Polšča, Vienhryja i Čechija sumiesna adznačyli 20-hodździe dałučeńnia da NATA
Premjery Polščy, Vienhryi, Čechii i Słavakii razam ź ministrami abarony hetych krain pryniali ŭdzieł va ŭračystaściach z nahody 20-hodździa dałučeńnia da NATA ŭ Varšavie. Pra heta paviedamlaje ahienctva PAP.
U ramkach uračystaściej z udziełam premjeraŭ Vyšahradskaj čaćviorki Pieršaja tankavaja bryhada Uzbrojenych sił Polščy prademanstravała svaju techniku i ŭzbrajeńnie.
«Niama inšaj takoj siły ŭ hłabalnaj architektury biaśpieki jak Paŭnočnaatłantyčny aljans. Aljans maje ŭnikalnuju rysu, jakaja pryciahvaje ŭsio demakratyi: stvaraje sumiesnuju abaronu, nie zamachvajučysia na suvierenitet asobnych dziaržaŭ-členaŭ», — skazaŭ premjer Polščy Matevuš Maraviecki.
Jon padkreśliŭ, što NATA adaptujecca da novych pahrozaŭ, zhadaŭšy siarod ich vajnu na ŭschodzie Ukrainy i hibrydnuju vajnu Rasii.
«Za 20 hadoŭ NATA stała staŭpom biaśpieki i abaronnych zdolnaściaŭ bolšaści dziaržaŭ Centralna-Uschodniaj Jeŭropy, jakija da taho byli za žaleznaj zasłonaj» — zajaviŭ premjer Čechii Andrej Babiš, paabiacaŭšy, što ŭ 2024 hodzie jaho kraina budzie tracić na abaronu 2% ad VUP.
Polšča, Vienhryja i Čechija, jakija ŭ minułym byli siabrami Arhanizacyi Varšaŭskaj damovy, adnačasova ŭstupili ŭ NATO 12 sakavika 1999 hoda. Słavakija dałučyłasia da aljansu praź piać hadoŭ paśla hetaha.
