Žančyny i pieśni — 16 najlepšych muzyčnych videa hoda ad dziaŭčat-muzykaŭ
Kali ŭ vas usio mienš volnaha času i jaho nie staje navat, kab pahladzieć čarhovuju sieryju supierhierojskich pryhodaŭ ci naminantaŭ na «Oskar», hety śpis — toje, što treba. Pakul jaki-niebudź Alfonsa Kuaron burčyć pra niepaŭnavartasnaść chatnich i mabilnych ekranaŭ (a paśla pradaje pravy na prakat stužki Netflix, pasprabuj raźbiarysia), klipy ŭžo stali ciapierašnim i budučym mastactva. Raniej hledačy MTV ŭmieli viesialicca tolki pad sieksicckija videa z top-madelami, ciapier jany kudy bolš raznastajnyja, i kožny moža znajści niešta na svoj hust. Tak što hladzicie, prytancoŭvajcie i dzialiciesia svaimi lubimymi videa ŭ kamientaryjach.
16. Alice Bag - 77 (Skot Staki)
Abrydłaja praca — nadta papularny siužet. Uzhadajma chacia b klip ź laniŭcam i kryvavaj bojkaj za mahčymaść pieršym pajści dachaty, albo historyju pra toje, čym abaročvajucca dziciačyja mary ci budni padčas depresii. Ale hety klip, zrežysiravany stvaralnikam kultavaj dziciačaj pank-pieradačy, — badaj što samy drajvovy. Žančyny buntujuć. I nie z aby jakoj pryčyny: jany atrymlivajuć mienš za mužčyn za tuju samuju pracu, i pryjšoŭ čas narešcie niešta źmianiać. Zaprošany hość — vakalistka Garbage Šyrli Mensan.
15. alyona alyona — Hołovi (Saša Pryłucki)
Ukrainskaja interniet-siensacyja — dziaŭčyna, jakaja adzinaasobna reabilituje pravincyjnaść i alapavaty kič. Ale tolki paśla hetaha minimalistyčnaha videa stała vidavočna, što jana hatovaja vyjści z barykadaŭ treš-mastactva i vykazvacca ŭsurjoz. I nie tamu, što Alona ŭzhadvaje Kamiu, a tamu što aholenaść klipu jak najlepš adpaviadaje aholenaści dumak, da jakoj jana imkniecca. Toje, što prahladaŭ u takoha niakidkaha videa nie mienš, trochi viartaje vieru ŭ ludziej.
14. CupcakKe - Duck Duck Goose
Nie pakazvajcie hetaje videa dzieciam. Ja surjozna, naŭrad ci vy hatovyja tłumačyć im, čamu nielha atrymać samatyk na nastupnaje śviata, kali ź videa vynikaje, što jany nastolki kłasnyja. Pieśnia navat nazvanaja pavodle dziciačaj hulni i raspaviadaje ŭ tym liku pra toje, jak Kapkejk čytaje dziciačyja knižki padčas seksu, ale pa sutnaści heta porna-kamiedyja dla darosłych.
13. Sløtface - Nancy Drew (Ida Nievierdał i Oda Olsen Lishard)
Nie viedaju, ci mnohija z nas pamiatajuć knižki pra detektyŭnyja pryhody dziaŭčyny Nensi. Mnie zaŭsiody byŭ bolš daspadoby Tomiek. Ale ŭ hetym animacyjnym videa biezdakornaja, talenavitaja i pryhožaja hierainia padletkavych ramanaŭ — uvasobleny siurealistyčny kašmar, jaki treba pieramahčy.
12. Celine Dion - Ashes (Devid Lič)
Ja tak i nie zrazumieŭ zachapleńnia Dedpułam, jaho vadaspadam pošłych žartaŭ i razbureńniem čaćviortaj ściany (nahadaju, takija štuki Baster Kitan rabiŭ jašče ŭ časy niamoha kino), zatoje kali jon vyjšaŭ na abcasach, kab padtrymać tancami vialikuju, ale padzabytuju pop-dyvu padčas vystupu ŭ pustoj zali, to za čatyry chviliny apraŭdaŭ svajo isnavańnie. Chacia, kaniečnie, hałoŭnaja zorka tut sama Sielin, pra što jana i nahadvaje Dedpułu ŭ finale.
11. Frankie Cosmos - Apathy (Tom Šarplinh)
Hołas amal nikoli nie zapisvajecca dla videa sinchronna, tamu razvasableńnie, błukańnie hołasu — adzin z samych kłasičnych pryjomaŭ. U hetym zabaŭnym i sumnym videa na pieśniu Frenki Kosmas (psieŭdanim Hrety Kłajn) dva hurty majuć adnolkavuju nazvu, śpiavajuć adnu i tuju ž pieśniu, i kaniečnie ž, moža zastacca tolki adzin.
10. Hinds - New For You (Karłota Kasials)
Madrydski hurt, udzielnicy jakoha, vidavočna, lubiać futboł, choć i śpiavajuć pra kachańnie. Čym nie ideja dla videa — źniać, jak ludzi zajmajuccy tym, što lubiać. Zdorava, što ŭ hulcoŭ atrymlivajecca radavacca tak zaraźliva, nibyta sam schadziŭ pahulać ź siabrami.
9. Hurray For The Riff Raff - Pa'lante (Krys Mierk)
Pra heta davoli mała raspaviadali ŭ navinach, ale letaś Puerta Ryka mocna paciarpieła ad urahanu Maryja. Praź dzieviać miesiacaŭ mnohija žychary ŭsio jašče žyli biez vady i elektryčnaści. Śpiavačka Alinda Siehara choć i žyvie zaraz u ZŠA, pachodzić z puertarykanskaj siamji, ale jana napisała nie žałaślivuju pieśniu pra niahody rodnaj krainy, a sapraŭdny antysientymientalny himn umieńniu žyć, niahledziačy ni na što.
8. Julieta Laso - Fantasmas (Łukrecyja Martel)
Ni mudrahielisty siužet, ni nieprystojna vialiki biudžet nie nieabchodnyja, kab stvaryć trapny kantrapunkt dla pieśni. Voś i Łukrecyja Martel, choć i adna z samych admietnych sučasnych kinarežysiorak, vyrašaje litaralna ŭvasobić źmiest pieśni (fantasmas — pryvidy) arhientynskaj śpiavački. Jana źviartajecca da samaha kłasičnaha sposabu — nakładańnia vobrazaŭ, jakim karystalisia jašče režysiory fantazij kštałtu Mieljesa. Pa praŭdzie, ničoha lepšaha jašče i nie prydumali.
7. Taylor Swift - Delicate (Džozief Kan)
Tejłar Śvift — davoli śpiecyfičny fienomien. U ZŠA jaje muzyku lubiać nie ŭsie, ale asabliva čamuści biełyja rasisty (vyrasła na fiermie, aryjka ci niešta nakštałt taho). Ale takija voś klipy dapamahajuć pieraadoleć kulturnaje nieparazumieńnie. Tym bolš, pracavaŭ nad im adzin z tytanaŭ muźvidea i režysior adnaho ź lepšych filmaŭ hodu Džozief Kan.
6. FKA twigs - Welcome Home (Spajk Džons)
Pomnik vynachodlivaści Talii Barniet (FKA twigs). Ja tak i nie razabraŭsia, što za pradukt chacieli pradać z dapamohaj hetaj rekłamy, pamiataju tolki taniec i toje, jak muzyka (trek Andersana Paka) pierastvaraje śviet vakoł tancorki. Realizm samaha vysokaha hatunku.
5. St. Vincent - Fast Slow Disco (Zieŭ Dyns)
Zieŭ Dyns čaściej zdymaje dla mietał-hurtoŭ, moža, tamu ŭ klipie na hetuju dyska-pieśniu akazałasia tak šmat baradatych zdaraviakoŭ u skury i sadamazachisckaj zbryi. Praŭdzivaja vakchanalija, ale viadzie rej tut nie sieks, a muzyka i taniec. Kali b realnyja viečaryny ŭ kłubach byli choć addalena padobnyja da hetych, ja b nie načavaŭ doma.
4. ROSALIA - MALAMENTE (Cap.1 Augurio) (CANADA)
Pieśnia Razalii — soniečnaje spałučeńnie fłamienka, pop-muzyki i R&B. Jak i pieśnia, klip nie maje peŭnaha siužetu, heta mahičny nabor hukaŭ i vobrazaŭ: tancy ŭ hruzaviku, pryvidnaja karyda ŭ spartzali, bajki i skiejtbordy.
3. SOPHIE - Faceshopping (Safi i Aaran Čan)
Budźcie aściarožnyja, heta videa źmiaščaje mirhajučyja vobrazy i niebiaśpiečnaje dla ludziej, što pakutujuć na epilepsiju. Ale imavierna, što peŭny dyskamfort jano moža vyklikać i va ŭsich astatnich. Heta nievypadkova, ale vuścišnyja transfarmacyi tvaru i naviaźlivyja teksty-słohany zaviaršajucca zichotkim katarsisam albo jaho iluzijaj.
2. Sophie Hunger - Tricks (Macilda Fin)
Macilda Fin nie lubić tłumačyć svaju pracu, i maje racyju: u jaje klipie jość śmierć, padarožža ŭ časie, honki (vydatna źniatyja!) pa ŭkrainskich lasach, dzie ŭsie ludzi navokał čamuści žančyny, i dziŭny finał. Usio adbyvajecca pa łohicy snu — ci muzyčnaha videa.
Sophie Hunger - Tricks from Pomp&Clout on Vimeo.
1. Tierra Whack - Whack World
Samy karotki poŭnafarmatny albom hodu, u jaki ŭcisnuta stolki idej, što jaho videa-viersija nahadvaje karjeru Devida Boŭi, ucisnutuju ŭ čverć hadziny (i piatnaccać piesień). Kalejdaskop pačućciaŭ, dumak i vobrazaŭ ad 22-hadovaj repieršy, katoraja vydatna demanstruje, što hetak zvanaja klipavaje myśleńnie nie aznačaje prymityŭnaści. Chaciełasia b, kab budučynia była mienavita takoj.
Whack World by Tierra Whack from Thibaut Duverneix on Vimeo.
