Sioleta «Dudarski rej» zavitaŭ u Padśville, radzimu Jazepa Drazdoviča FOTY
U Hłybokim prachodzić treci Mižnarodny fest dudarskich rehijonaŭ Jeŭropy — «Dudarski rej — 2019». Siarod zamiežnych muzykaŭ sioleta — dudary z Polščy, Charvatyi, Paŭnočnaj Makiedonii.
Vital Voranaŭ, inicyjatar i adzin z arhanizataraŭ festu, jakoha padtrymaŭ Hłybocki rajvykankam, imkniecca, kab štohod adnym z epicentraŭ festu była inšaja vioska, albo miastečka Hłyboččyny. U minułyja hady takim epicentram było kolišniaje miastečka Prazaroki, dzie naradziŭsia Ihnat Bujnicki, stvaralnik pieršaha biełaruskaha prafiesijnaha teatru, u trupie jakoha byŭ dudar Adam Šulha.
Sioleta takim epicentram stała miastečka Padśville, jakoje niekali paśpieła pabyć i centram Pliskaha rajona.
Niečakanaściu dla nas — niezaležnych žurnalistaŭ — stała źjaŭleńnie na adkryćci festu, mastaka Alesia Puškina z synam Mikołkam.
Aleś Puškin znajšoŭ u Padśvilli «svajackija» dušy — spadarstva Valeryja i Aleny Maciušonkaŭ. Valeryj — raźba pa drevie, Alena — vyrab lalek i cacak.
Jak pryznaŭsia Aleś, pajechali jany sa svajho Babra na Minsk, a potym maršrutkaj — na Hłybokaje. Pryjechaŭšy na aŭtastancyju, Aleś biedavaŭ, što nie daść rady. Nikoha nie viedaju. Dzie šukać tuju Aleju słavutych ziemlakoŭ? Jak pierasoŭvacca ad pasielišča da pasielišča ŭsie try dni festu? A pahladzieć chaciełasia b usio! Brać taksoŭku? Miž tym Alesia siarod masoŭki adrazu «vyličyli» hłybockija žurnalisty, znajšłosia miesca dla jaho i jaho syna ŭ aŭta haziety «Katalicki Vieśnik», jaki, darečy, robicca ŭ Hłybokim.
Paśla ŭračystaha adkryćcia festu na Alei słavutych ziemlakoŭ la pomnika Ihnatu Bujnickamu ŭ Hłybokim — hości i ŭdzielniki festu adjechali ŭ Padśville.
Dla Hłybokaha, jaki ŭžo pryvyk da roznych mižnarodnych fiestyvalaŭ, u tym liku i Višniovaha, padobnaje śviata — užo tradycyja, a jak dla miastečka Padśville — redkaja i značnaja padzieja nie tolki hoda, ale i ŭ žyćciapisie samoha pasielišča, nasielnictva jakoha składaje 1,8 tys. čałaviek.
Udzielniki festu ŭ steły «Padśville».
Padśville sustreła haścinna i ciopła ŭ naŭprostavym sensie, bo ŭ Hłybokim było dosyć ściudziona i ŭvieś čas źbiraŭsia raspačacca doždž, ale ŭ časie adkryćcia — chmary, usio ž, raźbiehlisia.
Spačatku — chleb-sol la Doma kultury. Zatym naviedvańnie vystavy padśvilskich narodnych umielcaŭ u faje Doma kultury.
Było zaŭvažna, što haściej cikavić biełaruskaja kultura, bo jana vielmi adroznaja ad toj, što na ich radzimie. Najbolš času hości zatrymalisia la vystavy traŭnicy Ludmiły Babroŭskaj. Da spadoby ŭsim pryjšłasia jaje harbata, składnikami jakoj źjaŭlajucca miascovyja ziołki z vakolicaŭ Hałubickaj puščy. Niekatoryja vypili niekalki kubačkaŭ, dy prasili recepty ad roznych chvarobaŭ.
Dalej — paviercham vyšej — sustreča z kalektyvam Padśvilskaj biblijateki, dzie haściej taksama častavali piečyvam i harbataj.
Nu j, narešcie, šeście dudaroŭ pa centralnaj vulicy miastečka.
Spačatku, naohuł, ŭźninikła pytańnie: a dzie padzielisia padśvilčanie, niaŭžo słuchačami stanuć tolki supracoŭniki Doma kultury i biblijateki? Adnak, peŭna miascovyja pasiałkovyja ŭłady sprytna zrežysiravali mierapryjemstva — žychary miastečka vystrailisia zboč vulicy i ŭlivalisia ŭ kałonu da šeścia dudaroŭ. Administracyjny resurs? Moža być, ale, jak raz, na karyść śviata. A to, mahčyma, siadzieli b u chacie, a tut ich dałučyli da śviata staradaŭniaj muzyki.
Hrupavy zdymak na scenie Padśvilskaha DK. Krajni sprava — Vital Voranaŭ, inicyjatar praviadzieńnia festu Dudarskich rehijonaŭ.
Usia hramada ŭvajšła ŭ Padśvilski DK, dzie i adbyŭsia kancert. Zała była zapoŭnienaja amal całkam, što dla Padśvilla, jakoje roŭna ŭ 10 razoŭ mienšaje za Hłybokaje — vialiki pośpiech! Haściej festu vitali pradstaŭniki hłybockich uładaŭ i miascovy «mer» Anatol Jaraševič
Vystupleńnie kapeły z Polščy z rehijona Kazła. Sprava — dudar, instrumient jakoha vyrableny sa skury biełaha kazła.
Vystupaje hrupa z Respubliki Paŭnočnaja Makiedonija
Darečy, siarod muzykaŭ byŭ Ctepan Večkavič z Charvatyi — udzielnik Jeŭrabačańnia. Śviata staradaŭniaj muzyki spadabałasia žycharam miastečka, a šmat chto z prysutnych zdymaj vystupy zamiežnych kapełaŭ na smartfony. Hučańnie dudaŭ było raznastajnym, tak jak udzielniki vykarystoŭvali roznyja typy dudaŭ, što hrajuć u ich rehijonie.
Paśla skančeńnia kancertnaj prahramy ŭdzielniki festu nakiravalisia ŭ sanatorna-kurortny kompleks «Plisa», dzie dla adpačyvajučych sanatoryja byŭ zładžany kancert na miascovaj arenie pad adkrytym niebam, što bierazie adnajmiennaha i vialikaha voziera Plisa.
Nastupnym dniom fest doŭžyŭsia ŭ Hłybokim — pres-kanfierencyja dla presy, a ŭviečary — hała kancert i tancy pad dudu ŭ Haradskim domie kultury, dzie dałučyłasia jašče bolš biełaruskich dudaroŭ.
U apošni dzień — naviedvańnie kaścioła ŭ Udziele (5 km ad Hłybokaha), dzie zamiž arhana budzie hučać duda. Niedaloka ad kaścioła —chata dzieda Vitala Voranava, dzie jon časta spyniajecca pryjechaŭšy z Polščy.
