Hanna Norkus (Šarejka) pryznana Čałaviekam hoda Viciebščyny
Hiendyrektar Viciebskaj brojlernaj ptuškafabryki Hanna Norkus stała «Čałaviekam hoda Viciebščyny — 2018». Hanarovaha zvańnia kiraŭnik pradpryjemstva ŭdastojena za vysokija dasiahnieńni ŭ vytvorčaj dziejnaści: pad jaje kiraŭnictvam ptuškafabryka pakazvaje stabilny finansavy vynik pracy, piša BiełTA.
BiełTA dadaje, što pryznańnie spažyŭcoŭ paćviardžajuć prestyžnyja ŭznaharody: pa vynikach minułaha hoda brend «Hanna» adznačany premijaj spažyvieckaha pryznańnia «Narodnaja marka», a ŭ prafiesijnym konkursie «Brend hoda — 2018» staŭ uładalnikam siarebranaha miedala ŭ naminacyi «Pradukcyja ź miasa ptuški».
Nahadajem, što ŭ žniŭni 2014 hoda sienatar Hanna Šarejka była źmieščana ŭ SIZA.
Kryminalnaja sprava ŭ dačynieńni da jaje i jašče šaści supracoŭnikaŭ fabryki i pradstaŭnikoŭ kampanij-pastaŭščykoŭ słuchałasia ŭ Viarchoŭnym sudzie čatyry miesiacy: ź lutaha 2016 hoda. Usim im było pradjaŭlena abvinavačvańnie ŭ złoŭžyvańni ŭładaj abo słužbovymi paŭnamoctvami (art. 18, č. 2 art. 424 KK). Pa viersii śledstva, Šarejka, budučy hiendyrektaram Viciebskaj brojlernaj ptuškafabryki, ustupiła ŭ karupcyjnuju zmovu z Valdemarasam Norkusam, dyrektaram litoŭskaj firmy «Dajmas» i zasnavalnikam kampanii «Ruskom-R» (jon abvinavačany ŭ saŭdzielnictvie), praź jakuju išli pastaŭki u Viciebsk kambikarmoŭ i karmavych dabavak.
Prysud byŭ vyniesieny ŭ červieni 2016 hoda. Hanna Šarejka prysudžanaja da 2,5 hoda pazbaŭleńnia voli sa štrafam 150 bazavych vieličyniaŭ. Valdemaras Norkus atrymaŭ 2 hady pazbaŭleńnia voli i štraf u 150 bazavych vieličyń.
Pry hetym usie abvinavačanyja, supracoŭniki ptuškafabryki, vyzvalenyja ŭ zale suda z ulikam adbytaha pakarańnia i amnistyi ŭ suviazi z 70-hodździem Pieramohi. Norkus vyjšaŭ na volu praź miesiac, a nieŭzabavie Šarejka i Norkus pažanilisia.
Cikava, što ŭ 2011—2014 hadach Viciebskaja brojlernaja ptuškafabryka była prybytkovaj, a 2014-y hod skončyła i zusim u pieršaj dvaccatcy samych prybytkovych AAT krainy (150 młrd rubloŭ čysty prybytak). Pa vynikach 2015 hoda, kali Šarejka była ŭ SIZA, jaje čystyja straty skłali 50 młrd rubloŭ.
Pa vyzvaleńni ź SIZA Hanna Norkus zdoleła viarnuć ptuškafabrycy lidarskija pazicyi.
