Zatrymany doktar Alaksandr Dziadźko vyjšaŭ na pracu. Za jaho zastupiŭsia asabista Aleh Rumo
Kiraŭniku adździeła aniestezijałohii i reanimacyi RNPC transpłantacyi orhanaŭ i tkanak, łaŭreatu Dziaržpremii Alaksandru Dziadźko źmienienaja miera strymańnia na padpisku ab niavyjeździe, paviedamlaje «Narodnaja vola».
15 maja Alaksandr Dziadźko byŭ vyklikany ŭ Departamient finansavych rasśledavańniaŭ Kamiteta dziaržkantrolu, a ŭ nastupnyja dni nie źjaviŭsia na pracoŭnym miescy.
17 traŭnia aficyjny pradstaŭnik Śledčaha kamiteta Siarhiej Kabakovič paćvierdziŭ Svabodzie: Śledčym kamitetam zaviedziena i rasśledujecca kryminalnaja sprava ŭ dačynieńni A.Dziadźko pa faktach atrymańnia chabaraŭ ad pradstaŭnikoŭ kamiercyjnych struktur za vyrašeńnie pytańniaŭ, jakija ŭvachodziać u jahonuju kampetencyju.
«U ciapierašni čas z zatrymanym pracujuć śledčyja, pravodziacca nieabchodnyja pracesualnyja dziejańni», — padsumavaŭ pradstaŭnik viedamstva.
Adnak 20 maja Alaksandr Dziadźko vyjšaŭ na pracu. Jamu źmianili mieru strymańnia na padpisku ab niavyjeździe. Ź listom pra toje, što prafiesar patrebien na pracoŭnym miescy, u śledčyja orhany źviarnuŭsia kiraŭnik RNPC transpłantacyi orhanaŭ i tkanak, łaŭreat Dziaržaŭnaj premii Biełarusi Aleh Rumo, jaki niepasredna pracuje i vykonvaje składanyja apieracyi razam ź Dziadźko.
Jak paviedamlaje «Narodnaja Vola», u praktycy byli precedenty, kali da sudu abvinavačanyja ŭ kryminalnaj spravie daktary praciahvali pracavać.
Alaksandr Dziadźko ŭ miedycynie 36 hadoŭ, u 1998-m jon staŭ zahadčykam adździaleńnia aniestezijałohii 9-j haradskoj balnicy. Viasnoj 2008 hodu razam z kalehami vykanaŭ pieršuju apieracyju pierasadki piečani. Jon łaŭreat Dziaržaŭnaj premii za raspracoŭku i ŭkaranieńnie technałohij transpłantacyi orhanaŭ u dziaciej i darosłych.
