Śvietłahorskija «hanhstary» abakrali kramu, vyrvaŭšy kraty aŭtamabilem
12 maja ŭ try hadziny nočy ŭ dačnym pasiołku pad Śvietłahorskam abrabavali kramu. Złodziei dziejničali z razmacham, z prymianieńniem techničnych srodkaŭ, paviedamlaje «Ranak».
U milicyju patelefanavaŭ dačnik, jaki bačyŭ, jak niekalki čałaviek ŭzłomvajuć handlovy paviljon na aŭtobusnym prypynku. Nieŭzabavie narad milicyi hrupy zatrymańnia Śvietłahorskaha adździeła achovy spyniŭ žyhuli-dziaviatku, u jakoj znachodzilisia troje niećviarozych chłopcaŭ. U mašynie znajšli pradukty, ałkahol i cyharety.
Milicyjaniery adnavili chranałohiju padziej. Dva 16-hadovych pryjaciela, śvietłahorac i babrujčanin, vyrašyli adpačyć i papić piŭka. Nieŭzabavie da ich dałučyŭsia 25-hadovy śvietłahorac. Kali spatrebiłasia dabaŭka, starejšy prapanavaŭ uziać toje, što «drenna lažyć». Padjechali na jaho dziaviatcy da handlovaha paviljona, trosam vyrvali kraty na aknie. Ale ŭnutry akazałasia jašče adna rašotka, jakuju možna było vyłamać tolki sa ścianoj.
«Hanhstary» nie razhubilisia i prosta ŭzłamali dźviery. Uziali ałkahol, zakusku, cyharety. Dačniki, jakija padniali tryvohu, napužali chłopcaŭ, jany skoknuli ŭ žyhuli i pajechali ŭ Śvietłahorsk. Padazronuju mašynu milicyjaniery spynili kala AZS-56, na trasie Paryčy-Rečyca.
Košt skradzienych praduktaŭ skłaŭ 163 rubla 15 kapiejek. Daviadziecca adkazvać nie tolki za kradziež i naniesienuju škodu. Paŭnaletni, jaki vypivaŭ z padletkami i sieŭ pjanym za rul, adkaža jašče i za heta.
