Najbujniejšy ŭkrainski telekanał padaŭ u sud na Parašenku
Kanał «1+1» ukrainskaha aliharcha Ihara Kałamojskaha padaŭ pazoŭnuju zajavu ŭ Piačerski rajsud Kijeva da prezidenta Ukrainy Piatra Parašenki i vydavieckaha doma «Miedyja-DK» z patrabavańniem abvierhnuć niepraŭdzivuju infarmacyju i kampiensavać maralnuju škodu.
Kampanija acaniła maralnuju škodu ŭ miljon hryŭniaŭ (kala 37 tysiač dalaraŭ), jakija, u vypadku vyjhryšu spravy, abiacaje pieraličyć u fond dapamohi armii «Viarnisia žyvym».
U pryvatnaści, u svaim pazovie miedyjahrupa prosić sud pryznać niesapraŭdnymi i takimi, što parušajuć dziełavuju reputacyju, šerah infarmacyjnych paviedamleńniaŭ, jakija Parašenka raspaŭsiudziŭ na svajoj staroncy ŭ Facebook, a taksama ahučyŭ «na schodzie hramadzian», a Vydaviecki dom «Miedyja-DK» raspaŭsiudziŭ na sajcie «Novoje vriemia».
«1+1» patrabuje zabiaśpiečyć abviaržeńnie hetych zajaŭ na praciahu 7 dzion z dnia ŭstupleńnia sudovaha rašeńnia ŭ zakonnuju siłu, a taksama spahnać z Parašenki maralnuju škodu ŭ pamiery 1 miljon hryŭniaŭ.
Nahadali prezidentu Ukrainy i jaho niečakanaje źjaŭleńnie ŭ efiry prahramy «Prava na ŭładu» 11 krasavika.
«Tady, kali biez zaprašeńnia, karystajučysia svaim statusam kiraŭnika dziaržavy, faktyčna «akupavaŭ» žyvy efir prahramy «Prava na ŭładu», na ździŭleńnie redakcyjnaj hrupy i viadučych», — skardziacca na telekanale.
