Jahor Lebiadok pra fota z Dudam: Prynižeńnie ŭ abmien na bazu apraŭdanaje, ale…
Piša Jahor Lebiadok:
Čytajcie taksama: FOTA Donalda Trampa i Andžeja Dudy vyklikała skandał u Polščy
Možna zrazumieć, što Polšča zacikaŭlena ŭ bazie ZŠA jak harancie biaśpieki, i dla hetaha hatova pajści na roznyja kroki. Ale, u ramkach miždziaržaŭnych adnosin ułasnaje prynižeńnie nikoli nie idzie na karyść u pierśpiektyvie, pryčym nie tolki i nie stolki kankretnamu palityku, kolki samomu narodu.
Hety zdymak Dudy z Trampam, vidavočna, parušaje dypłamatyčny pratakoł, i prablema nie ŭ niekampietentnaści polskich dypłamataŭ, a, chutčej za ŭsio, u asabistaj zhodzie samoha Dudy. Taki zdymak — inicyjatyva Trampa (možna ŭ internecie znajści anałahičnyja zdymki Trampa ź inšymi palitykami). U jaho psichałahičnym typie važna padkreślić svaju samaść, a pastanoŭka, kali niechta siadzić i pobač stajać, zaŭsiody nadaje «vahu» i značnaść taho, chto siadzieŭ.
Chutčej za ŭsio, Duda vyrašyŭ dahadzić Trampu i pahadziŭsia na taki zdymak, dzie jon vyhladaje, ščyra skažam, jak juny sakratar kala načalnika. Tak, mabyć, možna kazać, što ŭ palityčnym dačynieńni taki krok — nievialikaje prynižeńnie ŭ abmien na bazu jak harant biaśpieki — apraŭdany. Ale jość adzin niuans. Heta ŭ nas, dzie vybary naminalnaja, usio možna skinuć na Łukašenku i mnohija jaho ź biełaruskim narodam nie asacyjujuć, tamu ŭ nas nizkapakłonstva z boku prezidenta nijakaha efiektu dla naroda nie maje. U krainach ža, dzie vybary demakratyčnyja i prezident sapraŭdy pradstaŭlaje vialikuju častku naroda, prynižeńnie prezidenta = źniavazie naroda. I z časam heta budzie ŭspaminacca. Bolš za toje, temu prynižeńnia jakraz rasijanie ci inšyja praciŭniki Polščy mohuć vykarystoŭvać nie tolki ciapier, ale i ŭ budučyni ŭ metach destabilizacyi abstanoŭki ci jak minimum dla procidziejańnia raźmiaščeńniu amierykanskich baz.
Tamu, nie kamientary da zdymka źjaŭlajucca častkaj «rasijskaha naratyvu», a sam zdymak pieršapačatkova lažyć u im.
