Pamierła adna z paciarpiełych ad vybuchu na «Mahiloŭdrevie»
fota z fejsbuka Julii Hančarovaj
Śledčy kamitet paviedamiŭ pra śmierć adnoj z paciarpiełych padčas vybuchu 25 vieraśnia na pradpryjemstvie «Mahiloŭdreŭ»,
«Adna z paciarpiełych padčas vybuchu na «Mahiloŭdrevie» pamierła va ŭstanovie achovy zdaroŭja. Rasśledavańnie kryminalnaj spravy praciahvajecca. Pryčyna trahiedyi vyznačajecca», — paviedamiła ŭ fejsbuku aficyjny pradstaŭnik SK Julija Hančarova.
Vybuch na «Mahiloŭdrevie» adbyŭsia ŭ minuły aŭtorak u 18.30. Zdareńnie adbyłosia ŭ farbavalnaj kamiery meblevaha cechu. Šaściora paciarpiełych, dvoje ź jakich žančyny, znachodzilisia pobač z epicentram. Ich dastavili ŭ balnicy horada, potym niekatorych pieravieźli ŭ Minsk. U paciarpiełych — vialikija apioki. Stupień paškodžańnia dasiahała 50 % płoščy cieła.
