Hetyja ludzi z kiraŭnictva kramy «Jeŭraopta» vyhaniali absalutna hołymi na vulicu tych, chto kraŭ ałkahol
Dyrektar i zahadčyk adździeła kramy «Jeŭraopta» ŭ Sierabrancy zmahalisia z vykradalnikami tavaru svaimi mietadami: ździekavalisia ź ich u padsobcy, a paśla absalutna hołymi vyhaniali na vulicu.
Ciapier los supracoŭnikaŭ kramy budzie vyrašać sud Leninskaha rajona. Praces pa spravie pačaŭsia 13 maja.
Cikava, što pad vartaj try čałavieki — dvoje abvinavačanych i adzin paciarpieły. A sudzimaści pa roznych pryčynach majuć absalutna ŭsie ŭdzielniki pracesu — i tyja, chto biŭ, i tyja, kaho bili.
Abvinavačanyja — supracoŭniki kramy na Rakasoŭskaha ŭ Sierabrancy. 30-hadovy Alaksiej Dziamidaŭ pracavaŭ zahadčykam adździeła.
Alaksiej Dziamidaŭ
40-hadovy Pavieł Rafalski byŭ dyrektaram.
Pavieł Rafalski
Naprykład, dyrektara kramy sudzili za hvałt u dačynieńni daišnika, jaho kalehu sudzili za ŭchileńnie ad pryzyvu. A ŭ paciarpiełych sudzimaści za rabaŭnictva, niaspłatu alimientaŭ…
Jašče adzin paciarpieły na voli. Heta jon źviarnuŭsia ŭ milicyju paśla źbićcia.
«Ja skraŭ butelku harełki, — pryznaŭsia paciarpieły Juryj pierad pasiadžeńniem. — Čakaŭ znajomych, kab hrošaj pazyčyć, ale jany nie pryjšli… Nu i daviałosia».
Juryj kaža, što sprabavaŭ źbiehčy z toj harełkaj, ale jaho spyniŭ achoŭnik. Adviali ŭ padsobku.
Tam źbili. Paśla prymusili raspranucca i vykinuli na vulicu.
«Klučy ŭsunuli ŭ rot — a kudy ich padzieć, ja ž hoły! — i pajšoŭ tak. Znajšoŭ kavałak kardonu ŭ śmietnicy, prykryŭsia. Mianie takoha zabrała milicyja ŭ adździaleńnie, tam dali niejkuju vopratku. Na nastupny dzień źviarnuŭsia pa miedycynskuju dapamohu», — kaža mužčyna.
Druhi paciarpieły — 54-hadovy mužčyna. Jon znachodzicca pad vartaj. Raniej mieŭ 9 sudzimaściaŭ.
Juryju złamali nos — zakryty pierałom. Paśla lačeńnia jon vyrašyŭ napisać zajavu na supracoŭnikaŭ kramy, jakija jaho źbili.
Pryčym za skradzienuju harełku ŭžo paśpieli asudzić i samoha Juryja. Mužčyna kaža, što atrymaŭ bolš za 200 hadzin hramadskaj pracy.
Praŭda, praces skončyŭsia litaralna praź niekalki chvilin paśla pačatku, bo abvinavačanym nie ŭručyli pozvy ŭ naležny termin. Tamu pasiadžeńnie pieranieśli na 21 maja.
