Polšča spyniła tranzit rasijskaj nafty ź Biełarusi pa naftapravodzie «Družba» z-za jaje kiepskaj jakaści
Polšča spyniła pryjom rasijskaj nafty z-za jaje nizkaj jakaści. Adpaviednaje apaviaščeńnie atrymała AAT «Homieltransnafta Družba», paviedamlaje Tut.by sa spasyłkaj na pres-słužbu kampanii.
Jak infarmavaŭ apieratar polskaha ŭčastka trubapravoda «Družba» — kampanija PERN S.A., pryjom nafty spynieny z 22.00 pa varšaŭskim časie (23.00 pa minskim) 24 krasavika.
«Pa paviedamleńniach, jakija atrymlivajucca ad našych klijentaŭ, nivodny z NPZ, jakija znachodziacca na naftapravodzie «Družba», nie moža prymać na svaje ŭstanoŭki i pierapracoŭvać naftu z takimi pakazčykami, ź jakimi jana ciapier pastaŭlajecca ŭ punkt prymańnia pastavak Adamova», — piša PERN.
U paviedamleńni taksama ŭkazvajecca, što pakazčyk pa masavaj doli arhaničnych chłarydaŭ u joj pieravyšaje limitavy narmatyŭ da 30 razoŭ i praciah pastavak takoj nafty «naradžaje ryzyku surjoznaj pramysłovaj avaryi, jak dla NPZ, tak i dla łahistyčnaj sistemy PERN».
Tranzit nafty ŭ kirunku Ukrainy dla NPZ Čechii, Słavakii i Vienhryi praciahvajecca. Niekandycyjnaja nafta pastupić na punkty zdačy nafty ŭ Vienhryju i Słavaččynu za 4—5 dzion, zaznačaje «Homieltransnafta Družba».
Nahadajem, 19 krasavika kancern «Biełnaftachim» zajaviŭ pra «rezkaje paharšeńnie» jakaści rasijskaha hatunku Urals, jaki pastupaje tranzitam pa naftapravodzie «Družba». U rasijskaj trubapravodnaj manapolii pryznali najaŭnaść prablem i vykazali nadzieju, što «situacyja ź jakaściu pavinna narmalizavacca da paniadziełka-aŭtorka nastupnaha tydnia».
22 krasavika na Mazyrskim naftapierapracoŭčym zavodzie zajavili, što niajakasnaja rasijskaja syravina pryviała da vychadu sa stroju darahoha abstalavańnia.
23 krasavika Biełaruś prypyniła ekspart śvietłych naftapraduktaŭ va Ukrainu, Polšču i krainy Bałtyi, a ŭ «Biełnaftachimie» zajavili, što rasijskaja nafta z pavyšanym utrymańniem chłorarhaničnych złučeńniaŭ pačała pastupać u Jeŭropu i Ukrainu.
24 krasavika na «Naftanie» paviedamili, što pa paŭnočnaj halincy naftapravoda pačałasia prapampoŭka nafty, jakaja adpaviadaje technałahičnym standartam. Na Mazyrskim NPZ situacyja zastajecca raniejšaj — nafta pastupaje z pavyšanym utrymańniem chłorarhaniki.
Zrešty, rasijskija ekśpierty kažuć, što «Minsk zanadta dramatyzuje prablemu». Jany acanili abjomy sapsavanaj nafty na 100—300 tysiač ton. Pry canie na naftu marki Urals u 71,86 dalara za tonu košt takoj kolkaści aceńvajecca ŭ 52,6—158 młn dalaraŭ. Biełaruś sumu strat ad prablem ź jakaściu rasijskaj nafty nie ahučvała, da jaje raźliku pryciahnutyja niezaležnyja ekśpierty.
24 krasavika «Biełnaftachim» paviedamiŭ, što raspracavana schiema vyciaśnieńnia «brudnaj» rasijskaj nafty ź biełaruskaha ŭčastka naftapravoda «Družba». Jaje abjomy ŭžo pieravyšajuć adzin miljon ton.
