«U mianie miesiačnyja»: brend Ku pačaŭ vyrablać majki z pravakacyjnymi vykazvańniami pa-biełarusku
U instahramie źjaviŭsia novy brend adzieńnia pad nazvaj «Ku | Majki z vyšyŭkaj».
Admietnyja hetyja futbołki tym, što słovy na ich vyšyvajucca pa-biełarusku. Pakul u najaŭnaści brenda — majki ź fieminityvami (u dadzienym vypadku — z nazvami prafiesij ŭ žanočym rodzie), a taksama vyšyŭka biełaruskich maciukoŭ i takich fraz jak, naprykład: «U mianie miesiačnyja».
Stvaralnicy «Ku» pakul chavajuć svaje imiony ŭ sakrecie, zaprašajučy źviartać uvahu nie na ich asobu, a na prapanovu.
«Majki ź fieminityvami ŭ niejki momant stali vielmi papularnymi va Ukrainie. Nam chočacca, kab i ŭ našych dziaŭčat była mahčymaść z honaram nasić svaje prafiesii pad sercam u žanočym rodzie. Abaviazkova na rodnaj movie. Akramia taho, my suprać tem-tabu nakštałt seksu ci funkcyjanavańnia arhanizma, tamu zaprašajem usich svabodnych žančyn śmieła nasić na sabie majki z frazaj «U mianie miesiačnyja» ŭ tyja samyja dni, kab źniać usie niepatrebnyja pytańni pra vaš stan i nastroj».
Słovy na majkach vyšyvajucca na mašyncy, ale ŭ chatnich umovach, tamu, kažuć pradstaŭniki «Ku», usio robicca «kraftava i ź luboŭju».
Nahadajem, u vieraśni biełaruskaja krama suvieniraŭ «Johurtny tort» prezientavała aŭtarskuju sieryju pryntoŭ dla futbołak, a taksama kiepki pad nazvaj «Fieminizm». Ale za seksizm ich žorstka raskrytykavała hramadskaść, i futbołki tak i nie pabačyli śviet.
