U Bychavie skončyŭ žyćcio samahubstvam padletak
Budynak Doma kultury, dzie paviesiŭsia chłopiec, fota Radyjo Svaboda
Śledčym kamitetam raspačata kryminalnaja sprava pavodle artykuła «Daviadzieńnie da samahubstva». Pra heta paviedamiła Svabodzie aficyjny pradstaŭnik SK Julija Hančarova.
«Dziela vyśviatleńnia ŭsich abstavinaŭ zaviedziena i rasśledujecca kryminalnaja sprava pavodle častki 2 artykuła 145 Kryminalnaha kodeksa. Śledčyja dapytvajuć siabroŭ, znajomych, piedahohaŭ. Čakajucca vyniki ekśpiertyzaŭ, u tym liku kompleksnaj psichołaha-psichijatryčnaj», — adznačyła Julija Hančarova.
Cieła 16-hadovaha Mikity M. znajšli paviešanym na pažarnaj leśvicy Doma kultury ranicaj 4 lutaha. Žychary horada havorać pra «niaščasnaje kachańnie» i «kanflikty ŭ himnazii».
«Ludziej naściarožyła, što chłopiec paviesiŭsia ŭ centry horada i što jahony ŭčynak vyhladaje jak pomsta niekamu», — vykazałasia adna z žycharak rajcentra.
Dyrektar himnazii Ludmiła Jaršova admaŭlajecca niešta kazać pra zdareńnie. U adździele adukacyi Bychaŭskaha rajvykankama taksama ŭstrymalisia ad kamientaroŭ, bo «idzie śledstva».
Viadoma, što hadavali Mikitu maci i babula. Bychaŭskaja rajonka «Majak Prydniaproŭja» apublikavała spačuvańni im u suviazi z trahičnaj śmierciu Mikity ad imia administracyi i piedahahičnaha kalektyvu himnazii, a taksama baćkoŭskaha kamiteta.
Za apošnija paŭhoda heta druhaja śmierć niepaŭnaletniaha ŭ Bychaŭskim rajonie. U kastryčniku na ŭroku fizkultury pamior vučań treciaha kłasa Łutčyckaj škoły. U chłopčyka było chvoraje serca.