Aŭstryja hatovaja ŭkładać u raźvićcio 4G i 5G nie tolki ŭ biełaruskich haradach, ale i ŭ vioskach
29 sakavika na sustrečy Alaksandra Łukašenki ź Fiederalnym kancleram Aŭstryi Siebaśćianam Kurcam kiraŭniki krain zajavili pra namier pašyrać uzajemadziejańnie ŭ pytańniach raźvićcia suviazi i IKT-siektara.
U składzie aŭstryjskaj delehacyi prysutničaŭ Tomas Arnoldnier, hienieralny dyrektar chołdynhu A1 Telekom Austria Group, daččynaj kampanijaj jakoha źjaŭlajecca biełaruski telekam-apieratar velcom.
Pa słovach Arnoldniera, pačynajučy z 2008 hoda, kali kampanija velcom stała častkaj aŭstryjskaha telekamunikacyjnaha chołdynhu, abjom inviestycyj u nacyjanalnuju ekanomiku pieravysiŭ 670 miljonaŭ jeŭra.
Na praciahu ŭsiaho hetaha času velcom utrymlivaje pazicyi ŭ śpisie najbolš bujnych padatkapłacielščykaŭ Minska i vobłaści: abjom vypłačanych u biudžet padatkaŭ i zboraŭ pieravyšaje 820 miljonaŭ jeŭra.
«Ja vielmi ŭściešany, što značnaja častka pieramoŭ była adviedziena važnaj temie dalejšaha raźvićcia IKT i infrastruktury suviazi. Pieramovy byli vielmi kanstruktyŭnymi, i ja čakaju dalejšaha ich praciahu z metaj maštabnaha razhortvańnia 4G-infrastruktury, a ŭ pierśpiektyvie i 5G nie tolki ŭ haradach, ale i ŭ vioskach», — prakamientavaŭ Arnoldnier vyniki sustrečy.
Aŭstryja źjaŭlajecca adnym ź viadučych inviestycyjnych partnioraŭ Biełarusi i vykonvaje važnuju rolu ŭ madernizacyi šerahu halin ekanomiki krainy, u tym liku drevaapracoŭki, telekamunikacyj, bankaŭskaha siektara. Tolki za minuły hod Aŭstryja inviestavała ŭ Biełaruś kala 300 miljonaŭ dołaraŭ.
«Na moj pohlad, my ŭnieśli istotny ŭniosak u transfarmacyju krainy ŭ značnaha hulca na poli IKT. Bolš za 98% terytoryi Biełarusi zabiaśpiečana pakryćciom našaj 3G-sietki, jakaść jakoj, zychodziačy z majho dośviedu, adna z najbolš vysokich u Jeŭropie, niahledziačy na adny z samych nizkich cen na mabilnuju suviaź. My paćviardžajem našu prychilnaść i hatoŭnaść padtrymlivać dalejšaje raźvićcio krainy ŭ kantekście technałohij 4G i ŭ pierśpiektyvie 5G. U miežach sustrečy było damoŭlena, što ŭ bližejšy čas baki praciahnuć abmierkavańnie ŭzajemnych intaresaŭ na samym vysokim ŭzroŭni i pradumajuć šlachi realizacyi sumiesnych inicyjatyŭ», — dadaŭ hłava A1 Telekom Austria Group.