Detoks-prahramy karysnyja dla arhanizma? Raźbirajemsia ŭ modnym kirunku zdarovaha charčavańnia
Słova dyjeta bolš nie modnaje. Usio čaściej možna pačuć, što niechta raspačaŭ detoks-prahramu na dzień/try dni/tydzień/.
Davajcie raźbiaromsia, što takoje detoks i dla čaho hetyja prahramy patrebnyja našamu arhanizmu?
Taksiny — čamu ich usie bajacca?
Toje, što ŭsich nas atakujuć złosnyja taksiny, my viedajem daŭno. Taksiny — heta škodnyja dla arhanizma jady, jakija pilnujuć nas paŭsiul: u niajakasnaj vadzie i ježy, u tannaj kaśmietycy i bytavoj chimii, u pavietry (asabliva ŭ vialikich haradach), u lekach i navat u adzieńni i mebli. Mienavita praź ich my drenna vyhladajem, drenna siabie adčuvajem. Jany vinavatyja ŭ našych stresach i drennym nastroi. Ahulnaja mlavaść i abyjakavaść da žyćcia — vina ŭ tym liku taksinaŭ.
Kaniečnie, arhanizm nie durań i sam viedaje, jak pazbaŭlacca ad usiaho niepatrebnaha. Ale kali jaho ŭłasnych resursaŭ užo niedastatkova, na dapamohu prychodziać raznastajnyja prahramy pa ačyščeńni, abo detoks-prahrama, jakaja zapuskaje naturalnyja funkcyi pa ačyščeńni i adnaŭleńni našaha cieła.
U čym sutnaść detoksu?
Hałoŭnaje ŭ luboj prahramie ačyščeńnia, u tym liku i ŭ detoksie, — nie parušać praviły. Kali ich vykonvać, možna praviesci sapraŭdnuju hienieralnuju ŭborku ŭ svaim arhaniźmie. Da nieparušnych pravił adnosiacca peŭny režym charčavańnia, vyklučeńnie škodnych straŭ i dadańnie praduktaŭ, jakija spryjajuć pracesu detaksikacyi.
Da praduktaŭ, jakija dadajucca ŭ racyjon padčas pracedury detoksu, adnosiacca raznastajnyja zialonyja kaktejli i smuzi, śviežavycisnutyja soki, zialonyja sałaty, supy-piure, harodnina, jakaja padvierhłasia minimalnaj termičnaj apracoŭcy, a taksama fizičnyja praktykavańni, SPA-pracedury, zdarovy son, pasłableńnie i źviadzieńnie da minimumu faktaraŭ, jakija spryjajuć zabrudžvańniu arhanizma, i stresaŭ.
Rekamiendujecca taksama ŭžyvać šmat vadkaści ŭ vyhladzie prostaj vady ci travianoj harbaty. Pad zabaronaj akazvajucca ŭsie paŭfabrykaty, pradukty ź biełaj muki i prysmaki, fastfud, haziroŭki i soki z pakietaŭ, smažanaja i tłustaja ježa, miasnyja i małočnyja pradukty, a taksama časam takija niavinnyja, zdavałasia b, pradukty, jak bulba i banany.
U čornym śpisie detoks-prahramy — ałkahol, kureńnie i litry duchmianaj kavy, jakuju vy pryzvyčailisia pić ciaham dnia. U vyniku vašymi najlepšymi siabrami pavinny stać chłarafił, antyaksidanty, enzimy, vitaminy i klatčatka, a vorahami aficyjna abviaščajucca škodnyja tłuščy, pustyja vuhlavody, farbavalniki i ŭzmacnialniki hustu, u tym liku ŭsie pradukty, jakija źmiaščajuć cukar i sol.
Ale! Kali vy budziecie mužnymi i vytrymajecie heta, to vy pazbaviciesia ad lišniaj vahi i alerhii, palepšycca koler tvaru i skury, vyrašacca prablemy sa stravavańniem, vy nabudziecie mocny imunitet, vydatny nastroj i zarad enierhii.
Navošta rychtavacca da detoksu?
Adrazu z hałavoj u detoks kidacca nie varta: arhanizm moža prosta nie spravicca z novaj dla siabie zadačaj. Padčas padrychtoŭki treba pastupova admaŭlacca ad zabaronienych praduktaŭ i dadavać jak maha bolš rekamiendavanych: naprykład, zamianić bieły chleb na ziernievy, bieły rys — na karyčnievy. Niepasredna sama prahrama detoksu moža zajmać ad niekalkich dzion da niekalkich miesiacaŭ — tut usio zaležyć ad vašych metaŭ, mahčymaściaŭ i siły voli. Na vychad z detoksu spatrebicca kala tydnia, na praciahu jakoha treba dadavać zvykłyja pradukty i nazirać za reakcyjaj svajho arhanizma. Kali vam raptam stała dyskamfortna paśla ŭžyvańnia, da prykładu, chleba, to heta dakładny znak taho, što lepš i zusim ad jaho admovicca.
Najlepšy čas dla prachodžańnia detoksu — jakraz pačatak vosieni abo viasny. Mienavita ŭ hety čas arhanizm, jak śćviardžajuć śpiecyjalisty i dyjetołahi, biez asablivych ciažkaściaŭ pazbaŭlajecca ad usiaho lišniaha.
Jakija detoks-prahramy prapanujuć u Minsku?
Treba skazać, što detoks-prahramy i navat detoks-padarožžy daŭno papularnyja va ŭsim śviecie. Kali vy majecie dastatkova volnaha času i hrošaj, možna vypravicca, naprykład, u hory. Tam, prykładna za 5000 jeŭra na tydzień vam prapanujuć lohkija stravy, śviežaje pavietra, prahułki pa harach, johu, siłavyja praktykavańni, miedytacyju, tancy, masaž i inšyja pryjemnyja SPA-pracedury.
Apošnim časam prahramy roznych biełaruskich sanatoryjaŭ prapanoŭvajuć prajści 10-dzionnuju detoks-prahramu pad nahladam śpiecyjalistaŭ-dyjetołahaŭ. Prahrama praduhledžvaje śpiecyjalnaje mieniu i kompleks štodzionnych praktykavańniaŭ. Košt padobnaj prahramy vahajecca ad 150 da 300 rubloŭ u sutki!
Kali času i hrošaj na kurorty ŭ vas niama, ale pazbavicca ad nienavisnych taksinaŭ ŭsio ž taki chočacca, na dapamohu pryjduć śpiecyjalna raspracavanyja prahramy charčavańnia, jakija ŭ Minsku rastuć jak hryby paśla daždžu.
Naprykład, u prahramie Healthy Plan vam prapanujuć vybrać płan zdarovaha charčavańnia, zychodziačy z taho, chočacie vy prosta ačyścić arhanizm ci jašče schudnieć pry hetym. Vy štodnia budziecie atrymlivać kompleks śviežych, dyjetyčnych straŭ na dom abo ŭ ofis. Košt takoj prahramy prykładna kala 40 rubloŭ u dzień. Abo bolš biudžetny varyjant — prahrama OxDetoks. Set na pracoŭny dzień kaštuje 18 rubloŭ.
Taksama vialikuju papularnaść ciapier nabiraje detoks na smuzi. Naprykład, prahrama SMART-DETOX. Prahrama prapanoŭvaje piać fruktova-jahadnych smuzi i smuzi z aharodniny na kožny dzień dla kamfortnaj detaksikacyi i nasyčeńnia arhanizma vitaminami i minierałami. Kaštuje smuzi-detoks 45 rubloŭ na adzin dzień.
Praciahłaść prahramy vy vybirajecie sami, ale rekamiendavany termin — ad piaci da siami dzion, paśla jakich možna kazać pra niejki bačny vynik.
Što pra heta kažuć daktary?
Taćciana Jerafiejeva, doktarka-terapieŭt miedycynskaha centra «Łade» kaža, što detoks — heta prosta modnaje słova.
«Toje, što apošnim časam nazyvajuć detoksam, nasamreč sto hadoŭ viadomaje pad nazvaj «razhruzačnyja dni». I takija dni dla arhanizma biezumoŭnyja karysnyja».
Padčas razhruzačnych dzion čałaviek admaŭlajecca ad ciažkich stravaŭ žyviolnaha pachodžańnia na karyść stravaŭ raślinnych.
«Ale padčas razhruzačnych dzion taksama treba być upeŭnienym, što vaš arhanizm vytrymaje takuju razhruzku. Tamu niepadrychtavanym ludziam lepš pačynać detoks-prahramy z 1-2 dzion. I pažadana rabić heta pad nahladam śpiecyjalista-dyjetołaha».
