Deputaty byłych Viarchoŭnych Savietaŭ zaklikali hramadzian «zhurtavacca vakoł niezaležnaści»
Deputaty Viarchoŭnych Savietaŭ Biełarusi CHII (1990—1996) i CHIII sklikańniaŭ (1996—…) 9 lutaha sabralisia ŭ Minsku napiaredadni 25-hodździa pryniaćcia Kanstytucyi Biełarusi. Inicyjataram spatkańnia staŭ były śpikier Viarchoŭnaha Savieta Miečysłaŭ Hryb. Pa vynikach sustrečy jany pryniali zvarot. Prapanujem jaho vašaj uvazie.
«Šanoŭnyja suajčyńniki, hramadzianie Respubliki Biełaruś!
15 sakavika 1994 hoda Viarchoŭny Saviet Biełarusi 12-ha sklikańnia paśla vialikich i nadzvyčaj napružanych sprečak, jakija adbyvalisia na praciahu amal čatyroch hadoŭ, pryniaŭ pieršuju Kanstytucyju niezaležnaj Respubliki Biełaruś. Pavodle zaćvierdžanaha 15 sakavika 1994 hoda Asnoŭnaha zakona našaj dziaržavy byli vybranyja pieršy jaje Prezident, lehitymny skład parłamienta — Viarchoŭnaha Savieta 13-ha sklikańnia, sfarmiravanyja novyja orhany vykanaŭčaj ułady i Kanstytucyjny sud Respubliki Biełaruś.
U samym pieršym artykule našaha Asnoŭnaha Zakona zafiksavany pałažeńni, stratehična važnyja dla isnavańnia ŭsioj našaj nacyi ciapier i ŭ budučyni:
«Respublika Biełaruś — unitarnaja demakratyčnaja sacyjalnaja pravavaja dziaržava.
Respublika Biełaruś vałodaje viaršenstvam i paŭnatoj ułady na svajoj terytoryi, samastojna ažyćciaŭlaje ŭnutranuju i źniešniuju palityku.
Respublika Biełaruś abaraniaje svaju niezaležnaść i terytaryjalnuju cełasnaść, kanstytucyjny ład, zabiaśpiečvaje zakonnaść i pravaparadak».
U artykule 18 Kanstytucyi niedvuchsensoŭna vyznačana:
«Respublika Biełaruś u svajoj źniešniaj palitycy zychodzić z pryncypaŭ roŭnaści dziaržaŭ, nieprymianieńnia siły abo pahrozy siłaj, nieparušnaści miežaŭ, mirnaha ŭrehulavańnia sprečak, nieŭmiašańnia va ŭnutranyja spravy i inšych ahulnapryznanych pryncypaŭ i normaŭ mižnarodnaha prava.
Respublika Biełaruś stavić za metu zrabić svaju terytoryju biaźjadziernaj zonaj, a dziaržavu — niejtralnaj».
Takim čynam, asensoŭvajučy siabie paŭnavartasnym subjektam supolnaści narodaŭ śvietu, paćviardžajučy svaju prychilnaść da ahulnačałaviečych kaštoŭnaściaŭ, hruntujučysia na svaim nieadjemnym pravie na samavyznačeńnie, abapirajučysia na šmatviakovuju historyju raźvićcia biełaruskaj dziaržaŭnaści, Viarchoŭny Saviet Respubliki Biełaruś u pryniataj Kanstytucyi śćvierdziŭ suvierenitet i niezaležnaść našaj dziaržavy jak najvialikšuju kaštoŭnaść dla kožnaha hramadzianina Biełarusi.
Niezaležnaść Biełarusi — heta nabytak nie tolki siońniašniaha pakaleńnia, ale i našych prodkaŭ; jana taksama naležyć našym naščadkam. Suvierenitet krainy nie moža być abmiežavany abo skasavany praz rašeńni lubych dziaržaŭnych asob i orhanaŭ, navat praz refierendum.
Niezaležnaść i dziaržaŭny suvierenitet adkryvajuć šlach da roskvitu Ajčyny, spryjajuć umacavańniu stasunkaŭ našaj krainy ź mižnarodnaj demakratyčnaj supolnaściu narodaŭ.
Zhodna z art. 3 našaj Kanstytucyi, «adzinaj krynicaj dziaržaŭnaj ułady i nośbitam suvierenitetu ŭ Respublicy Biełaruś źjaŭlajecca narod». U suviazi z hetym my, deputaty Viarchoŭnaha Savieta 12-ha i 13-ha sklikańniaŭ, zaklikajem usich hramadzian krainy i ŭsich suajčyńnikaŭ za miažoj zhurtavacca vakoł dasiahnutaj Niezaležnaści našaj Baćkaŭščyny i zrabić usio mahčymaje, kab na viaki zachavać i zamacavać suvierenitet našaj dziaržavy!»
