Fijesta na pieryfieryi. Jakija klipy zdymali biełaruskija pop-vykanaŭcy ŭ 2000-ja — šmat VIDEA
U lipieni 2003 hoda biełaruskija radyjostancyi pačali žyć pa novych praviłach: byli ŭviedzienyja kvoty na biełaruskuju muzyku ŭ efiry. Spačatku heta byli 50%, a sa studzienia 2005 hoda try čverci piesień u ratacyi stancyj musili być biełaruskaj vytvorčaści.
Štučnyja miery naŭrad ci mahli paspryjać stvareńniu jakasnaha šou-biznesu i źjaŭleńniu popytu na svaju muzyku ŭ masavaha słuchača, tym bolš mienavita ŭ hety čas piku dasiahnuli karnyja miery ŭ dačynieńni muzykaŭ, što vystupali na mitynhach apazicyi.
Adnak novaja muzyčnaja rečaisnaść naradziła šmat roznaj muzyki, jakaja stała saŭndtrekam Biełarusi nulavych i ciapier navat vyklikaje niešta kštałtu nastalhii.
«Naša Niva» sabrała 25 biełaruskich klipaŭ, stvoranych u toj čas.
Alesia — Pticy moi pticy
Klip byŭ źniaty ŭ dalokim 2003 hodzie, jašče praz 6 hod byŭ zahružany na jutub i na siońnia maje amal 300 tysiač prahladaŭ.
Miarkujučy pa mnostvu kamientaroŭ kštałtu «ja hetuju pieśniu śpiavaŭ u dziciačym sadku» abo «zahadali bratu vyvučyć u škole hetu pieśniu, zajšła pahladzieć klip, a tam prosta žeść» možna tolki zdahadvacca, kolki dziaciej na ŭsioj ruskamoŭnaj prastory paciarpieła ad ptušak Alesi.
Stoks — Mieždu Minskom i Rimom
Adnymi z pradstaŭnikoŭ «farmatnaj» rok-muzyki, jakaja dobra kłałasia ŭ ratacyju radyjostancyj, stali navapałačanie z hurta «Stoks».
U 2003 hodzie vyjšaŭ ich albom «Mieždu Minskom i Rimom», hałoŭnaja pieśnia jakoha kruciłasia na radyjo i pa telebačańni navat paśla pierajezdu «Stoks» u Maskvu.
Hurt, darečy, dahetul žyvy i navat zapisvaje treki pa-biełarusku.
Alaksandra Hajduk — Samoje sładkoje miesto na tiele
Sama śpiavačka nazyvaje hetu pieśniu muzyčnym ściobam. Ale pa klipie składana zrabić takija vysnovy.
Ciapier Alaksandra zajmajecca kiniematahrafičnaj karjeraj — zdymajecca ŭ biełaruskich i rasijskich filmach i sieryjałach.
Kraski — Staršij brat / Staršij brat - 2
Niemahčyma było nie zhadać lehiendarnyja «Kraski», choć pik ich papularnaści prajšoŭ jašče da ŭviadzieńnia kvot na ajčynnuju muzyku.
U hurta jość dźvie pieśni, klipy na jakija abjadnanyja siužetnaj linijaj — spačatku brat liryčnaj hieraini stanovicca darosłym i bolš nie słuchaje «Kraski», a potym ženicca.
Ina Afanaśjeva — «Budu s toboj»
Zhodna ź infarmacyjaj Vikipiedyi, repiertuar zasłužanaj artystki Biełarusi składajecca ź dźviuch socień piesień. Ale klipaŭ na ich źniata vielmi mała.
Videa ź siaredziny nulavych vyklikaje šmat pytańniaŭ: jakuju rolu hraje śpiavačka, jak jana źviazanaja z hierojem rolika, i navošta jon biez štanoŭ treba Inie Afanaśjevaj?!
Kirył Słuka — Tramvaj
Na pačatku nulavych Kirył Słuka byŭ chiba ci nie zorkaj №1 na biełaruskaj estradzie. Jon vioŭ pieradačy na BT, kancerty «Słavianskaha bazara», a taksama zajmaŭsia muzyčnaj karjeraj.
Amal usim viadomyja radki pieśni pra Biełarusiju, ale chaciełasia b adznačyć liryčny klip na pieśniu «Tramvaj», źniaty ŭ 2004 hodzie jaŭna nie biez dapamohi kiniematahrafistaŭ.
Praź niekatory čas Słuka źnik ź biełaruskaha šoŭbizu i pierajechaŭ u Maskvu, dzie taksama zajmajecca tvorčaściu, ale ŭžo nie tak aktyŭna.
Palina Smołava — Dožd́
Choć klip vyhladaje siońnia davoli paciešna, možna pasprabavać adsačyć hłybokuju fiłasofiju — pa žyćci nam sustrakajucca roznyja kłoŭny i źmiei. Taki voś biełaruski daasizm na try chviliny.
Merry Poppins — Lubov
Siostry Bierułava ŭ rannija nulavyja hrali ŭ hurcie «Mantana». Paśla, rasčaravaŭšysia ŭ šoŭbizie, jany źjechali pracavać u Japoniju, adkul pryvieźli modny muzyčny napramak sinci-pop.
Možna ŭpeŭniena kazać, što Merry Poppins — heta adzin z najbolš paśpiachovych biełaruskich muzyčnych prajektaŭ. Dziaŭčaty zapisvali saŭndtreki da rasijskich sieryjałaŭ, udzielničali ŭ televizijnych realici-šou i zdymalisia dla mužčynskich časopisaŭ.
I pa siońnia ich pieśni hučać davoli sučasna.
Merry Poppins — Kartinki
Jak dokaz hetamu — jašče adzin klip, jaki byŭ źniaty viadomym režysioram Maćviejem Saburavym.
Pieśnia ciaham šaści tydniaŭ uznačalvała čart «Srebranaha hramafona» na ANT (pamiatajecie takuju pieradaču?).
Žanet — Ja tiebia nie lublu
Pieśnia pra pakuty dziaŭčyny praź nieŭzajemnaje kachańnie.
U samoj Žanet z kachańniem usio ok — u 2010 hodzie jana vyjšła zamuž za asiłka Paŭła Saroku i naradziła dźviuch dačok.
Ciahni-Šturchaj — Naši zvučat imiena
Ciahni-Šturchaj — heta taki hurt pacanoŭ z susiedniaha dvara, jakija prapahandujuć usio dobraje i nastalhujuć pa starych časach.
Składana pryhadać jašče adzin hurt na biełaruskaj estradzie, jaki b byŭ padobnym da ich i nie skatvaŭsia ŭ radyjoroksaŭski šanson.
J:Mors — Nie umiraj
Klip na adzin z hałoŭnych chitoŭ hurta byŭ źniaty ŭ 2006 hodzie. U im Puhač i kampanija nahadvajuć finskich mietalistaŭ, dy i chramakiejny piejzaž składajecca nie z ajčynnych krajavidaŭ.
Volha Barabanščykava — Nie povieriu
Paśla spartovaj karjery Barabanščykava raspačała muzyčnuju. Jaŭhien Čałyšaŭ napisaŭ dla eks-tenisistki niekalki piesień, adna ź jakich, «Nie povieriu», stała paśpiachovaj.
U 2006 hodzie byŭ źniaty klip na hetu pieśniu. Prostaja, navat krychu banalnaja, historyja kachańnia francuza i biełaruskaj śpiavački, jakaja pamyłkova siadaje da jaho ŭ mašynu. Źviarnicie ŭvahu na aŭtobusy MAZ na fonie i aeraport Minsk-1 — ščyra ž źniata.
Čytajcie taksama:
Volha Barabanščykava raskazała pra muža, jaki žyvie ŭ inšaj krainie, biznes i sabak. I pra toje, jak pieršy raz stać mamaj u 39 hadoŭ.
Natalla Tamieła — Tvoi hłaza
My nie zmahli znajści dakładny hod vychadu hetaha klipa, ale atrybuty epochi ŭ vyhladzie videamahnitafona i radyjotelefona vydajuć pieršuju pałovu nulavych.
Natalla Tamieła i siońnia aktyŭna zajmajecca muzyčnaj karjeraj: śpiavaje ŭ arkiestry Michaiła Finbierha i vučyć vakału dziaciej. Taksama maje zvańnie zasłužanaj artystki Biełarusi.
Halina Šyškova — Tri žiźni
Jość padstavy mierkavać, što klipy hurtu J:Mors i Halinie Šyškovaj zdymaŭ adzin i toj ža režysior: chramakiej, niezrazumiełyja piejzažy i hatesa ŭ jakaści adnaho z vobrazaŭ.
Alena Hryšanava — Lubov nie ubivajut
Na biełaruskaj estradzie zaŭsiody było šmat efiektnych dziaŭčat. Alena Hryšanava była adnoj ź ich.
U kamientarach da hetaha klipa možna pračytać pra toje, što formy śpiavački zaminajuć prahladu klipa. Ale, vidać, heta tolki ŭ plus, bo ź siužetam u jaho jość niekatoryja prablemy.
Alaksandr Saładucha — Vinohrad
Voś padaśpieła i ciažkaja artyleryja. Klip na adzin z chitoŭ karala biełaruskaj estrady, jašče bieź biełaśniežnaj uśmieški.
Alaksandr Saładucha, niby dobraje vino, z hadami stanovicca tolki lepšym — u hetym hodzie jon adznačyŭ 60-hadovy jubilej i źbirajecca sabrać stadyjon «Dynama».
Łarysa Hrybalova — Čto-nibud́
U dzievianostyja i nulavyja Łarysa Hrybalova śpiavała ŭ arkiestry Finbierha, była viadučaj na telebačańni i zajmałasia solnaj karjeraj.
Siońnia Hrybalova zajmajecca biznesam — arhanizacyjaj śviatočnych mierapryjemstvaŭ.
Da Vinčy — Bum-Bum
Jak niejak žartavali na TB, biełarusy ličać, što Da Vinčy śpiavajuć pa-italjansku, italjancy — što pa-biełarusku.
Jak by tam ni było, heta klip maje cikavy i zrazumieły siužet u adroźnieńnie ad taho, što my bačyli raniej.
Hanna Šarkunova — Poślednij list
U hetym biezumoŭna pryhožym i jakasnym klipie možna pabačyć navat prodakt-płejsmient: vyrazna ŭ kadry źjaŭlajucca nazvy restarana i strachavoj ahiencyi. Davoli prahresiŭna dla nulavych.
J:Mors — Adlehłaść
Nulavyja naradžali mnostva pop-vykanaŭcaŭ, ale tolki adzinki ź ich śpiavali pa-biełarusku. Na žal, pieśnia «Adlehłaść» — adziny biełaruskamoŭny klip ŭ našaj padborcy.
U im kancertnyja zapisy pieramiažoŭvajucca kadrami biełaruskich słavutaściaŭ, źniatych u modnym styli tajmłaps.
Vieniera — Big Thing
Natalla Kudryna była salistkaj viadomaha ŭ dzievianostyja dueta «Dzi-Bronks & Natali». U nulavyja śpiavačka raspačała solnuju karjeru pad psieŭdanimam Vieniera i vyłučałasia na estradzie ŭ pieršuju čarhu dziakujučy efiektnaj źniešnaści.
Illa Mićko feat LOVE&DOORS — Get Down My Baby
Paśla taho, jak syšła papularnaść Leprykonsaŭ, Illa Mićko šukaŭ novyja muzyčnyja farmaty.
Adnym ź ich stała sproba zapisać sarkastyčny trek u styli pop pra toje, jak dziaŭčyny pytajucca skaryć ceły śviet.
Siońnia Mićko viarnuŭsia da vytokaŭ i vykonvaje staryja pieśni lehiendarnych Leprykonsaŭ.
Čuk i Hiek feat. Nikita — Fijesta!
Biełarusy ŭ 2006-2007 žyli tak choraša, što luby moh sabie dazvolić mersedes i moh zładzić fijestu tady, kali jamu zachočacca.
Sproby kaspłeić amierykanskich repieraŭ u našych realijach siońnia vyhladajuć vielmi śmiešna.
Toples — Pierifierija
A ciapier pahladzicie na advarotny bok miedala — biez tačak i fijest. Suvoraje i nieŭdziačnaje žyćcio pryhažuń, jakija vyrvalisia ź pieryfieryi i vyšejšy śviet.
Sapraŭdny top našaha impravizavanaha čarta!
BONUS. Krambambula — Hości
Siońnia amal niemahčyma sabie ŭjavić, ale kaliści pa BT pakazvali «Rok-Karanacyju», a klipy «Krambambuli» rvali chit-parady dziaržtelekanałaŭ. Absalutny chit na ŭsie časy!
Składana skazać, ci dali plon kvoty na biełaruskuju muzyku i čym jana žyvie siońnia. Radyjo i telebačańnie jak instrumienty prasoŭvańnia užo nie dajuć efiektu. Novyja biełaruskija pop-zorki kštałtu Lery Jaskievič i Cimy Biełaruskich vyraśli ź internetu. Ich słuchajuć tyja, chto nie hladzić televizar, u toj čas jak na samym viersie staviacca zadačy prydumać svajo šou «Hołas» i tak naradzić novych zorak. Ci atrymajecca, pakaža čas.