U NATA raskryli detali «pakieta mier» u Čornym mory
Pakiet mier nakiravany na strymlivańnie pahroz, jakija, na dumku aljansu, zychodziać ad Rasii ŭ Čarnamorskim rehijonie. Čakajecca, što kiraŭniki MZS krain NATA ŭchvalać jaho na samicie ŭ Vašynhtonie, piša RBK.
Pastajanny pradstaŭnik ZŠA pry NATA Kiej Biejli Chatčysan raskryła niekatoryja detali tak zvanaha čarnamorskaha pakieta mier (Black Sea package), jaki rychtujecca dla pryniaćcia na samicie ministrami zamiežnych spraŭ krain — členaŭ NATA. Zajava Chatčysan prahučała na bryfinhu ŭ Vašynhtonie.
Pa słovach Chatčysan, Rasija praciahvaje destabilizavać situacyju ŭ čarnamorskim rehijonie. Jana nazvała «absalutna nieprymalnym» zatrymańnie ŭ Kierčanskim pralivie troch ukrainskich vajennych karabloŭ i ŭtrymlivańnie pad aryštam marakoŭ z hetych sudoŭ. Pastajanny pradstaŭnik udakładniła, što padobnyja «ahresiŭnyja pavodziny» Rasii budzie abmiarkoŭvacca na samicie.
Jana paćvierdziła, što amierykanskija ŭłady sumiesna z NATA raspracavali «pakiet mier» dla strymlivańnia Rasii ŭ Čornym mory. Pa słovach Chatčysan, pakiet mier budzie ŭklučać nazirańnie z pavietra, a taksama adpraŭku bolšaj kolkaści karabloŭ krain NATA ŭ Čornaje mora.
«Havorka idzie pra pakiet, jaki ŭmacoŭvaje raźviedku, pavietranuju raźviedku, a taksama pavialičvajecca kolkaść karabloŭ NATA, jakija adpraŭlajucca ŭ Čornaje mora dla harantyi biaśpiečnaha prachodu ŭkrainskich sudoŭ praz Kierčanski praliŭ u Azoŭskaje mora», — adznačyła jana.
Pa słovach Chatčysan, NATA nieabchodna zrabić tak, kab akvatoryja Čornaha mora była biaśpiečnaja dla krain hetaha rehijonu ad «dakučlivaści Rasii». Rasija raźmiaściła ŭzbrajeńnia ŭ Krymie, pakazała jana, padkreśliŭšy, što Vašynhton ličyć jaho častkaj Ukrainy. «I vielmi važna, kab Rumynija, Bałharyja i Ukraina, hetak ža jak i Hruzija, znachodzilisia pad abaronaj ŭ čarnamorskaj prastory», — dadała pastajanny pradstaŭnik.
