ŚMI anansavali sychod Modryča z «Reała»
Łuka Modryč płanuje ŭ studzieni pierajści z madrydskaha «Reała» ŭ miłanski «Inter», paviedamlaje Sport Mediaset. Pavodle infarmacyi krynicy, charvacki paŭabaronca choča źmianić abstanoŭku i atrymać mahčymaść zhulać u ramkach čempijanatu Italii suprać Kryšcijanu Ranałdu, jaki letam syšoŭ z «Reała» ŭ turynski «Juvientus».
«Inter» pačaŭ rabotu nad tranśfieram Modryča adrazu paśla ČS-2018. Miłanski kłub prapanavaŭ kapitanu zbornaj Charvatyi čatyrochhadovy kantrakt z zarobkam € 11,5 młn za siezon. Mierkavałasia, što pa zakančeńni termina damovy futbalist, jakomu na toj momant spoŭnicca 37 hadoŭ, piarojdzie ŭ kitajski kłub «Cziansu Sunin» (abiedźviuma kamandami vałodaje Suning Holdings Group) i adyhraje ŭ im na tych ža ŭmovach jašče dva hady. Faktyčna «Inter» prapanoŭvaŭ Modryču amal € 70 młn za šeść hadoŭ.
Modryč vystupaje za «Reał» z 2012 hoda. Raniej jon hulaŭ za zahrebskaje «Dynama» i łondanski «Totenchem». U składzie madrydskaha kłuba chaŭbiek vyjhraŭ čatyry Lihi čempijonaŭ, try Supierkubki UEFA, try čempijanaty śvietu siarod kłubaŭ, čempijanat Ispanii, Kubak i dva Supierkubki krainy. U 261 matčy za «Reał» jon zabiŭ 13 hałoŭ.
Na čempijanacie śvietu Modryč atrymaŭ «Załaty miač» jak najlepšy hulec turniru.
