U ZŠA prapanavali źnieści sumnaviadomuju škołu Kałumbajn, dzie zahinuli 13 čałaviek
Ułady akruhi Džefiersan u Kałarada prapanavali źnieści škołu «Kałumbajn», dzie 20 hadoŭ tamu adbyłasia stralanina, jakaja šakavała ŭvieś śviet. Złačyncy, jakija iduć na stralaninu ŭ škołach, da hetaha času natchniajucca napadam na «Kałumbajn», ličać čynoŭniki, piša BBC.
Dvoje padletkaŭ zabili 12 vučniaŭ i nastaŭnika ŭ «Kałumbajn» u krasaviku 1999 hoda.
Superintendant akruhi Džefiersan Džejsan Hłas źviarnuŭsia da baćkoŭ školnikaŭ z prapanovaj źnieści budynak «Kałumbajn» i vybudavać nanova, kab spynić hetaje «ahidnaje zachapleńnie» masavym zabojstvam.
«Trahiedyja, jakaja adbyłasia ŭ 1999 hodzie ŭ siaredniaj škole «Kałumbajn», słužyć zychodnym punktam u epidemii vypadkaŭ školnaj stralaniny. Strałki vyvučajuć vypadak «Kałumbajna» i kažuć pra jaho jak pra krynicu natchnieńnia. Hetyja ludzi žyvuć pa ŭsim śviecie i nazyvajuć siabie «kałumbajnierami». Jany pamiašanyja na stralaninie ŭ škole «Kałumbajn».
Pa słovach Hłasa, kožny hod u škołu sprabujuć prajści niekalki sotniaŭ čałaviek, kab pahladzieć na miesca złačynstva. Za apošnija 11 miesiacaŭ kolkaść takich ludziej uzrasła da rekordnaha ŭzroŭniu, śćviardžaje čynoŭnik.
«U 1999 hodzie nie isnavała nijakich dapamožnikaŭ, jak pastupać z takimi budynkami, jak «Kałumbajn», — havorycca ŭ zvarocie. — Zaraz ekśpierty pa biaśpiecy rekamiendujuć znosić budynki škoł, dzie była stralanina».
Škoła «Kałumbajn» była častkova pierabudavana paśla napadzieńnia. Zhodna z novymi prapanovami, budynak škoły varta źnieści i vybudavać nanova. Nazva i simvolika škoły zastanucca raniejšymi.
Miemaryjalny budynak biblijateki, pabudavany paśla napadu, prapanujecca pakinuć, a na miescy staroj škoły źjavicca zasadžanaje travoj pole.
20 krasavika 1999 hoda dvoje vučniaŭ škoły «Kałumbajn», 17 i 18 hadoŭ, ździejśnili napad na škołu, zabiŭšy 12 vučniaŭ i vykładčyka, paśla čaho skončyli žyćcio samahubstvam.
Z taho času ŭ ZŠA adbyłosia niekalki dziasiatkaŭ vypadkaŭ školnaj stralaniny. U šerahu vypadkaŭ strałki rabili adsyłki da złačynstva ŭ škole «Kałumbajn».
