Łukašenka patrabuje ad Kačanavaj za tydzień znajści zamienu vice-premjeru Rusamu
Michaił Rusy
Kiraŭnik dziaržavy Alaksandr Łukašenka daručyŭ Administracyi prezidenta ŭnieści prapanovy pa kandydaturach na pasadu svajho pamočnika pa Mahiloŭskaj vobłaści i vice-premjera [zaraz zajmajuć Hienadź Łaŭrankoŭ i Michaił Rusy — NN]. Hetaha kiraŭnik zapatrabavaŭ padčas naviedvańnia sielhaspradpryjemstva «Hazavik-Sipakova» ŭ ahraharadku Dabrejka Škłoŭskaha rajona, piša BiełTA.
Łukašenka zastaŭsia niezadavoleny raźvićciom sielskaj haspadarki ŭ Mahiloŭskaj vobłaści, jakaja pa pakazčykach znachodzicca na apošnich miescach.
«Ceły vice-premjer, jaki zahadvaje sielskaj haspadarkaj, kuryruje Mahiloŭskuju vobłaść, upaŭnavažany prezidenta. Pamočnik prezidenta zuby prajeŭ na sielskaj haspadarcy i Mahiloŭskaj vobłaści. Hubiernatar samy prasunuty. I vy zajmajecie apošniaje miesca. Jakuju ja z hetaha pavinien rabić vysnovu?» — zapytaŭ kiraŭnik dziaržavy.
«Tydzień času ŭnieści prapanovy, bo pojdziecie sami siudy pracavać, — papiaredziŭ jon kiraŭnika Administracyi prezidenta Natallu Kačanavu. — Ja vas siudy pasyłaŭ pa kadrach — vy raźbiralisia ŭsiu zimu, ja vas papiaredžvaŭ pra situacyju tut. Ale situacyja nie mianiajecca. Mnie hetyja abiacańni nie patrebnyja».
Alaksandr Łukašenka nahadaŭ, što raniej adkaznym słužbovym asobam daručałasia vypravić stanovišča spraŭ u sielskaj haspadarcy Mahiloŭskaj vobłaści. Adnak bačnych vynikaŭ niama.
«Im było skazana, u tym liku i Damanieŭskamu (kiraŭnik Mahiloŭskaj vobłaści Uładzimir Damanieŭski): nie budzie vypraŭlenaja situacyja na praciahu hoda — budziem prymać miery.
Tamu tydzień terminu, i budziem raźbiracca ź vice-premjeram i pamočnikam, raz nie zmahli pracavać jak treba», — skazaŭ jon.
«Heta niedapuščalna, što vy ŭvieś čas cielapajeciesia. Jość ža ŭzory dobraj pracy (voś heta haspadarka), čamu niama tady vyniku? U vas pravał pa ŭsich napramkach, pry tym nie na paŭpracenta-pracent», — kanstatavaŭ kiraŭnik dziaržavy.
