Bellingcat znajšoŭ dadatkovyja paćvierdžańni suviazi PVK «Vahniera» z HRU i minabarony Rasii
Pra heta idzie havorka ŭ rasśledavańni Bellingcat.
Najmitam rasiejskaj pryvatnaj vajennaj kampanii (PVK) «Vahnier» vydavali zamiežnyja pašparty z paśladoŭnymi numarami ŭ adnym i tym ža maskoŭskim pašpartnym stale, jaki raniej vydaŭ fejkavyja dakumienty aficeram HRU Miškinu (Piatrovu) i Čapihu (Bašyravu).
Śledčyja spasyłajucca na apublikavanyja SBU na pres-kanfierencyi ŭ Kijevie śpisy pasažyraŭ pasažyrskich samalotaŭ Minabarony Rasii, jakija pieravozili najmitaŭ, jakija pracavali na PVK «Vahnier». U chodzie hetych rejsaŭ, jak paviedamlajecca, za druhuju pałovu 2018 hoda było pieravieziena 1012 najmitaŭ u Sudan, CAR i ŭ inšyja krainy Afryki.
SBU apublikavała try śpisy najmitaŭ PVK «Vahniera». U pieršym śpisie byli imiony, daty i miescy naradžeńnia, a taksama numary ŭnutranych i zamiežnych pašpartoŭ šasnaccaci mierkavanych najmitaŭ, siamiora ź jakich, jak paviedamlałasia, mieli zamiežnyja pašparty, vydadzienyja adnoj «sieryjaj» ŭ 2015 hodzie, a jašče 9 atrymali takija ž pašparty ŭ 2017 hodzie.
Varta adznačyć, što, choć u śpisie paznačany miescy naradžeńnia z usioj Rasii, orhan vydačy pašpartoŭ va ŭsich vypadkach — maskoŭskaje adździaleńnie 770001.
Raniej paviedamlałasia, što hety pašpartny stoł, viadomy jak adździaleńnie UFMS 770-001, rehularna vykarystoŭvajecca dla vydačy ŭnutranych pašpartoŭ aficeram HRU pad prykryćciom, naprykład padazravanym u atručvańni ŭ Sołśbiery, a taksama dvum nie źviazanym ź imi aficeram HRU pad prykryćciom, abvinavačanych u Čarnahoryi ŭ padrychtoŭcy pieravarotu ŭ 2016 hodzie.
Kamanda Bellingcat i inšyja arhanizacyi paśla vyśvietlili, što hety pašpartny stoł taksama vykarystoŭvaŭsia dla vydačy pašpartoŭ roznym znakamitym zamiežnikam, jakija atrymali rasijskaje hramadzianstva, naprykład francuzskamu akcioru Žeraru Depardźje.
U trecim, samym doŭhim śpisie, utrymlivajucca tolki imiony i daty naradžeńnia 149 mierkavanych najmitaŭ PVK «Vahniera», jakija, pa zajavie SBU, znachodzilisia ŭ Sudanie ŭ kancy 2018 i pačatku 2019 h. U SBU ŭdakładnili, što pieršyja dva śpisy — frahmienty vialikaha śpisu z 149 čałaviek.
Kamanda Bellingcat pravieryła śpisy praz bazu dadzienych rasijskich ŭnutranych avijapieralotaŭ, jakaja jość u adkrytym dostupie. Z adzinaccaci sprobaŭ im udałosia znajści siem imionaŭ sa śpisu SBU. Ź ich try byli znojdzienyja pa numarach ŭnutranych pašpartoŭ, a jašče čatyry pa adpaviednaści proźvišča, imia i daty naradžeńnia.
U atrymanym nabory dadzienych dziŭna było toje, što dla ŭsich siemiarych u zapisach ab unutranych avijapieralotach fihuravała adno i toje ž miesca pryznačeńnia. Usie siem ździajśniali davoli mała avijapieralotaŭ, adnak kožny ź ich ździejśniŭ choć by adzin pieralot, dzie punktam pryznačeńnia byŭ aeraport Paškoŭski.
Paškoŭski — asnoŭny aeraport horada Krasnadar na poŭdni Rasii. Jak paviedamlali rasijskija žurnalisty-śledčyja, asnoŭny treniravalny łahier PVK «Vahniera» znachodzicca ŭ rajonie chutara Molkina. Molkina raźmiaščajecca prykładna za 30 chvilinaŭ jazdy ad aeradroma Paškoŭski.
Mnohija ź ich lotali tolki ŭ hety aeraport. Jak praviła, mieli miesca pieraloty ŭ Paškoŭski z Maskvy ci Sankt-Pieciarburha, jakija išli za pieralotami ŭ Maskvu ci Sankt-Pieciarburh z roznych rasijskich rehijonaŭ, zvyčajna adpaviednych miescu naradžeńnia pasažyra.
Akramia taho, daśledčykam udałosia vyjavić rejsy, na jakich pa niekalki čałaviek sa śpisu SBU padarožničali hrupami ŭ aeraport Paškoŭski abo ź jaho.
Dvoje z takich pasažyraŭ lotali pa ŭkazanych u śpisach zamiežnych pašpartach tolki pamiž Sankt-Pieciarburham i Paškoŭskim.
Raniej śviedčańniem pra suviazi PVK «Vahniera» i HRU stała pierachoplenaja telefonnaja razmova vysokapastaŭlenaha aficera HRU z kiraŭnikom i «ciozkaj» PVK pa pazyŭnyja Dźmitryjem «Vahnieram» Utkinym.
Raniej kamanda Bellingcat vyjaviła, što aficer HRU, jaki braŭ udzieł u razmovie — pałkoŭnik Aleh Ivańnikaŭ, jaki ŭ 2014 hodzie byŭ adpraŭleny na ŭschod Ukrainy i spryčyniŭsia da pastaŭki rasijskaj rakietnaj ustanoŭki «Buk», jakaja źbiła MH17. Źmiest razmovy śviedčyć ab tym, što «Vahnier» niepasredna padparadkoŭvajecca pałkoŭniku Ivańnikavu.
U Sankt-Pieciarburhu znachodzicca biznesmien Jaŭhien Pryhožyn, šyroka viadomy ŭ ŚMI jak «kuchar Pucina».
Pryhožyn akazvaje kiejterynhavyja pasłuhi Minabarony Rasii i inšym dziaržaŭnym orhanam, a taksama ličycca sponsaram PVK «Vahniera».
Takim čynam, rasśledavańnie Bellingcat paćviardžaje, što asoby ź śpisu SBU — sapraŭdy najmity abo asoby, inšym čynam źviazanyja z PVK «Vahniera».
Vyniki pravierki śpisaŭ paćviardžajuć taksama, što rasiejskija ŭłady nie prosta cierpiać apieracyi «Vahniera» za miažoj (jakija pa rasiejskamu zakanadaŭstvu źjaŭlajucca niezakonnymi), a aktyŭna spryjajuć praviadzieńniu takich niezakonnych apieracyj pad kamandavańniem Ministerstva abarony Rasii, u pryvatnaści HRU.
