 2018 hodu. Praciŭniki budaŭnictva ŭžo zajavili, što spyniać ich tolki ŭ vypadku poŭnaha zakryćcia prajektu.