Stała viadoma, z kim Biełaruś pazmahajecca za ŭnikalnaje prava trapić na Jeŭra-2020
Papiarednie zapłanavana, što ŭ sakaviku 2020 hoda zbornaja Biełarusi pa futbole praviadzie paŭfinalny matč dyvizijona D Lihi nacyj suprać zbornaj Hruzii. Naša kamanda zhulaje ŭ haściach.
fota Pressball.by
U inšym paŭfinalnym matčy pazmahajucca Makiedonija i Kosava.
Praź niekalki dzion pieramožcy hetych dźviuch sustreč zhulajuć pamiž saboj finał dyvizijona D — mienavita hetaja kamanda trapić na Jeŭra-2020. Dzie budzie pravodzicca matč, vyrašyć losavańnie.
Skład hetych par (Hruzija — Biełaruś i Makiedonija — Kosava) sfarmiravaŭsia pa vynikach hrupovaha raŭnda dyvizijona D Lihi nacyj. Kožnaja ź pieraličanych zbornych abahnała troch supiernikaŭ. Kaŭkazcy pieramahli ŭ svajoj hrupie najbolš pierakanaŭča, biełarusy — najmienš upeŭniena.
Matčy z Hruzijaj, a paśla, spadziajemsia, z Makiedonijaj ci Kosava — unikalnaja mahčymaść dla biełaruskich futbalistaŭ trapić na čempijanat Jeŭropy upieršyniu ŭ historyi. Zrešty, nivodzin z našych supiernikaŭ taksama nie ŭdzielničaŭ u top-turnirach.
Aproč taho, u sakaviku — listapadzie 2019 hoda projdzie zvyčajnaja kvalifikacyja na Jeŭra-2020. Losavańnie adbudziecca 2 śniežnia. U adboračnym turniry biełarusam buduć supraćstajać našmat macniejšyja zbornyja za tyja, ź jakimi daviałosia hulać u Lizie nacyj.
Tearetyčna mahčyma, što Biełaruś, Hruzija, Makiedonija ci Kosava harantujuć sabie miesca na čempijanacie Jeŭropy pa vynikach hetaj kvalifikacyi.
Tady ich miescy ŭ zapłanavanych paŭfinałach Lihi nacyj zojmuć inšyja zbornyja (zamiest Biełarusi — Luksiemburh, zamiest Hruzii — Kazachstan, zamiest Makiedonii — Armienija, zamiest Kosava — Azierbajdžan). U takim razie paŭfinalnyja pary mohuć być źmienienyja.
