Siamiejny kapitał: što takoje i jak atrymać
Takaja padzieja, jak naradžeńnie dzicia, tolki na pieršy pohlad zdajecca spravaj pryvatnaj i datyčnaj kanretnaj siamji. Dziaržava nie mienš za baćkoŭ zacikaŭlena ŭ naradžeńni novych hramadzian i samymi roznymi sposabami zaachvočvaje siemji da šmatdzietnaści. Adnym z takich zaachvočvańniaŭ źjaŭlajecca siamiejny kapitał — materyjalnaja dapamoha, jakaja pryznačajecca siemjam u suviazi z naradžeńniem (usynaŭleńniem/udačareńniem) treciaha albo luboha nastupnaha dzicionka ŭ pieryjad z 1 studzienia 2015 hoda da 31 śniežnia 2019 hoda. Pakolki siamiejny kapitał byŭ uviedzieny adnosna niadaŭna i terminy prahramy raźličany na abmiežavany pieryjad, to hałoŭnyja vyniki hetaha vidu dapamohi buduć bačnyja tolki ŭ doŭhaterminovaj pierśpiektyvie. Tym nie mienš razabracca z tym, što dadzienaja dapamoha saboj ujaŭlaje i jak jaje atrymać, možna ŭžo siońnia.
Što ž takoje siamiejny kapitał i jak jaho atrymać?
Siamiejny kapitał — adzin ź vidaŭ dziaržaŭnaj sacyjalnaj padtrymki šmatdzietnych siemjaŭ. Jon byŭ uviedzieny 1 studzienia 2018 hoda i pryznačajecca siemjam u suviazi z naradžeńniem (usynaŭleńniem/udačareńniem) treciaha albo luboha nastupnaha dzicionka ŭ pieryjad z 1 studzienia 2015 hoda da 31 śniežnia 2019 hoda.
Heta značyć, što pretendavać na siamiejny kapitał moža tolki taja siamja, u składzie jakoj u kankretna vyznačany pieryjad źjaviŭsia treci albo luby nastupny dzicionak. Kali ž, naprykład, siamja na momant 1 studzienia 2015 hoda ŭžo mieła traich niepaŭnahadovych dziaciej, to jana moža pretendavać na atrymańnie siamiejnaha kapitału tolki pry ŭmovie naradžeńnia nastupnaha dzicionka.
Jakija asnoŭnyja ŭmovy dla pryznačeńnia siamiejnaha kapitału?
Nieabchodnymi ŭmovami dla atrymańnia siamiejnaha kapitału źjaŭlajucca:
- naradžeńnie treciaha albo kožnaha nastupnaha dzicionka ŭ pieryjad z 1 studzienia 2015 hoda da 31 śniežnia 2019 hoda
- najaŭnaść u siamji nie mienš za 3 niepaŭnahadovych dziaciej (z ulikam dzicionka, jaki naradziŭsia paśla 1 studzienia 2015 hoda).
- biełaruskaje hramadzianstva adnaho z baćkoŭ
- pastajannaje pražyvańnie baćkoŭ i dziaciej, jakija ŭličvajucca ŭ składzie siamji, na terytoryi Biełarusi
Važna i toje, što prava na atrymańnie siamiejnaha kapitału majuć jak poŭnyja tak i niapoŭnyja siemji. U vypadku, kali baćki pražyvajuć asobna, to pry afarmleńni siamiejnaha kapitału niepaŭnahadovyja dzieci zaličvajucca da siamji taho z baćkoŭ, u kaho jany znachodziacca na vychavańni. Pry hetym kali dzieci byli ŭličany ŭ adnoj siamji, pry naznačeńni siamiejnaha kapitału ŭ inšaj jany ŭžo nie ŭličvajucca.
Pamier dapamohi i sposab vypłaty
Materyjalnaja dapamoha źjaŭlajecca adnarazovaj i składaje 10 tysiač dalaraŭ. Hetyja srodki pastupajuć na depazitny rachunak «Biełarusbanka». Ź ich da taho času, pakul dzicionku, u suviazi z naradžeńniem jakoha byŭ pryznačany siamiejny kapitał, nie spoŭnicca 18 hod, naličvajucca pracenty.
Jak aformić
Dla taho, kab realizavać prava na pryznačeńnie siamiejnaha kapitału, nieabchodna na praciahu 6 miesiacaŭ paśla naradžeńnia (usynaŭleńnia, udačareńnia) treciaha albo nastupnych dziaciej padać u miascovyja vykanaŭčyja i rasparadčyja orhany adpaviedny pakiet dakumientaŭ i ciaham miesiaca čakać vynikaŭ razhladu. Ź pieralikam dakumientaŭ i praviłami padačy možna aznajomicca tut.
Na čyjo imia zavodzicca rachunak
Kali siamja poŭnaja, to rachunak na siamiejny kapitał zavodzicca na imia maci. U vypadku, kali siamja niapoŭnaja albo maci nie źjaŭlajecca hramadziankaj Biełarusi, rachunak zavodzicca na imia baćki.
Kali možna skarystacca
Skarystacca nazapašanymi srodkami možna tolki paśla taho, jak dzicia, u suviazi z naradžeńniem jakoha byŭ pryznačany siamiejny kapitał, dasiahaje 18 hod. Daterminova skarystacca dapamohaj možna tolki ŭ vyklučnych, praduhledžanych zakanadaŭstvam, vypadkach i tolki na atrymańnie miedycynskich pasłuh.
Pry hetym dla taho, kab atrymać prava na rasparadžeńnie siamiejnym kapitałam, nieabchodna na praciahu 3-ch hod paśla taho, jak dzicionku, u suviazi z naradžeńniem jakoha byŭ pryznačany siamiejny kapitał, spoŭnicca 18 hod, źviarnucca u miascovyja vykanaŭčyja i rasparadčyja orhany z adpaviednaj zajavaj. Kali ŭ hety pieryjad zajava nie pastupić, to hrošy buduć viernuty ŭ dziaržaŭny biudžet.
Taksama jość abmiežavańni ŭ terminach, za jakija treba patracić nazapašanyja srodki. Kali na praciahu 5 hod z dnia padačy zajavy srodki nie buduć vykarystany, to jany viartajucca ŭ biudžet.
Na što moža być patračany siamiejny kapitał?
Srodki siamiejnaha kapitału mohuć być vykarystany tolki na terytoryi Biełarusi i ŭ bieznajaŭnym paradku. Pieralik metaŭ, na jakija mohuć być patračany nazapašanyja srodki, dastatkova kankretny i ŭklučaje ŭ siabie:
-atrymańnie adukacyi
-palapšeńnie žyllovych umovaŭ
-atrymańnie miedycynskich i sacyjalnych pasłuh
-farmiravańnie nazapašvalnaj piensii maci (mačachi) u poŭnaj siamji, adnaho z baćkoŭ u niapoŭnaj
Ni na jakija inšyja mety, akramia pieraličanych, patracić siamiejny kapitał nielha.
Chto maje prava na rasparadžeńnie siamiejnym kapitałam
Niahledziačy na toje, što prava na atrymańnie siamiejnaha kapitału ŭźnikaje ŭ suviazi z naradžeńniem kankretnaha dzicionka, prava na rasparadžeńnie jaho srodkami naležyć usim členam siamji.
Tamu, kali ŭ siamji pryniata rašeńnie, što rasparadžacca srodkami siamiejnaha kapitału budzie niechta adzin, to dla realizacyi hetaha rašeńnia spatrebicca nataryjalna zavieranaja zhoda ŭsich členaŭ siamji.
Kali ž zdaryłasia situacyja, što ŭ siamji nie pryjšli da zhody, to siamiejny kapitał dzielicca pamiž usimi ŭ roŭnych dolach.
Ci mohuć być vykarystany srodki siamiejnaha kapitału daterminova?
Tak, srodki siamiejnaha kapitału mohuć być vykarystany daterminova (u poŭnym abjomie albo častkova), ale tolki na akazańnie niekatorych miedycynskich pasłuh i tolki ŭ dziaržaŭnych miedycynskich ustanovach Biełarusi.
Pry hetym, kali srodki siamiejnaha kapitału byli vykarystany daterminova, to astatnim členam siamji asobnyja doli siamiejnaha kapitału nie vyłučajucca.
Dzie možna aznajomicca z narmatyŭnymi pravavymi aktami pa temie
Z formami dakumientaŭ i narmatyŭnymi pravavymi aktami, datyčnymi paradku pryznačeńnia i vydačy siamiejnaha kapitału, možna paznajomicca na aficyjnym sajcie Ministerstva pracy i sacyjalnaj abarony.
