«Materyjalnyja kaštoŭnaści zaŭsiody ratujuć u druhuju čarhu». MNS Biełarusi — ab pažary ŭ Notr-Damie
@franckriester
Tut.by paprasiŭ Vitala Navickaha, aficyjnaha pradstaŭnika MNS Biełarusi, raspavieści pra niuansy pracy na takich maštabnych zdareńniach.
— Zaŭsiody ŭ pryjarytecie — vyratavańnie čałaviečych žyćciaŭ, a ŭžo ŭ druhuju čarhu — lubyja materyjalnyja kaštoŭnaści, — raspaviadaje Vital Navicki. — Darečy, u niekatorych vyratavalnych słužbaŭ u śviecie vyratavańnie materyjalnych kaštoŭnaściaŭ uvohule nie ŭvachodzić u zadačy. Adpaviedna, kali na abjekcie niama ludziej, niama i rašeńnia ryzykavać žyćciom i zdaroŭjem pažarnych dziela vyratavańnia materyjalnych kaštoŭnaściej. Što tyčycca tušeńnia Notr-Dama, viadoma, možna było b zadziejničać viertalot Mi-8 ci Mi-26, kali b jany byli ŭ ich na ŭzbrajeńni — i jon adnaznačna dapamoh by. Hetyja viertaloty mohuć «zavisać» nad pažaram i kropkava skidać vadu ŭ zadadzienuju kropku.
— Kali haryć historyka-kulturnaja kaštoŭnaść, ci jość u ratavalnikaŭ płan, jak pracavać u takoj situacyi? Naprykład, hałoŭnaje — vyratavać centralnuju častku, a špil i dach možna potym budzie adnavić.
— Adkaz zaŭsiody adzin: hałoŭnaje — vyratavańnie čałaviečych žyćciaŭ. Padčas likvidacyi pažaru jość dva etapy: łakalizacyja i likvidacyja. Łakalizacyja — heta zrabić tak, kab ahoń dalej nie raspaŭsiudžvaŭsia i nia nanosiŭ dadatkovaj škody. Tut niama roźnicy, što ratavać — vybirajucca vyrašalnyja napramki ŭ zaležnaści ad taho, u jaki bok raźvivajecca pažar. Adpaviedna, tudy treba padavać siły i srodki, kab praduchilić jaho raźvićcio. A ŭžo zatym nastupaje inšaja stadyja — kančatkova likvidavać pažar, - adkazvaje Vital Navicki.