Jakija asnoŭnyja «fiški» Hałubickaj Puščy?
Pra słaŭnuju i niezasłužana zabytuju miaścinu piša Kastuś Šytal.
1. Vielizarny, pad 700 kvadratnych kiłamietraŭ, lasny masiŭ z pryhožymi krajavidami, bahaty na hryby i jahady.
2. Miesca žycharstva miadźviedziaŭ, jakija čujucca haspadarami ŭ Puščy. Va ŭsich kutkach Puščy ich raz-poraz sustrakajuć. Daŭniej u Puščy byŭ zaścienak Miadźviežy Ostup, ciapier jość ahrasiadziba «Miedviežij Uhoł».
3. U Puščy i vakoł jaje — niekalki dziasiatkaŭ azioraŭ. Voziera Doŭhaje, samaje hłybokaje ŭ Biełarusi — samo saboj, papularnaje miesca ŭ biełaruskich dajvieraŭ. Voziera Šo, u naźvie jakoha ŭhadvajucca varažskija karani. Voziera Ivieś, na bierazie jakoha, pavodle biełaruskich hieadezistaŭ, znachodzicca centr Jeŭropy. Voziera Miažužała, akružanaje z usich bakoŭ puščaj.
4. Miesca bajavoj słavy paŭstancaŭ 1863 hoda. U Puščy farmavaŭsia paŭstancki atrad Hienryka Dmachoŭskaha — udzielnika troch paŭstańniaŭ, jaki žyŭ na emihracyi ŭ ZŠA i ŭpryhožvaŭ svaimi pracami budynak Sienata ŭ Vašynhtonie — ale viarnuŭsia vajavać i paloh na ŭskrainie Puščy na bierazie voziera Miadzieła. Na mahile staić kamienny kryž.
5. Miesca z daŭniaj historyjaj. Na ŭskrajkach Puščy archieołahi adkryli pasieliščy časoŭ niealitu. Na puščanskaj race Šošy znachodziać rymskija i arabskija maniety, fibuły kultury pieraharodčatych emalaŭ. U Puščy jość kurhannyja mohilniki, staryja haradziščy (u tym liku Zamak — umacavanaje pasielišča časoŭ Połackaha kniastva kala Śviły, i Šviedskaja Hara kala vioski Biruli).
Jazep Drazdovič pryśviaciŭ Hałubickaj puščy ceły albom hrafiki.
6. Pušča - miesca naradžeńnia i śmierci biełaruskaha mastaka Jazepa Drazdoviča. U zaścienku Puńki na ŭskrainie Puščy jon naradziŭsia. Ciapier tam tolki prydarožny kryž, kamień z pamiatnaj šyldaj i hihanckaja lipa, jakuju Drazdovič adlustravaŭ na svaim malunku. A pachavany jon, čałaviek, jaki abyjšoŭ pieššu blizkija i dalokija vakolicy, za dva kiłamietry ad miesca svajho naradžeńnia, na viaskovych mohiłkach u Małych Davydkach.
7. Pušča — dobraje miesca dla adpačynku. U Puščy niama vialikich pasieliščaŭ, jaje nie prarazajuć šumnyja aŭtatrasy. Ale da Puščy lohka dajechać i mašynaj i ciahnikom (dva chutkija ciahniki i adzin načny štodnia ź Minska da stancyi Padśville). U samoj Puščy — niebłahija darohi, jakimi možna niaśpiešna prajechać Pušču naskroź. Adpačyć možna na šmatlikich ahrasiadzibach u puščanskich vioskach (Marhi, Babrujščyna, Doŭhaje, Chrały, Ivieś, Skrabatuny, Biruli, Čarnica).
Taksama praz Pušču možna prapłyć na bajdarkach — voziera Doŭhaje — r. Daŭžanka — voziera Šo — raka Šoša — voziera Plisa (dalej možna płyć pa race Mniuta praź miastečka Łužki i dalej pa Dzisioncy da horada Dzisna).
8. Vakoł Puščy — vioski i miastečki ź cikavymi pomnikami architektury i historyi — Padśville, Plisa, Zadarožža, Ziabki, Prazaroki, Kubličy, Sielišča, Byčki (radzima Vasila Bykava), Tumiłavičy, Dziedzina. Krychu dalej ad Puščy — Hłybokaje, Ušačy, Dokšycy.
A voś ja pasprabavaŭ nakreślić miežy Puščy. Kali paŭnočnuju i zachodniuju miažu vyznačyć lohka — tam, dzie zakančvajecca les, to z uschodniaj i paŭdniovaj miažoj była prablema. Na poŭdni Pušča miažuje ź lasami Biarezinskaha zapaviednika i ja nakreśliŭ miažu pa darozie R29. Na ŭschodzie abmiežavaŭsia darohaj Ziabki — Ušačy. Ale moža, maje sens šyrej hladzieć na paniaćcie Hałubickaja Pušča — i tady moža vyjści płošča nie 700, a 1.000 i bolej kvadratnych kiłamietraŭ.
