Jakija klipy ŭ 2000-ja zdymali tyja, kaho nie krucili pa telebačańni ŠMAT VIDEA
«Naša Niva» ŭžo zhadvała pra 75-pracentnyja kvoty biełaruskaj muzyki ŭ efiry ajčynnych radyjostancyj, jakija naradžali jak jakasny pradukt, tak i ščyry treš.
Čytajcie: Fijesta na pieryfieryi. Jakija klipy zdymali biełaruskija pop-vykanaŭcy ŭ 2000-ja — šmat VIDEA
Ciapier my sabrali jašče 25 videa tych, chto nie traplaŭ u farmat, čyje klipy składana było pabačyć na dziaržaŭnym telebačańni, a pieśni — pačuć pa radyjo. Čaściakom ich kancerty admianialisia praz «čornyja śpisy».
Gods Tower — Civilization
U kancy dzievianostych Gods Tower byli biassprečnymi lidarami metalovaj sceny ŭ Biełarusi — ich albomy vydavalisia jeŭrapiejskimi łejbłami, a kamandu zaprašali na najbujniejšyja muzyčnyja fiestyvali.
Klip na trek «Civilization» byŭ źniaty ŭ 2001 hodzie, a praz hod hurt raspaŭsia. U 2010-m Gods Tower uźjadnalisia, ale albomaŭ ad novaha składu muzykaŭ pakul nie było.
Mantana — Manikiury
U ahladzie klipaŭ pop-vykanaŭcaŭ my adznačyli dva videa hurta Merry Poppins. Ale da ekśpierymientaŭ ź sinci-popam i vandrovak u Japoniju siostry Bierułavy hrali badziory farmatny pop-rok, jaki aktyŭna krucili na radyjo i pakazvali na telebačańni.
Jak i ŭ vypadku z Gods Tower, Mantana paśla doŭhaha maŭčańnia taksama viarnułasia na scenu. Zapisvaje treki i zdymaje klipy.
Krambambula — Absent
«Absent» byŭ hałoŭnym chitom «Zastolnaha alboma», ź jakoha pačałasia dyskahrafija «Krambambuli» ŭ 2002 hodzie.
Klip, u jakim pasprabavali ŭznavić atmaśfieru davajennaha Paryža, pratrymaŭsia ŭ čarcie na BT cełych vosiem miesiacaŭ, što było na toj momant rekordam prahramy.
Krambambula — Lublu
Praz hod paśla vychadu «Zastolnaha alboma», jaki vyjhraŭ u troch naminacyjach «Rok-karanacyi», Krambambula zapisvaje jašče adzin kultavy albom «Karali rajonu». U jaho zapisie brali ŭdzieł taksama Siarhiej Michałok i Alaksandr Kulinkovič.
Da zapisu pieśni «Hości» hałoŭnym chitom alboma razhladałasia «Lublu». U vyniku abiedźvie pieśni stali chitovymi, ale «Lublu» tak i nie stali sapraŭdnym biełaruskim šlahieram.
Stary Olsa — U karčmie
Hurt, metaj jakoha stała rekanstrukcyja muzyčnych tradycyj VKŁ, u hetym hodzie adznačyć svajo 20-hodździe.
«U karčmie» — heta pierakład siaredniaviečnaj zastolnaj jeŭrapiejskaj pieśni. A klip na jaje, źniaty ŭ 2003 hodzie, pakazvaje nam toje, jak zabaŭlalisia ludzi ŭ 16-m stahodździ.
TT-34 — Džiek
Samy paznavalny trek jašče adnoj homielskaj mietał-kamandy. U nulavyja ich treki aktyŭna vykarystoŭvalisia jak saŭndtreki ŭ rasijskich filmach, ale historyja hurta tak i nie stała paśpiachovaj.
Paśla letarhičnaha snu ŭ 12 hod TT-34 zapisali albom «Padaja I Zadychajaś Dobivaješsia Jedinoj Cieli», ale niadaŭni kancert hamielčukoŭ u Minsku nie adbyŭsia praz «nizki mastacki ŭzrovień».
Lapis Trubiackoj — Soči
Z bahataj dyskahrafičnaj dy videahrafičnaj spadčyny «Lapisaŭ» my vyrašyli dastać dva klipy, kab prademanstravać evalucyju tvorčaha šlachu lehiendarnaha hurta.
Klip na pieśniu «Soči» byŭ źniaty letam 2001 hoda. Jak i pa tekście pieśni, tak i ŭ videa Michałok skradaje pryhažuniu i zvozić jaje ŭ sočynskuju noč.
Ale tady frantmen «Lapisaŭ» vyhladaŭ zusim nie tak, jakim my pryvykli jaho bačyć siońnia. Tamu ramantyčnaja historyi z vykradańniem dziaŭčyny kryšačku dysaniruje z vobrazam «toŭstaha chłopca z harmonikam».
Lapis Trubiackoj — Kapitał
U krasaviku 2007 hoda ŭ interniecie źjaviŭsia animiravany klip na pieśniu «Kapitał». U im Siarhiej Michałok pradstaŭleny ŭ vyhladzie šmatrukaha i šmatlikaha bostva sa śvinkaj-kapiłkaj zamiest serca, jakoje vandruje pa razvalenym hłabalizacyjaj śviecie.
Taksama na videa možna pabačyć palityčnych lidaraŭ roznych epoch.
Niejra Dziubiel — Žyćcio
U 2004 hodzie hurt Alaksandra Kulinkoviča trapiŭ u «čorny śpis» praz vystup na apazicyjnym mitynhu.
Tema zabarony stanovicca asnoŭnaj u albomie «Stasi», prezientacyju jakoha ŭ Minsku ŭ listapadzie 2007 hoda admianili ŭ apošni momant.
U toj ža hod «Niejra Dziubiel» źniaŭ klip na pieśniu «Žyćcio», dzie muzyki źniatyja va ŭcichamirvalnych kašulach i z zaklejenymi rtami. Mietafara, zdajecca, jasnaja.
IQ48 — Śviatło ŭ ciemry
Tekst na hetuju pieśniu napisaŭ Michał Aniempadystaŭ. Klip byŭ źniaty ŭ 2006 hodzie i tranślavaŭsia na polskich kanałach.
IQ48 za svaju niadoŭhuju muzyčnuju dziejnaść šmat paśpieli paekśpierymientavać z žanrami, staŭšy ŭ dziasiatyja niečym kštałtu biełaruskich Rage Against the Machine, ale ŭ vyniku hurt spyniŭ svaju dziejnaść.
Tav. Mauzer — Biełaruś budzie volnaj
Niekali mahiloŭski hurt nazyvali lidarami novaj chvali biełaruskaha roku. Za svajo karotkaje muzyčnaje žyćcio Tav. Mauzer paśpieŭ stać łaŭreatam niekalkich muzyčnych fiestyvalaŭ, zapisać dva łonhpłei i mnostva raz patrapić u centr uvahi.
Muzyka «Maŭzeraŭ» adroźnivałasia mocnym sacyjalna-palityčnym mesedžam — muzyki adkryta kazali pra zahany dziaržaŭnaj sistemy i biaskoncuju chłuślivuju prapahandu z boku dziaržaŭnych telekanałaŭ.
Dziecidziaciej — Nie nado
Akciory Kupałaŭskaha teatra Hanna Chitryk, Michaił Zuj i Dźmitryj Jesianievič źbiralisia ŭ hrymiorcy pajhrać pieśni adno adnaho. Z hetaha naradzilisia «Dziecidziaciej», jakija praisnavali piać hadoŭ, paśla čaho raspalisia na dva kalektyvy: ili-ili dy Sounduk.
Klip na pieśniu «Nie nado» staŭ pieršym u videahrafii hurta.
N.R.M. — Miensk i Minsk
Klip byŭ źniaty ŭ 2007 hodzie šviedskim režysioram-dakumientalistam Tomasam Nordanstadam.
Mesedž pieśni i klipa aktualny i pa siońnia — jość dźvie rečaisnaści, u jakoj isnujuć biełarusy: zabudavanaja ladovymi pałacami i jakuju pakazvajuć pa telebačańni suprać toj, ab jakoj ludzi marać i bieź jakoj sumujuć.
Sieriebrianaja Svad́ba — Piłoty
Pluńcie tamu ŭ tvar, chto budzie kazać, što biełaruskaja muzyka — biednaja i ŭ nas niama kaho słuchać. U nas byli i jość hurty na luby hust: mietał, rehi, etna, ska-pank i navat svoj kabare-bend.
Klip byŭ źniaty lehiendarnymi asobami dla biełaruskaj muzyki: Anatolem i Aksanaj Viečar.
Partyzone — Smutak
Niekali «Partyzony» pieršymi pasprabavali ŭskaraskacca na novuju niamieckuju chvalu i hrać niešta padobnaje da Rammstein.
Składana skazać, ci atrymałasia heta ŭ poŭnaj miery, ale ŭ spadčynu ad hurta zastalisia čatyry albomy i klip na pieśniu «Smutak».
Trojca — Try janhały
Multyplikacyjny klip dla lehiendarnaha hurta stvaryła maładaja animatarka Julija Rudzickaja. «Trojca» šukała režysiora dla klipa, i prapanavanaja Rudzickaj kancepcyja vielmi spadabałasia muzykam.
Heta historyja pra biaskoncaje viartańnie čałaviečaj dušy ź ziamli na niabiosy i pra niemahčymaść zabrać z saboj usio nažytaje za žyćcio.
Videa vyjhrała niekalki niekalki mižnarodnych konkursaŭ.
ZET — Kałhas
U manifieście tajamničaha hurta, muzyki jakoha chavali tvary pad maskami, było skazana, što, «kab paźbiehnuć «farmatu», hurt ZET budzie vykonvać pieśni ŭ roznych stylach, z roznymi tekstami na roznych movach. Imidž budzie pastajanna źmianiacca». Treba, kab nichto nie viedaŭ, što ŭ nastupny raz zhraje i jak budzie vyhladać hurt. Heta robicca, kab paźbiehnuć haračaj lubovi słuchačoŭ hrańnia adnaho i taho ž ciaham dziesiacihodździaŭ. Ad skrajnich mietał-płyniaŭ da błatniaku! Kab nie pryzvyčajvalisia».
Ale paznavalny hołas Lavona Volskaha było nie schavać.
Naka — Moj hieroj T.B.
Hety klip hurta Nasty Špakoŭskaj stanaviŭsia pieramožcam na fiestyvali redkich klipaŭ. Praz 12 hadoŭ paśla jahonaha vychadu my zduvajem pył i prezientujem jaho nanoŭ.
Viedajecie, chto takaja Tania Bułanava?
Bieź Bileta — Miečtatieli
Užo bolš za dvaccać hadoŭ «Bieź bileta» ź viečna maładym Vitalikam Artystam radujuć prychilnikaŭ svajoj tvorčaściu. Redki prykład daŭhalećcia na biełaruskaj muzyčnaj scenie.
Praz hurt prajšli šmatlikija viadomyja muzyki: Dzianis Sturčanka i Dzianis Šuraŭ hrali ŭ «Lapisach» i Brutto, a Aleś-Francišak Myškievič źjaŭlajecca bas-hitarystam «Krambambuli» i frantmenam Superbullz.
:B:N: — Ciahnik
Klip jašče adnych doŭhažycharoŭ biełaruskaha roku. Sioleta hurtu ź Biarozy spaŭniajecca 20 hadoŭ, i hetuju padzieju «Biaz nazvy» vyrašyli adśviatkavać niezvyčajnymi kancertami — pieršy ź jakich prajšoŭ u tramvai.
Adys Abieba — Dzieci
Nievierahodna, ale heta fakt: u Biełarusi, dzie, zdajecca, niama kudy puścić karani žanru rehi, u rozny čas isnavali i isnujuć vielmi krutyja hurty, što hrali ŭ hetym styli.
«Adys Abieba», napeŭna, najbolš viadomy ź ich. Admietna, što pieršy klip byŭ źniaty na biełaruskamoŭnuju pieśniu.
Pietla Pristrastija — Dyšať i smotrieť
10 hadoŭ tamu ŭ «Pietli Pristrastija» vyjšaŭ debiutny albom «Vsiem dovolen». Amal adrazu jon byŭ zaŭvažany i nazvany hałoŭnym adkryćciom u ruskamoŭnaj rok-muzycy.
Za hety čas hurt zapisaŭ jašče čatyry płytki, pryśviečannyja nadzionnym prablemam zvyčajnaha čałavieka, i pa siońnia zastajecca zapatrabavanym i źbiraje poŭnyja zały.
Lavon Volski — Eŭravizija
Boža, bieražy Volskaha i daj jamu doŭhaha zdaroŭja!
Piaty klip z udziełam Lavona Arturaviča ŭ našaj padborcy. Na hety raz — na pieśniu z solnaha alboma «Kuplety i prypievy», što byŭ zapisany ŭ stylistycy art-brutał i treš-šanson.
Daj Darohu! — D.S.P.H.
Aściarožna! U klipie jość niecenzurnaja łajanka!
Brecskija panki na čale ź Juryjem Stylskim zaŭsiody byli admietnyja sacyjalnaj lirykaj pra viečny niedachop hrošaj, biezpracoŭje i pachmurnyja žyćciovyja pierśpiektyvy.
Hetamu pryśviečanaja i pieśnia, klip na jakuju vy možacie nazirać. Rasšyfroŭvać nazvu my nie budziem, heta vy ŭžo zrabicie sami.
Rockerjoker — Amierika
I na desiert — minimalistyčnaje, ale vielmi hruntoŭnaje videa hurta, što niekali śpiavaŭ pra Saniu, što zastaniecca z nami.
Kali koratka — heta «pryhožaja historyja ab lubvi da žyćcia i pahardzie da iluzornych kaštoŭnaściaŭ». U im žorstkim praceduram hramadstva spažyvańnia padviarhajecca hieroj klipa, jano ž jaho ŭ vyniku i zabivaje.
A jakija klipy vy jašče možacie pryhadać?