Makiej u AAN: Ahulnyja kaštoŭnaści nie mohuć być sfarmavany praz prymus da demakratyi
Ministr zamiežnych spraŭ Biełarusi Uładzimir Makiej vystupiŭ na 73-j siesii Hienieralnaj Asamblei AAN.
Fota: MZS Biełarusi.
Makiej adznačyŭ, što kanfrantacyja ŭ mižnarodnych adnosinach usio čaściej prymušaje kazać pra novuju chałodnuju vajnu. Heta śviedčyć pra kryzis dypłamatyi i surjozna padryvaje aŭtarytet AAN jak hałoŭnaj mižnarodnaj arhanizacyi, zaklikanaj praduchilać mižnarodnyja kanflikty, ličyć kiraŭnik MZS.
«U mianie, jak i ŭ mnohich u hetaj zale, na žal, niama hatovaha recepta vypraŭleńnia situacyi, jakaja skłałasia. Ale my hłyboka pierakananyja: niama inšaha vybaru, akramia jak farmavać hłabalny paradak na asnovie «ahulnych kaštoŭnaściej». Pry hetym całkam vidavočna, što «ahulnyja kaštoŭnaści» nie mohuć być sfarmavanymi praz prymus da demakratyi, hvałtoŭnyja dziejańni pa padryvie lehitymnych uład», — skazaŭ Uładzimir Makiej.
Pa słovach ministra, takoj ahulnaj kaštoŭnaściu moža stać ideja stabilnaści.
«Havorka idzie, z adnaho boku, pra svabodu dziaržaŭ abirać ułasnuju formu palityčnaha praŭleńnia, svoj šlach i pryjarytety raźvićcia, ź inšaha — pra nieŭmiašańnie dziaržaŭ va ŭnutranyja spravy adzin adnaho. Na žal, hetyja pryncypy ŭ sučasnym śviecie vykonvajuć nie ŭsie. Palityka sankcyj, ekanamičnaha prymusu i palityčnaj izalacyi ŭ dačynieńni da tak zvanych «niepažadanych režymaŭ» tryvała ŭvajšła va źniešniepalityčny arsienał asobnych dziaržaŭ», — skazaŭ Makiej.