Kruhłasutačnaja achova i siamiejny sklep. Žurnalisty pakazali mahiłu syna Janukoviča ŭ anieksavanym Krymie
Rašeńnie ab vydzialeńni ziamli na mohiłkach prymaje asabista kiraŭnik Śviata-Nikolskaha chrama.
Syn byłoha prezidenta Ukrainy Viktara Janukoviča — Viktar Janukovič-małodšy pachavany na paŭnočnaj uskrainie akupavanaha Rasijaj Sievastopala, jaho mahiła padobnaja na budučy siamiejny sklep.
Sam pomnik zrobleny z čornaha marmuru, kala mahiły stajać dźvie łavački i vysadžany niekalki sosnaŭ. Miesca pachavańnia znachodzicca pad kruhłasutačnaj achovaj, taksama jano abstalavanaje dźviuma kamierami, dvuma lichtarami i hučnahavarycielem. Akramia hetaha mahiłu achoŭvaje vartavy sabaka.
Jak adznačajecca, na Brackich miemaryjalnych mohiłkach pachavanyja 50 tysiač udzielnikaŭ Krymskaj vajny, jakija abaraniali Sievastopal u 1854-55 hadach. Mahiła Janukoviča-małodšaha vykanana ŭ tym ža styli, što i mahiły hrafa, hienierała-inžyniera Eduarda Totlebiena i rasijskaha hienierała Ściapana Chrulova, jakija źjaŭlajucca hierojami Krymskaj vajny.
Pa słovach nahladalnicy, Janukovič pachavany na mohiłkach, jakija naležać Śviata-Nikolskamu chramu. Hety asobny ŭčastak z začynienymi varotami pryznačany dla novych pachavańniaŭ: śviataroŭ i viernikaŭ carkvy, niadaŭna pachavali muža słužycielki chrama, jakoha zabili ŭ Siryi.
U svaju čarhu skarbnik chrama Viera Alaksandraŭna udakładniła, što na hetych mohiłkach chavajuć tolki tych, chto chadziŭ u Śviata-Mikolski chram, chto davaŭ achviaravańnie chramu, ludziej, jakich asabista viedaŭ protaijerej Hieorhij Palakoŭ, duchoŭnik ŭsiaho Čarnamorskaha fłotu Rasii, da jakoha asabista pryjazdžaŭ i prezident Rasii Uładzimir Pucin, i Viktar Janukovič.
«Małodšy Janukovič tut pachavany nie tamu, što jon Janukovič. A tamu, što jany akazvali vialikuju dabračynnuju dapamohu dla chrama. Jany pryjazdžali siudy. I kali zdaryłasia hora, i jany źviarnulisia da baciuški za dapamohaj, kab pachavać jaho, baciuška nie admoviŭ, tamu što dzieci Janukoviča dapamahli adramantavać dachi chrama», — skazała skarbnica.
U toj ža čas kaštuje miesca na hetych mohiłkach niamała.
«Piać nuloŭ. A pierad nulami ličba staić, ja nie viedaju. Jak jany tam malujuć ličby… U apošni raz chavali vajakaŭ, jakija zahinuli ŭ Čačni, za ich «bašlaje» Ministerstva abarony. Tam nie prabicca. Jamu telefanujuć, baciuška vyłučaje dla niejkich supier-pupierludziej», — raspavioŭ achoŭnik mohiłak.
Pa słovach miascovych žycharoŭ, na mohiłkach časta bačać maci Viktara — Ludmiłu Janukovič. Jana žyvie ŭ Krymie i dahladaje za mahiłaj.
«Usie chłopcy byli vyratavanyja, jon usich vyratavaŭ, jon usich vyšturchnuŭ, a sam nie paśpieŭ, tamu što mašyna ŭžo adyšła daloka. Ciačeńniem adniesła ad pałonki. I jon vybraŭsia z mašyny, ale zhubiŭ u chałodnaj vadzie aryjentacyju. Adzin jon z usich zahinuŭ. Usich vyratavaŭ, usie chłopcy maładyja, jany byli na pachavańni», — raspaviała skarbnica chrama padrabiaznaści hibieli Janukoviča-małodšaha.
Pavodle ŚMI, 20 maja 2015 hoda ŭ Rasii, na voziery Bajkał, u 200 mietrach ad bieraha vyspy Alchon pad lod pravaliŭsia aŭtamabil «Folksvahien». U vyniku hetaha incydentu zahinuŭ 33-hadovy Viktar Janukovič-małodšy. Piaciora pasažyraŭ aŭto, pa infarmacyi rasijskaj palicyi, vyratavalisia.
Cieła syna Janukoviča, pavodle mas-miedyja, na čartary nakiravali ŭ Simfieropal ź Irkuckaj vobłaści, a zatym pieravieźli ŭ Sievastopal. Žurnalisty paviedamlali, što Janukovič prysutničaŭ na pachavańni syna.
