Apošniaje intervju Izraileviča pierad aryštam: Maci kazała, što moj jazyk — moj vorah
Za paru tydniaŭ da zatrymańnia skandalny biznesmien Arkadź Izrailevič daŭ intervju YouTube-kanału «Bariencieva. Intiervju». U im jon raspavioŭ pra šumichu vakoł restarana ŭ Kurapatach, svajo abvostranaje pačućcio spraviadlivaści i toje, čamu treba atrymlivać asałodu ad žyćcia.
Pavodle Arkadzia Izraileviča, lepš za ŭsio ŭ jaho atrymlivajecca atrymlivać asałodu ad žyćcia:
— U mianie samy lepšy dzień — siońnia. Nam u dziacinstvie dziaŭbli pra śvietłuju budučyniu, my žyli ŭ zaŭtrašnim dni. Nichto nie viedaje, što budzie zaŭtra, davajcie siońnia žyć.
Bolšaja častka hutarki była pryśviečana skandału vakoł restarana «Pajedziem, pajadzim» u Kurapatach. Arkadź Izrailevič abvierh svaju datyčnaść da vałodańnia hetaj ustanovaj:
— Restaran mnie nie naležyć i nikoli nie naležaŭ. Uładalniki — maje blizkija siabry: dva amierykancy, para rasijan, Zajdes (asnoŭny ŭłaśnik restarana Leanid Zajdes, — zaŭv. NN).
Jon zajaviŭ, što nie bačyć ničoha drennaha ŭ budaŭnictvie restarana pobač ź miemaryjalnym kompleksam Kurapaty:
— Ja ŭsio žyćcio pražyŭ nasuprać kinateatra «Mir», vokny hladzieli na Vajskovyja mohiłki. Ja išoŭ praz Vajskovyja mohiłki ŭ škołu, ja išoŭ praz Vajskovyja mohiłki dadomu, kali my prahulvali uroki, my prahulvali ich na Vajskovych mohiłkach. Inšy prykład — Jama. Usim viadoma, što tam źniščana Minskaje hieta, tam źniščana piać tysiač jaŭrejaŭ. Čamu hetyja ludzi nie stajali tam, kali budavali haścinicu Hilton?
Arkadź Izrailevič ličyć, što staŭ hierojem skandałaŭ praz svajo abvostranaje pačućcio spraviadlivaści.
«Maci kazała, jazyk moj — vorah moj», — adznačyŭ jon i pryznaŭsia, što stan vajny jamu bližejšy za stan miru.
U intervju Izrailevič raspavioŭ, što ŭpieršyniu za doŭhija hady sutyknuŭsia ŭ Biełarusi z bytavym antysiemityzmam.
— Kali ja sprabavaŭ u sacyjalnych sietkach, u čatach adstajać svoj punkt hledžańnia, to na druhoj replicy pisali, maŭlaŭ, «morda ž**oŭskaja, kudy lezieš, jedź u svoj Izrail», — adznačyŭ jon.
Biznesmien pryznaŭsia, što pra Kurapaty jon viedaŭ nie zaŭsiody.
— Mnie vielmi soramna. Ja pražyŭ dziesiać hadoŭ u Drozdavie, i tolki na piatym hodzie daviedaŭsia, što jość Kurapaty. Choć ja karenny minčuk. Ja čuŭ, što jany dzieści jość, potym mnie skazali: «Pojdziem, pakažu, jość łaŭka, na jakoj Klintan i Šuškievič siadzieli».
