Jakuju biełaruskuju «małočku» lubiać najbolš u roznych krainach śvietu
Kitajcy pjuć naša małako, u Emiratach papularnaja śmiatana, a ŭ Rasii addajuć pieravahu biełaruskim syram i tvarahu. «Savuškaŭ pradukt» raspavioŭ, jakija małočnyja pradukty ź Biełarusi papularnyja ŭ roznych krainach śvietu.
Biełaruskaja «małočka» pradstaŭlenaja ŭ 30 krainach śvietu. Najbolš kuplajuć u Rasii, dzie lubiać małako, tvaroh, ćviordyja syry, desierty i hrečaskija johurty. Prykładna tyja ž pradukty abirajuć i inšyja našy słavianskija susiedzi.
U Kazachstanie i Azierbajdžanie zapatrabavanyja biełaruski tvaroh, ražanka i syrovatka, a taksama masła. Hruziny i armianie lubiać tvarožnyja desierty z Bresta.
U Kitai taksama dałučajucca da «małočnaj kultury»: daspadoby pryjšłosia ultrapasteryzavanaje małako «Savuškaŭ». «Dla kitajskaha spažyŭca smak małaka ŭsio jašče niezvyčajny: bolšaja častka nasielnictva da jaho jašče tolki pačynaje pryvykać. Pakul tolki kožny piaty žychar rehularna pje małako, vypivajučy ŭ 7 razoŭ mienš za biełarusa, — raspaviali ŭ kampanii. — Adnak siońnia KNR vielmi zacikaŭlenaja ŭ šyrokaj prysutnaści na rynku naturalnych małočnych praduktaŭ. I tam užo jość mnohija jeŭrapiejskija vytvorcy».
U krainach Paŭdniova-Uschodniaj Azii, takich jak Vjetnam i Filipiny, bolš achvotna kuplajuć suchuju syrovatku. U toj čas jak u Sinhapury i Hankonhu palubilisia biełaruski kiefir, tvaroh, ražanka, śmiatana, masła i syry.
Blizki Uschod nie adstaje. Emiraty ŭžo daŭno achvočyja da tradycyjnych tvarahu i śmiatany, a Turcyja — da masła. Choć bolš za ŭsio biełaruskaj «małočki» ŭ rehijonie kuplaje Iardanija. Tudy, u pryvatnaści, pastupajuć z Bresta syry, tvaroh, johurty, kiefir, ražanka i syrovatka.
Što da Jeŭropy, to johurty «Savuškaŭ» pjuć u Łatvii i Estonii, masła namazvajuć hałandcy i datčanie, a syry narazajuć bałhary. Małočnyja pradukty (syry, tvaroh i masła) chaj jašče nievialikimi partyjami, ale dastaŭlajuć navat u ZŠA.
«Biełaruskaja «małočka» zapatrabavanaja ŭžo ŭ čatyroch častkach śvietu. Brend «Made in Belarus» tradycyjna mocny ŭ Rasii i inšych krainach SND, ale paśpiachovy i na novych rynkach — jak jeŭrapiejskich, tak i azijackich. Viadoma, na pieravahi spažyŭcoŭ u kožnaj krainie mocna ŭpłyvajuć kulinarnyja tradycyi, ale papularnaść małočnych praduktaŭ raście va ŭsim śviecie. Takim čynam, raście i kankurencyja ŭ halinie. I nam pryjemna, što naša pradukcyja hodna jaje vytrymlivaje. Naturalnaść, smak i jakaść — siońnia našy asnoŭnyja kankurentnyja pieravahi na suśvietnym rynku praduktaŭ charčavańnia», — adznačyła PR-dyrektar kampanii «Savuškaŭ pradukt» Alena Babkina.