Pravierana na sabie: jak ja sprabavała vyjhrać 2500 rubloŭ u intelektualnym šou na BT
«Jak vy ličycie, Sonca krucicca vakoł Ziamli abo Ziamla vakoł Sonca?» — pytańnie, jakoje ja dakładna nie čakała pačuć, kali išła na intelektualnuju pieradaču. Ale žyćcio bieź siurpryzaŭ — nudoćcie, tamu heta pytańnie ŭsio ž prahučała i stała nie adzinaj dla mianie niečakanaściu padčas novaha šou na «Biełaruś-1».
«Na vylet» — prajekt Biełteleradyjokampanii, źjaviŭsia tolki ŭ sakaviku 2019 hoda.
Stvaralniki nadzvyčaj im hanaracca, bo kancepcyja całkam biełaruskaja, nijakich idej i resursaŭ z-za miažy nie pryciahvali.
Farmat sapraŭdy nietypovy. Miechanika hulni nie padobnaja da televizijnaha «Što? Dzie? Kali?» ci «Svajoj hulni». Kaliści ja prysutničała na zdymkach «Adzin suprać usich» z Hieorhijem Kałdunom i «Adysiei kamandy Kuchto», zaŭziejučy za baćkoŭ. Navat z tymi pieradačami «Na vylet» maje mała ahulnaha. Hety prajekt pazicyjanujecca jak zabaŭlalna-intelektualnaje šou, i farmuloŭka słušna addaje pieravahu zabaŭlalnaści pierad intelektualnaściu.
U zvykłych intelekt-šou treba ad samaha pačatku sabracca ź siłami, uklučyć mazhi i vytrasać z zasiekaŭ śviadomaści ŭsio nazapašanaje z knih, kinastužak dy školnaj prahramy. Na pieradačy «Na vylet» hetaje praviła dziejničaje tolki ŭ samym pačatku i samym kancy.
Asnoŭnuju častku hulni najbolš vyhadna hladzieć u stol dy kałupacca ŭ nosie — pažadana naohuł nie padavać prykmiet adekvatnaha čałavieka.
Schiema hulni nastupnaja. Spačatku ŭsie patencyjnyja ŭdzielniki (ich prykładna 40, ale ličba moža vahacca) stanoviacca ŭ žyvuju čarhu. Numar u čarzie zaležyć ad taho, nakolki adzin hulec zarehistravaŭsia raniej za druhoha. Usim udzielnikam pa paradku viadučy Alaksandr Najdzionaŭ zadaje pa adnym pytańni. Chto adkazvaje pravilna, prachodzić na placoŭku da viadučaha, chto pamylajecca — idzie «na vylet». Hety praces indyvidualnych apytańniaŭ zaviaršajecca, kali na placoŭcy źbirajucca 16 hulcoŭ, jakija pravilna adkazali na pytańni adboru. Usie, da kaho nie dajšła čarha, vylatajuć razam z tymi, chto adkazaŭ niavierna.
Dalej batalija razhortvajecca siarod 16 razumnikaŭ, jakija dzielacca na dźvie kamandy pa 8 čałaviek. I tut dla mnohich pačynajecca hulnia ŭ paddaŭki. Viadučy zadaje pytańni, kamandy navypieradki cisnuć na knopki, kab adkazać. Chto adkazvaje pravilna, maje prava adpravić na vylet luboha hulca z kamandy nasuprać. Pieravaha takoha farmatu ŭ tym, što pieramahčy moža luby: navat kali suprać vas hulaje ŭmoŭny Alaksandr Druź ci Siarhiej Dubialevič, šansy vy majecie suvymiernyja.
Vykidajuć tych, chto paśpieŭ pakazać siabie samym razumnym.
Meta — minimizavać kankurencyju. Tamu mnohija hulcy na hetym etapie chavajucca za inšych ci prosta nie dajuć adkazaŭ, kab nie akazacca vybitymi. Kali na placoŭcy zastajucca 4 ŭdzielniki — samy čas uklučyć razumnaha čałavieka, chutka i pravilna adkazać na try pytańni zapar, vybiŭšy ŭsich supiernikaŭ i nie daŭšy im šansu vybić siabie.
Kali płan spracavaŭ i ź placoŭki syšli ŭsie, aproč vas, — ura, vy pieramožca… i atrymlivajecie siertyfikat na pakupki ŭ HUMie na 500 rubloŭ!
Adrazu ž vam prapanujuć paŭdzielničać u supierhulni, dzie ŭ vyniku pieramohi vyjhryš pavialičycca na 2000 rubloŭ, ź jakich 600 pradstaŭlenyja siertyfikatami z taho ž HUMa. Ale kali ŭ supierhulni niešta pojdzie nie tak — zastaniaciesia zusim z pustymi rukami.
Aŭtarskaja parada: pieramahčy ŭ supierhulni praściej, čym dajści da finału, tamu nie dumajcie admaŭlacca.
Vam u supierniki pakličuć čałavieka, jaki vylecieŭ z hulni pieršym. Zadaduć try pytańni, na jakija spačatku buduć pytać adkazy ŭ vas, i siarod jakich vam dastatkova adkazać usiaho na adno.
Trapiła ja na pieradaču, zapoŭniŭšy anłajn-formu 26 krasavika. 10 maja mnie patelefanavali i zaprasili na zdymki praź piać dzion. Pa televizary hulniu pakažuć 2 červienia.
Prychodzić u budynak na Makajonka paklikali da 15:45, ale zdymki pačalisia kala 17-j hadziny. Za hety čas ja paśpieła pasłuchać razmovy ludziej, ź jakimi paśla hulała. Z pačutaha ja daviedałasia jašče pra adnu niečakanaść.
Adzin čałaviek moža ŭdzielničać choć u kožnaj prahramie.
U kalidory ja sustreła znajomaha, jakoha bačyła ŭ adnym ź pieršych vypuskaŭ šou. Spytała: «Ciabie zaprašajuć užo jak ekśpierta, ci što ty tut robiš?» Jon raspavioŭ, što byŭ na čatyroch pieradačach i što heta, chutčej, vyklučeńnie, kali niechta prychodzić tolki na adnu prahramu. Asnoŭny puł udzielnikaŭ — pastajannyja hulcy-aptymisty, upeŭnienyja, što kali nie paščaściła adnojčy, to z nastupnymi razami šansy na pieramohu pamnažajucca. Tamu kali vy źbieraciesia na pieradaču, nie chvalujciesia, što pry adbory da vas nie dojdzie čarha — paśla možna paŭdzielničać i ŭ druhoj, i ŭ treciaj hulni.
Padčas adboru važnuju rolu adyhryvaje šancavańnie, bo pytańni — roznych uzroŭniaŭ. Udzielnik pierada mnoj adkazvaŭ, što vakoł čaho krucicca: Ziamla ci Sonca — a mnie vypała vyznačać, što Łasucha — heta treci dzień Maślenicy.
Mnohija pytańni možna ŭziać, nie viedajučy pravilnaha adkazu.
Pytańni składzienyja niechałturna: hruntujucca jany na faktach z roznych tematyčnych śfier, nie huhlacca ŭ internet-bazach — bačna, što aŭtarskija. Bolšaść zadač asnoŭnaha etapa rašajecca z dapamohaj łohiki i małoj doli intuicyi. Naprykład, adno z pytańniaŭ: kala jakoha abłasnoha centra zdabyvajuć piasok, jakim letaś abstaloŭvali pieršy ŭ krainie stadyjon dla plažnaha futboła? Možna hety fakt viedać, a možna prosta zdahadacca: abłasnych centraŭ usiaho šeść, naŭrad ci tak by farmulavali pytańnie pra Minsk, tamu varyjantaŭ usiaho piać, adzin z najbolš pramysłovych i bujnych haradoŭ — Homiel. I binho, heta pravilny adkaz!
Viadoma, u hetym vypadku možna było b i nie trapić z adkazam, ale jość bolš vyraznyja prykłady pytańniaŭ na łohiku. Voś zadańnie, jakoje sustrełasia mnie ŭ finale. Dapoŭnicie vierš Pietrusia Broŭki:
Jość krepaści z muru, z hranitu, sa skałaŭ,
Ich ścieny-bajnicy abvodnieny kruham,
A kolki ich źnikła — było ž ich niamała.
Macniej ja nie znaju, jak krepaść…
Možna tvor viedać, kaniešnie, na pamiać. Ale pytańnie nie na toje raźličana. Łohika prostaja: pra jakuju krepaść moh pisać Broŭka? Peŭna, pra Bresckuju. Jakaja pieryfraza najbolš raspaŭsiudžanaja ŭ dačynieńni da Bresta? Horad nad Buham. Źviarajem z ryfmaj i adkazvajem: strafa zaviaršajecca słovami «nad Buham».
Pravilny adkaz na hetaje nieskładanaje pytańnie vyvieŭ mianie ŭ supierhulniu, praces i vynik jakoj vy možacie pabačyć 2 červienia a 10:50 na «Biełaruś-1».
A pakul prapanujem krychu patreniravacca. Adkažycie na niekalki pytańniaŭ z hulni:
- Što aznačaje biełaruskaje słova «žarynka»?
- Jakoj čaścinaj movy źjaŭlajecca słova «trojčy»?
- Jakija nitki dla rukadziella francuzy pierakładajuć jak «młyn»?
- Jaki horad starejšy: Minsk abo Brest?
- Uładzimir Dal pisaŭ, što «ahulny abaviazak čałavieka źmiaščaje jaho abaviazak da Boha, abaviazak hramadzianina i abaviazak…» — praciahnicie cytatu.
- Chto pa nacyjanalnaści Kryšcijanu Ranałdu?
- Na jaki skład padaje nacisk u ruskim słovie «hierby»?
- Što aznačaje starabiełaruskaje słova «sykhniet»? Vam dapamoža prykładny ŭryvak z narodnaj pieśni: «Nie vyjšła dzieŭčyna da chłopca i z ruki sykhnietku nie źniała».
Svaje adkazy praviercie praź niekalki dzion na «Biełaruś-1» abo na sajcie tvr.by.
