«Zialon javar, dubrova»: muzyka Połaččyny ad pałačan
Połacki falkłorny hurt «Varhan» prezientuje debiutny albom z muzykaj rodnaj ziamli. U albom uvajšli pieśni i instrumientalnyja kampazicyi, jakija niekali hučali na terytoryi Połaččyny na praciahu hadavoha kalandarnaha koła. Kružełka pryznačana dla amataraŭ etničnaj muzyki i biełaruskaha falkłoru.
«Zialon javar, dubrova. Muzyka Połaččyny» — pieršy studyjny albom falkłornaha hurtu «Varhan». Jon źmiaščaje 18 trekaŭ, siarod jakich pieśni, tancy i navat «ciareški». U jakaści bonusa — zapis kupalskaj pieśni ad aŭtentyčnaj śpiavački Alimpijady Michajłaŭny Ščarbakovaj ź vioski Šastova Połackaha rajona.
U vykanańni «varhancaŭ» možna pačuć abradavyja pieśni, prymierkavanyja da znakavych hadavych śviataŭ, a taksama liryčnyja — žanočyja dy mužčynskija. Raniej pieśnia išła z čałaviekam praz usio žyćcio. Pieśniaj sustrakali pry naradžeńni, pieśnia dapamahała ŭ ciažkaj pracy i ŭ nialohkich žyćciovych abstavinach. Na kožnym śviacie hučali asobnyja pieśni, unikalnyja ŭ kožnym rehijonie i navat vioscy. Śpiavali ŭ chacie, ŭ poli, ŭ darozie.
Viaskovy śviet nie byŭ hłuchim i šerym kutkom, jak i ludzi nie byli sumnymi i zamoranymi rabaciahami. Bo nie pracaj adzinaj žyŭ čałaviek. Našyja prodki ŭmieli i lubili viesialicca. Jak dokaz — instrumientalnaja častka alboma, što pieranosić słuchača na sapraŭdnuju viaskovuju viečarynu z tancami. harmonik dy skrypka, cymbały dy bubien, duda dy kołavaja lira i, viadoma ž, varhan. Tak, sapraŭdy, na dysku možna pačuć huki hetaha staražytnaha instrumienta. I heta nie niejkija fantastyčnyja razvažańni na temu. Mała chto viedaje, ale ŭ Połacku hrali na varhanach z rańniaha siaredniaviečča. Heta paćviardžajuć archieałahičnyja znachodki. Dy i nazvu hurt abraŭ sabie nie vypadkova. Varhan dla śpievakoŭ simvalizuje svojeasablivy «partał», jaki dazvalaje vandravać u prastory i časie i pahłyblacca ŭ hukavuju stychiju minułych stahodździaŭ.
U stvareńni instrumientalnaj častki alboma brali ŭdzieł zaprošanyja muzyki — viadomy majstar, muzyka i mastak Aleś Łoś (duda, kołavaja lira), a taksama Alesia Sivochina (cymbały).
«Naša meta — stvaryć žyvy muzyčny vobraz Połaččyny, prapuściŭšy aŭtentyčny materyjał praz svajo serca, prademanstravać tuju palitru hukaŭ i emocyj, jakija niesła ŭ sabie hetaja muzyka» — kažuć udzielniki hurtu. Sprabujučy dakranucca da ŭnikalnaj muzyčnaj tradycyi Połaččyny, udzielniki hurtu «Varhan» imknucca maksimalna nablizicca da aŭtentyčnaj maniery vykanańnia i pieradać jaje žyvuju enierhietyku.
Hučańnie alboma stvaraje atmaśfieru, nabližanuju da palavoha zapisu ŭ čas śviata, viečarynki, ihryšča. Častka kampazicyj zapisvałasia ŭ Połacku (zapis, źviadzieńnie — Aleś Łoś), častka — u Minsku (zapis, źviadzieńnie, masterynh — Arciom Pietraškievič i Valeryj Bialajeŭ).
Dyzajn vokładki stvaryła Śviatłana Klepikava.
Prezientacyi alboma «Zialon javar, dubrova. Muzyka Połaččyny» adbuducca ŭ Połacku 6 kastryčnika i ŭ Minsku 14 kastryčnika.
Albom vyjšaŭ u miežach prajekta «Tradycyja», u jakoj raniej pabačyŭ śviet dysk «Mužčynskaja tradycyja śpievu» i «Viasielnyja pieśni i najhryšy vioski Lavonpal i jaje navakollaŭ»
Pasłuchać albom možna tut.
