Polšča budzie kuplać haz u ZŠA na 20% tańniej, čym u RF
Polskija ŭłady sprabujuć vyrvacca z «hazavych kajdanoŭ», — piša Business Insider Polska.
Polskaja naftahazavaja kampanija PGNiG padpisała 20-hadovy kantrakt na pastaŭku amierykanskaha zvadkavanaha pryrodnaha hazu, piša polskaja redakcyja Business Insider. Štohod kraina zmoža atrymlivać 2 młn. tonaŭ zvadkavanaha hazu, što adpaviadaje 2,7 młrd. kubamietraŭ paśla rehazifikacyi (pieraŭtvareńnia zvadkavanaha hazu ŭ zvyčajny).
Pavodle ŭmovaŭ kantraktu, Polšča zmoža nie tolki sama spažyvać amierykanski haz, ale i volna pierapradavać jaho na rynku. Pry hetym cana paliva amal na 20% mienšaja za tuju, jakuju vystaŭlaje Polščy Hazprom.
«U płanie cany i ŭmovaŭ pastavak tut niama navat nijakaha paraŭnańnia z uschodnim partnioram»,— zajaviŭ Piotr Voźniak, prezident PGNiG.
Letaś Polšča ahułam spažyła 17 młrd. kubamietraŭ hazu, pavodle PGNiG.
Atrymlivajecca, što amierykanskija pastaŭki zvadkavanaha hazu zabiaśpiečać niedzie šostuju častku patrebaŭ krainy.
Dola rasijskaha hazu ŭ ahulnym abjomie zakupak u Polščy ŭžo ŭpała da 75%, u toj čas jak dola zvadkavanaha hazu ŭvieś čas raście, pavodle kampanii. PGNiG žadaje jašče bolš źnizić dolu rasijskaha hazu z dapamohaj pastavak z ZŠA, Narviehii i Kataru.
Biełaruś dahetul zakuplaje ŭvieś haz u Rasii, choć i imkniecca źmienšyć svaju «hazavuju» zaležnaść, u tym liku praz pabudovu AES. Ale, u paraŭnańni z nami, Polšča vałodaje vialikaj pieravahaj, bo maje naŭprostavy vychad da mora — zvadkavany haz, jaki pačynaje składać kankurencyju tradycyjnym pastaŭkam «pa trubie», pieravozicca admysłovymi marskimi tankierami.
