Fanat «Zienita» źbiŭ dzicia ŭ Minsku. Siamja padazravanaha bje tryvohu, siamja paciarpiełaha ich padtrymlivaje. Jak tak?
Rasijanin Kirył Lachoŭski pryjechaŭ u biełaruskuju stalicu na jeŭrakubkavy matč pieciarburhskaha «Zienita» ź minskim «Dynama», jaki prachodziŭ u žniŭni. Ale pajezdka skončyłasia biadoj.
Kirył Lachoŭski
Z Sankt-Pieciarburha Lachoŭski jechaŭ na mašynie. Razam ź im byŭ jaho baćka i znajomyja mužčyny. Kiravali ŭsie pa čarzie.
Pryjechali, pahladzieli matč. «Zienit» prajhraŭ, ale hałoŭnaja trahiedyja čakała napieradzie.
11 žniŭnia rasijanie viartalisia dadomu. Pa darozie ź Minska za styrnom byŭ 22-hadovy Kirył. Ale jon nie paśpieŭ vyjechać z horada.
Kala tramvajnaha prypynku na pierakryžavańni vulic Daraševiča i Jakuba Kołasa Lachoŭski źbiŭ trochhadovaha chłopčyka.
Padrabiaznaści raspaviała «Našaj Nivie» maci chłopčyka Taćciana Navickaja.
«Moj syn pabieh pa piešachodnym pierachodzie na čyrvonaje śviatło. I jaho začapiła taja mašyna. Ja padbiehła, padchapiła małoha na ruki, jon pačaŭ mnie kazać: «Mamačka, vybačaj, što ja pabieh». Minaki vyklikali chutkuju. Nieŭzabavie źjavilisia i daišniki. Nie viedaju, chto ich vyklikaŭ. Ja ŭ DAI nie zvaniła, — uzhadvaje Taćciana. — U balnicy synu pastavili dyjahnaz: «Adkrytaja čerapna-mazhavaja traŭma, pierałom łobnaj kostki».
Niahledziačy na strašnuju farmuloŭku, na spravie ŭ kostcy była treščyna. Chłopčyk papraviŭsia, u jaho zastaŭsia nievialiki šnar. Małoha vypisali z balnicy praz try dni.
Ale takija paškodžańni kvalifikujucca jak ciažkija cialesnyja. Kiryła Lachoŭskaha zatrymali ŭ dzień DTZ. Z taho dnia jon pad vartaj, praz try dni sud paćvierdziŭ, što pakidaje chłopca za kratami. Siońnia jon u SIZA na Vaładarskaha.
Baćki chłopčyka nie majuć nijakich pretenzij da kiroŭcy. Lachoŭski byŭ absalutna ćviarozy. Ale jaho ŭsio roŭna buduć sudzić: pa zakonie sprava ab ciažkich cialesnych paškodžańniach — heta sprava publičnaha abvinačvańnia. To bok jaje nielha spynić pa žadańni ci prośbie paciarpiełaha boku.
«Ja sama vinavataja, što nie ŭtrymała dzicia i jano pabiehła na čyrvonaje śviatło, — ličyć maci chłopčyka. — Ja vielmi chaču, kab taho chłopca-kiroŭcu adpuścili. Jaho viny niama. 22 hady jamu, navošta maładomu chłopcu łamać žyćcio? Ja ŭžo pisała niekalki chadajnictvaŭ, ale biezvynikova».
Tym časam Lachoŭskaha pratrymajuć u SIZA jašče niekalki miesiacaŭ. Niadaŭna śledstva pačało novuju ekśpiertyzu paškodžańniaŭ paciarpiełaha chłopčyka. Heta praciahniecca 2 ci 3 miesiacy.
«Nam skazali, što buduć daśledavać, jak šnar budzie mianiacca z časam. I nam skazali, što budzie ciahnucca 4 miesiacy, — kaža siastra Lachoŭskaha. — Adpuskać Kiryła pad padpisku śledčyja čamuści vielmi nie chočuć».
Kali skončacca ekśpiertyzy, Kiryła Lachoŭskaha čakaje sud.
Siamja Lachoŭskaha nie viedaje, što rabić. Jany skardziacca, što nijakich dakumientaŭ pa spravie im nie dajuć. U baćki było 2 spatkańni z synam, bolš pakul nie dali.
Pa słovach siastry Kiryła, baćka kožnyja vychodnyja admysłova jeździć u Biełaruś, adpraŭlać listy synu, kab jany chutčej dachodzili.
Konsuł dapamahčy taksama ničym nie moža. Lachoŭskim adkazali ŭ konsulstvie, što nie mohuć ni na što paŭpłyvać.
Faktyčna, Lachoŭski siadzić pad vartaj navat nie tamu, što źbiŭ chłopčyka, a prosta tamu, što jon rasijanin. Jaho pakidajuć za kratami, kab nie źbieh u Rasiju.
Tak, adrazu uzhadvajecca sumna viadomy Viačasłaŭ Karniejaviec, jaki pjany zładziŭ DTZ, a paśla źbieh u Rasiju. Jon taksama mieŭ rasijskaje hramadzianstva.
Ale ž u vypadku z Karniejaŭcom nastupstvy byli bolš ciažkimi, taksist pravioŭ peŭny čas u komie. I paciarpieły nie kazaŭ — vinavaty ja sam, a nie Karniejaviec. Zdavałasia b, spravy roznyja. Ale ž z punktu hledžańnia zakona roźnica zusim nie takaja vialikaja.
Śledčy Dźmitry Šaścierykoŭ vyrašyŭ, što 22-hadovy chłopiec, jakomu nie pašancavała akazacca za styrnom, musić pravieści najbližejšyja niekalki miesiacaŭ za kratami. Pryčym śledčy moža ŭ luby momant źviarnucca ŭ prakuraturu, kab Lachoŭskamu źmianili mieru strymańnia. Ale navat paśla taho, jak paciarpiełaje dzicia vypisali z balnicy, u jakaści lekaŭ pryznačyŭšy hlicyn (!), navat paśla taho, jak baćki paciarpiełaha chłopčyka napisali 2 chadajnictvy ab nievinavataści Lachoŭskaha, navat paśla hetaha śledčy nie źmianiŭ mierkavańnia. Lachoŭski musić siadzieć u SIZA, vyrašyŭ Šaścierykoŭ. Čamu?
«Siońnia isnuje paradak, jaki vyznačany kryminalna-pracesualnym zakanadaŭstvam, u tym liku jon tyčyccca i praviadzieńnia sudmiedekśpiertyz. Kali paciarpiełaje dzicia vypisali praz paru dzion — heta dobra. Ale dla takich spraŭ i takich situacyj praviadzieńnie ekśpiertyz abaviazkovaje dla vyznačeńnia stupieni ciažkaści paškodžańniaŭ i dalejšaj kvalifikacyi dziejańniaŭ abvinavačvanaha.
Dla hramadzian inšych dziaržaŭ taksama jość paradak zabieśpiačeńnia ich jaŭki ŭ orhany kryminalnaha pieraśledu i sud. I ŭsie dziejańni ŭ hetaj spravie byli pryniatyja z ulikam zakanadaŭstva. My pradastavili prakuratury našaje bačańnie, prakuratura nas padtrymała», — raspavioŭ «Našaj Nivie» śledčy Dźmitryj Šaścierykoŭ.
Atrymlivajecca, što Lachoŭski sapraŭdy siadzić za kratami tamu, što jon rasijanin. A znachodžańnie jaho ŭ SIZA harantuje paśla jaŭku ŭ sud. Šancaŭ, što Lachoŭski vyjdzie da pasiadžeńnia, amal niama.
