Uładalniki pašpartoŭ, padobnych da dakumientaŭ Piatrova i Bašyrava, nazvali miescam rehistracyi štab-kvateru HRU
Rasijskaje vydańnie «Fontanka» vyśvietliła, što ŭładalniki pašpartoŭ, padobnych na dakumienty Piatrova i Bašyrava, nazvali miescam rehistracyi štab-kvateru HRU. Vydańnie znajšło ludziej, pašparty jakim vydała takoje ž padraździaleńnie fiederalnaj mihracyjnaj słužby da abo paśla Bašyrava i Piatrova.
Siamiznačny numar pašparta Bašyrava 65-j sieryi zakančvajecca na 294, Piatrova — na 297, a numar Šyrokava — na 323. Astatnija ličby supadajuć.
Nastupnym paśla Bašyrava pašpart z numaram 295 atrymaŭ hramadzianin z proźviščam Krymski. «Fontanka» znajšła jaho zhadku ŭ rejestry słužby sudovych prystavaŭ. U jakaści miesca žycharstva jon nazvaŭ Charošaŭskuju šašu, 76b u Maskvie.
Uładalnikam pašparta z numaram, vydadzienym raniej dakumienta Bašyrava, źjaŭlajecca čałaviek z proźviščam Andrejeŭ. Jak piša «Fontanka», pa hetym pašparcie mužčyna vosieńniu 2016 hoda lotaŭ u Białhrad. Vydańnie adznačyła, što ŭ toj ža čas u Čarnahoryi adbyłasia sproba dziaržaŭnaha pieravarotu. Andrejeva taksama vyjavili ŭ rejestry słužby Sudovych prystavaŭ — jon atrymaŭ štraf. Andrejeŭ taksama zarehistravany pa adrasie Charošaŭskaja šaša, 76b.
Razam z Andrejevym u Białhrad lotaŭ čałaviek pa proźviščy Paciomkin. Zhodna z Rasrejestram, pry kupli ziamielnaha ŭčastka ŭ Padmaskoŭi i aŭtamabila, jon taksama ŭkazaŭ miescam žycharstva Charošaŭskuju šašu, 76b.
Pavodle «Fantanki», adras naležyć štab-kvatery HRU.
Siarod uładalnikaŭ hetaj hrupy pašpartoŭ «Fontanka» ŭbačyła jašče niekalki čałaviek, jakija «byccam by ŭzialisia ź niadkul»: u ich niama staronak u sacyjalnych sietkach, na ich nie zarehistravanyja nieruchomaść i aŭtamabili, ale jany padarožničajuć.
Naprykład, hramadzianin Tarasaŭ lotaŭ u Stambuł 24 krasavika 2017 hoda i viarnuŭsia ŭ Maskvu 4 maja. Na hety čas pryjšoŭsia vizit Uładzimira Pucina ŭ Turcyju, pieramovy z Redžepam Erdahanam adbylisia 3-ha čysła.
Jašče adnym čałaviekam, jaki nazvaŭ adras rehistracyi Charošaŭskuju šašu, 76b staŭ, Alaksandr Palakoŭ. «Fontanka» źviazałasia ź im pa telefonie. Jon skazaŭ, što nie maje nijakaha dačynieńnia da raźviedki:
— Jak možna rastłumačyć, što z vašym pašpartam susiedničajuć dakumienty inšych asob, jakija pa-raniejšamu nazyvajuć miescam žycharstva Charošaŭskuju šašu, 76b?
— Nu ja adkul heta viedaju.
— To bok, heta vypadkovaść?
— Nie viedaju, jak heta nazvać. Prosta nie viedaju, što adkazać. Pytańnie navat troški niedarečnaje. Moža być, u fiederalnaj mihracyjnaj słužbie viedajuć, jak takoje supadzieńnie zdaryłasia.
— Dobra. Apošniaje pytańnie. Vam viadoma proźvišča «Kucharuk»?
— (paŭza) Nie.
— Sprava ŭ tym, što na jaho, jaki maje tuju ž datu naradžeńnia, što i vaša, aformleny identyčny vašamu zamiežny pašpart.
— (paŭza) Nu… Što dalej? Ja tut pry čym? Pytańni niejkija dziŭnyja. Ja narmalny hramadzianin, ničoha nie ździajśniaŭ, a vy mianie stavicie ŭ takoje stanovišča, što ja pačynaju apraŭdvacca.
