Pjany baćka z synami ledź nie zarezali susieda, a zatym vyjšli ź viłami na ŭčastkovaha — tryler pad Stoŭbcami
Zdareńnie adbyłosia 1 maja. U Staŭbcoŭski RAUS pastupiła infarmacyja z balnicy: u viosku Viazaviec nakiravałasia bryhada chutkaj, bo adnamu ź viaskoŭcaŭ spatrebiłasia dapamoha, paviedamlaje pres-słužba milicyi.
Na miesca nieadkładna nakiravali śledča-apieratyŭnuju hrupu, adnačasova infarmacyja ab zdareńni była pieradadziena ŭčastkovamu inśpiektaru, jaki znachodziŭsia ŭ adnoj z susiednich viosak.
Adbyłosia nastupnaje: 32-hadovy mužčyna znachodziŭsia ŭ haściach u susiedziaŭ, dzie vypivaŭ z haspadarom i dvuma jaho synami. Uźnikła svarka, padčas jakoj hość atrymaŭ nažavoje ranieńnie ruki. Miedyki razam z paciarpiełym źjechali ŭ balnicu, a ŭčastkovy paviedamiŭ abstaviny zdareńnia śledča-apieratyŭnaj hrupie. Adnak dačakacca kaleh nie paśpieŭ. Niećviarozaja kampanija vyjšła na ŭčastkovaha, jaki siadzieŭ u słužbovym aŭto.
Pačałosia ź niecenzurnaj łajanki i słoŭnych pahroz. Prośby supakoicca tolki raźjušyli trojcu. Pry hetym baćka viarnuŭsia da chaty i nieŭzabavie vyjšaŭ ź viłami ŭ rukach.
Razumiejučy, što nieadekvatnyja pavodziny spynić nie ŭdasca, učastkovy papiaredziŭ, što budzie stralać. Ale i heta patrabavańnie było praihnaravanaje. Adzin z synoŭ sprabavaŭ udaryć milicyjaniera, druhi mietaličnaj truboj staŭ krušyć słužbovy aŭtamabil.
Kab astudzić zapał siamiejstva starejšy lejtenant milicyi byŭ vymušany zrabić papieradžalnyja streły. Tolki heta i spyniła hora-bajcoŭ.
Zatym padaśpieli kalehi i akazali dapamohu ŭ zatrymańni. 56-hadovaha baćku i jaho synoŭ (starejšamu 30 hadoŭ, małodšamu 26 hadoŭ) dastavili ŭ izalatar časovaha ŭtrymańnia.
