Sud ahučyŭ prysud byłomu načalniku Hrodzienskaha abłzdaroŭja
Były kiraŭnik Hrodzienskaha abłasnoha kamiteta pa achovie zdaroŭja Andrej Stryžak asudžany na 7,5 hoda pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Taksama jamu zabaranili zajmać peŭnyja pasady terminam na 5 hadoŭ. Taki prysud vynies siońnia sud Centralnaha rajona Minska. Rašeńnie abviaściła sudździa Julija Hustyr, piša Tut.by
Akramia taho, sud zadavoliŭ hramadzianski pazoŭ ab spahnańni ź miedyka «sumy nieabhruntavana atrymanaj vyhady», heta značyć sumy chabaraŭ na sumu 38 tysiač 105 rubloŭ i 34 kapiejki. U Stryžaka ŭ košt pahašeńnia škody kanfiskujuć 8 siarebranych i załatych źlitkaŭ, 6 pamiatnych maniet, 4 karciny, nahrudnyja znaki, antykvarnuju manietu i nabor z 7 čajnych łyžak.
Napiaredadni prakuror Maksim Čuprys prasiŭ sud pryznačyć byłomu čynoŭniku 7,5 hoda pazbaŭleńnia voli. U apošnim słovie sam Stryžak kazaŭ: raskajvajecca, prosić uličyć jaho jaŭku z pavinnaj na imia kiraŭnika KDB i supracoŭnictva sa śledstvam.
Andreja Stryžaka sudzili za chabar. Pa viersii śledstva, čatyry hady jon atrymlivaŭ hrošy ad biznesmienaŭ, jakija pastavili (abo źbiralisia) miedtechniku ŭ balnicy i dyspansiery - u jakaści «padziaki» za svoječasovy raźlik za tavar, usiaho chabaraŭ na bolš čym 30 tysiač dalaraŭ.
