Rasijski palitołah Pijantkoŭski: Bolšaść biełarusaŭ suprać anšlusu — heta histaryčnaja zasłuha Łukašenki. Supraciŭ ahresaru budzie masavym
Rasijski libieralny palitołah Andrej Pijantkoŭski na sajcie kasparov.ru padvodziŭ vyniki 2018 hoda. Praz usio intervju prachodziła tema mahčymaha dałučeńnia Biełarusi da Rasii.
Analityk miarkuje, što ŭ Pucina skončyłasia ciarpieńnie ŭ dačynieńni Biełarusi. «Łukašenka pavinien u najbližejšy čas zrabić svoj vybar. Albo padparadkavacca, i tady jamu zabiaśpiečać cichuju i spakojnuju staraść, a moža być, navat i synoŭ uładkujuć, albo ź vielizarnaj dla siabie ryzykaj praciahnuć toje, čym jon zajmajecca ŭžo bolš za 20 hadoŭ — supraciŭ kramloŭskamu anšlusu.
Łukašenka — čałaviek avanturnaha składu, nadzvyčaj ambicyjny, ja zusim nie vyklučaju, što jon moža abrać šlach zmahara za zachavańnie biełaruskaj niezaležnaści. I ja nie sumniavajusia, što bolšaść biełarusaŭ jaho ŭ hetym padtrymajuć. Pytańnie tolki ŭ tym, da kaho bolš łajalnyja biełaruskija siłavyja struktury: da svajho prezidenta abo ahientaŭ Maskvy, jakija, biezumoŭna, ich prajmajuć źvierchu danizu», — ličyć Pijantkoŭski.
Admietna, što padziei 1994 hoda rasijski palitołah nazyvaje pieravarotam i ličyć, što mienavita Maskva dapamahła Łukašenku pryjści da ŭłady ŭ Biełarusi.
«Bolšaść biełaruskaha naroda nie padtrymlivaje anšlus. Histaryčna heta zasłuha Łukašenki, jaki čverć stahodździa zachoŭvaŭ niezaležnaść Biełarusi. Maskva zrabiła niedarečnuju pamyłku, kali zamianiła starych savieckich funkcyjanieraŭ nakštałt Šareckaha i Kiebiča na Łukašenku. Tych ludziej joj by ŭdałosia ŭciahnuć u Rasijskuju Fiederacyju ŭ jakaści šaści abłaściej.
A Łukašenka zmahaŭsia. Naturalna, jon rabiŭ heta dziela siabie, dla ŭtrymańnia asabistaj ułady. Ale za hetyja hady ŭ Biełarusi vyrasła nacyjanalnaja samaśviadomaść, jakoj u 1991 hodzie nie było z-za šerahu pryčyn. Ciapier supraciŭ ahresaru budzie masavym», — miarkuje palitołah.
Taksama Pijantkoŭski vykazaŭ dumku, što ekanamičny šantaž Maskvy Biełaruś zmoža vytrymać, kali źvierniecca pa dapamohu da «kitajskich sponsaraŭ».
