Muzyčny telekanał RU.TV zdymaje sieryju intervju ź viadomymi biełarusami ŭ restaranie «Pajedziem, pajadzim» u Kurapatach
U aficyjnym instahramie restarana «Pajedziem, pajadzim» źjaviłasia infarmacyja, što na terytoryi ustanovy prachodziŭ zapis pieradačy «Biaźmiežna ščyra» telekanała «RU.TV. Biełaruś». U jakaści haściej byli zaprošanyja dyryžor Viktar Babarykin, śpiavačka Nastaśsia Cichanovič, udzielnik dziciačaha Jeŭrabačańnia ad Biełarusi Daniel Jastremski, a taksama deputat Pałaty pradstaŭnikoŭ Alaksandr Bahdanovič.
Intervju Viktara Babarykina. Fota ź instahrama RU.TV. Biełaruś.
Restaran «Pajedziem, pajadzim» maje nieadnaznačnuju reputacyju, jon pabudavany ŭ starych miežach achoŭvajemaj zony la ŭročyšča Kurapaty. Ad pačatku červienia aktyvisty patrabujuć zakryćcia jadalni i viartańnia starych miežaŭ. Hramadskaść aburaje, što pobač ź miescam masavych zabojstvaŭ znachodzicca zabaŭlalnaja ŭstanova.
RU.TV — svojeasablivaja televiersija «Ruskaha radyjo». «RU.TV — pieršy muzyčny telekanał u śviecie, jaki ŭvasobiŭ novy pryncyp viaščańnia i vykarystoŭvaje ŭ svaim efiry videaklipy vyklučna na ruskaj movie», — tłumačać jaho stvaralniki.
Telekanał uvachodzić u skład chołdynha «Ruskaj miedyjahrupy» i maje rehistracyju ŭ Biełarusi. Adpaviedna, na jaho praz dva hady buduć raspaŭsiudžvacca patrabavańnie mieć u efiry 30% nacyjanalnaha kantentu.
Hutarki ŭ Kurapatach dla telekanała zapisvała viadučaja i śpiavačka Julija Alaksandrava. My spytali ŭ jaje pradziusarki Julii Filipavaj, čamu miescam dla zdymak byŭ abrany mienavita hety restaran.
Julija Filipava: U nas nie była zadača nazirać za dziejnaściu restarana — była zadača źniać pieradačy.
«NN»: Vas nie zasmučała, što prosta za płotam restarana znachodziacca kryžy i mahiły ludziej?
JUF: Dy nie, heta ich sprava… U Minsku luby dom možna ŭziać, i jon maje svaju historyju. My nie akcentujem na hetym svaju ŭvahu.
«NN»: Vy nie viedajecie, što ad leta tam praciahvajecca supraćstajańnie?
JUF: Nie, nie viedała. Mnie prosta spadabaŭsia dyzajn. Vam, moža, varta ŭ samoha restarana pytacca.
«NN»: Vy čuli što-niebudź pra Kurapaty?
JUF: Nie.
«NN»: Vy žyviecie ŭ Minsku i nikoli nie čuli pra Kurapaty?
JUF: Nie čuła. Vy taksama možacie pra niešta nie viedać, što viedaju ja.
Adnoj z haściej pieradačy była śpiavačka Nastaśsia Cichanovič. «NN» raspytała artystku, ci razumieła jana, u jakoje miesca idzie dla zapisu pieradačy. «Ja nie jechała ŭ restaran, ja nie jechała zabaŭlacca tudy, jeści. Ja jechała tudy jak na pracu, na zdymku.
Ja ž nie viasielle tudy jechała adznačać. Ja prosta ŭziała ŭdzieł u intervju, jakoje nie maje dačynieńnia da hetaha miesca. I mnie zdajecca, što tut jość roźnica.
Heta rabočy praces, ci zabaŭlałka. Ja tolki ŭ apošni momant zrazumieła, što heta toje samaje skandalnaje miesca, ja nie duža mnoha siadžu ŭ sacyjalnych sietkach», — skazała Nastaśsia.
«Kali b mianie zaprasili vystupić tam ci ja tam śviatkavała niešta, to heta zusim inšaje. Ja jechała tudy biez zadniaj dumki, viedała łakacyju, niejki tam kiłamietr kalcavoj. Navat nie atajasamlivała z Kurapatami», — adkazała śpiavačka.
Ci viedaje Nastaśsia Cichanovič pra Kurapaty?
«Heta miesca vialikaha bolu dla mnohich ludziej. Ja nie viedaju, čym kiravalisia ŭłaśniki restarana, kali adkryvali jaho ŭ hetym miescy. Heta važna i maje značeńnie. Usio, što adnosicca da historyi, chaj toje Vialikaja Ajčynnaja vajna ci represii. U kožnaha z nas u siamji jość represavanyja. U mianie ŭ siamji ŭ 1937 hodzie taksama zabrali pradziadulu, i nichto nie viedaje, što ź im zdaryłasia. Tak što, napeŭna, nie treba ŭ takich miescach adkryvać zabaŭlalnyja ŭstanovy».
Błohier Maksim Puškin admoviŭsia ŭdzielničać u pieradačy na terytoryi restarana «Pajedziem, pajadzim». «Kali daviedaŭsia, dzie heta budzie adbyvacca, to admoviŭsia. Ja b nie chacieŭ znachodzicca na terytoryi hetaj ustanovy — heta maja pryncypovaja pazicyja», — skazaŭ Maksim u kamientary «NN».
Deputat Pałaty pradstaŭnikoŭ Alaksandr Bahdanovič admoviŭsia ad kamientaroŭ.
