U Biełarusi budzie adzin vid mahistratury
Takuju zajavu pa vynikach narady ŭ kiraŭnika dziaržavy zrabiŭ ministr adukacyi Biełarusi Ihar Karpienka, piša Źviazda
«Damovilisia, što ŭ nas budzie adzinaja mahistratura. Da niadaŭniaha dnia ŭ nas pracavała dva vidy mahistratury — navukova-aryjentavanaja i praktyka-aryjentavanaja. Zaraz budzie adzin vid mahistratury, jaki budzie nakiravany na padrychtoŭku navukova-aryjentavanych śpiecyjalistaŭ pad inavacyjnyja kanstruktarskija raspracoŭki, a taksama pad piedahahičnuju dziejnaść. Peŭnaja praca ŭ hetym kirunku ŭžo pačata, my stvaryli madel takoj mahistarskaj padrychtoŭki. Zaraz pracujem nad navučalnymi płanami i prahramami», — zajaviŭ ministr.
Naprykład, uzbujnieny navukova-aryjentavanyja, inavacyjnyja, piedahahičnyja śpiecyjalnaści mahistratury, padpisany zahad pa nabory na ich. «Mahistratura pavinna rychtavać kadry, jakija ŭ pierśpiektyvie buduć upłyvać na inavacyjnaje raźvićcio našaj ekanomiki, na navukovuju śfieru i na piedahahičnuju dziejnaść», — dadaŭ Ihar Karpienka.
Pavodle jaho słoŭ, Prezident cikaviŭsia chodam vykanańnia rašeńniaŭ Respublikanskaha piedahahičnaha savieta, tym, jak vykonvajucca jaho asabistyja daručeńni. Uvaha była ŭdzielena pytańniam jakaści ahulnaj siaredniaj adukacyi, źmiestu vyšejšaj adukacyi ŭ Biełarusi. Sapraŭdy, prahramy byli abnoŭlenyja. Pa novych prahramach siońnia zajmajucca vučni ad 1-aha da 8-aha kłasaŭ, pastajanna manitorycca praces ich ŭkaranieńnia.
«Prahramy mohuć udaskanalvacca, mohuć papraŭlacca tyja ž padručniki, ale jość prablemy, źviazanyja z tym, jak razhortvajecca hetaja prahrama niepasredna ŭ adukacyjnym pracesie, — zajaviŭ ministr adukacyi. — Jak nastaŭnik vykarystoŭvaje toj materyjał, jakija chatnija zadańni jon zadaje, u jakich abjomach, jak vyłučaje niejkija hałoŭnyja pazicyi, jak padaje školnikam. Heta značyć, pytańnie staić u farmiravańni mietadyčnaj kultury nastaŭnika».
U hetaj suviazi majecca damoŭlenaść ab tym, što buduć pavyšać kvalifikacyju nastaŭnikaŭ praź śpiecyjalnyja kursy, praviadzieńnie mietadyčnych siekcyj pa pradmietach. Ihar Karpienka pryznaŭ, što pakul ministerstva nie paśpiavaje vydavać za novymi padručnikami mietadyčnyja dapamožniki.
«Akramia hetaha, my damovilisia, što jašče raz vierniemsia da struktury vučebnaha płana i pahladzim na tuju abaviazkovuju kolkaść vučebnych hadzin u tydzień, jakaja vykarystoŭvajecca dla tych ci inšych kłasaŭ u sistemie ahulnaj siaredniaj adukacyi», — raspavioŭ jon. Viadoma ž, hetyja rašeńni buduć prymacca z ulikam mierkavańnia piedahahičnaj hramadskaści, śpiecyjalistaŭ.
Na naradzie zakranuli i pytańni vynikovaj atestacyi ŭ sistemie školnaj adukacyi. U tym płanie, što ispyty ŭ škole prachodziać u adnoj formie, a ŭstupnaja kampanija ŭ VNU — zusim u inšaj. Viadoma, heta stvaraje peŭnyja prablemy z punktu hledžańnia padrychtoŭki vučnia. Usio budzie abjaŭlacca zahadzia, kab była mahčymaść adaptacyi, prainfarmavaŭ ministr.
Što tyčycca źmiestu adukacyi VNU, Ihar Karpienka źviarnuŭ uvahu, što surjozna skaracili nabory studentaŭ u vyšejšyja navučalnyja ŭstanovy. U pieršuju čarhu, nabor ažyćciaŭlajecca pad patrebnaści ekanomiki i kankretnych zakazčykaŭ. Kali ŭ 2011 hodzie ŭ nas navučałasia 430 tysiač studentaŭ, to na siońniašni dzień u nas ich 283 tysiačy.
Razam z tym, pavialičylisia nabory na šerah śpiecyjalnaściaŭ, jakija zapatrabavany ekanomikaj — naprykład, IT-śpiecyjalnaści.
Pavodle słoŭ ministra adukacyi, surjozna vyvučajecca struktura navučalnych płanaŭ i prahram dla tych ci inšych śpiecyjalnaściaŭ VNU. Darečy, usiaho ŭ našaj sistemie vyšejšaj adukacyi 380 śpiecyjalnaściaŭ. «My prychodzim da vysnovy, što jość niekatoryja paŭtory, — skazaŭ jon. — Tamu nieabchodnaja peŭnaja karekciroŭka».
Zaraz viadziecca ŭdaskanaleńnie sacyjalna-humanitarnaha błoka prahram VNU, majecca rabočaja hrupa. «Ja dumaju, da kanca hoda my praviadziem naradu zahadčykaŭ kafiedraŭ hramadskich navuk sistemy vyšejšaj navučalnaj adukacyi, dzie prymiem adpaviednyja rašeńni pa źmianieńni padychodaŭ vykładańnia sacyjalna-humanitarnaha błoka dyscyplin», — dadaŭ ministr adukacyi.
Na naradzie źviartałasia ŭvaha na praktyka-aryjentavanuju padrychtoŭku śpiecyjalistaŭ, uzajemadziejańnie z zakazčykami kadraŭ. «My padzialajem hetyja pazicyi kiraŭnika dziaržavy, mnohaje ŭžo zroblena ŭ hetym kirunku, ale treba budzie jašče niekatoryja pytańni dakarektavać i ŭkaranić u praktyku adukacyjnaha pracesu», — adznačyŭ jon.
Ihar Karpienka padkreśliŭ, što sistemie adukacyi ŭ našaj krainie nadajecca vialikaja ŭvaha — u tym liku niepasredna z boku kiraŭnika dziaržavy, urada. Niesumnienna, heta śfiera, jakaja chvaluje nie tolki vučniaŭ i studentaŭ, ale i ich baćkoŭ, inšych svajakoŭ. Takim čynam, hramadstva zacikaŭlenaje ŭ tym, kab hetaja sistema raźvivałasia jakasna i pastupalna, dasiahała surjoznych vynikaŭ, ličyć ministr.
