U Drazdach-2 vystavili na prodaž adzin z samych niezvyčajnych katedžaŭ krainy — šmat FOTA
U bazach ahienctvaŭ nieruchomaści źjaviłasia novaja prapanova — samy niezvyčajny katedž u elitnym rajonie Viaśninka, bolš viadomym jak «Drazdy-2».
U kvartale žyvuć niekalki dziasiatkaŭ pradstaŭnikoŭ łukašenkaŭskaj elity — ad miljaniera Alaksandra Šakucina da ministra ŭnutranych spraŭ Ihara Šunieviča, — jakim razdali ziamlu amal zadarma.
Adnak sustrakajucca i katedžy biznesmienaŭ. Niekatoryja ź ich vykuplali ziamlu ŭ viaskoŭcaŭ pa rynkavaj canie. Takija damy redka vystaŭlajucca na prodaž. Adnak adzin z katedžaŭ pa vulicy Viaśninka ŭsio ž šukaje novaha haspadara. Praŭda, ciapierašni ŭłaśnik navat pryblizna nie paznačyŭ canu zbudavańnia.
Hety dom vyłučajecca siarod inšych niezvyčajnym ciomnym fasadam. Miascovyja žychary niekalki hadoŭ tamu raskazali «Našaj Nivie», što ich pałochaje hety bałtyjska-skandynaŭski prajekt — maŭlaŭ, vonkava padobny na krematoryj. Jany ž adznačali, što tut žyvie siamja pradprymalnika, jaki zajmajecca juvielirnym biznesam.
Adnak architektarka Alaksandra Bajaryna vysoka aceńvała niezvyčajny katedž:
«Sučasnyja materyjały adpaviadajuć formie i kampazicyi. Navat pry takoj zmročnaści stanoŭča pracuje manalitnaje vobraznaje rašeńnie abjemu jak sukupnaści ŭsich dastupnych pozirku elemientaŭ. Usio idealna! Kali jašče ŭdała vykanany łandšaftny dyzajn, prajekt možna adnieści da najlepšych u krainie».
Jak vyjaviłasia, unutry dom nie mienš aryhinalny, čym zvonku.
«Architektarami byŭ abrany styl eklektyka — spałučeńnie art-deko i chaj-teka. Šmatsłajovy fasad ablicavany naturalnym kamieniem — słancam. Usio azdableńnie — ź Italii», — havorycca ŭ abjavie. Darečy, płošča doma — 450 kvadratnych mietraŭ.
Ci padabajecca vam?
Ad Abielskaj da Jarmošynaj: 112 uładalnikaŭ katedžaŭ u Drazdach, poŭny śpis
