Sinoptyk: Lipień byŭ rekordny. I hlańcie, jakaja roźnica miž Žytkavičami i Mścisłavam!
Ci było leta 2018 u čymści anamalnym? Ci možna jaho nazvać zanadta haračym abo daždžlivym, i čaho čakać ad nadychodziačaj vosieni? Razam z načalnikam siektara mietadyčnaha zabieśpiačeńnia hidramietearałahičnych prahnozaŭ Biełhidramieta Natallaj Klaviec my pasprabavali praanalizavać heta leta.
«Leta 2018 było ciopłym, siarednija tempieratury byli vyšejšyja ad normy va ŭsioj krainie».
Ale, kali ŭ červieni vypała 65% apadkaŭ ad klimatyčnaj normy, to lipień kampiensavaŭ niedachop daždžoŭ ad zanadta.
U lipieni ŭ Biełarusi vypała 148,2 mm apadkaŭ, što skłała 175 % ad klimatyčnaj normy.
«Lipień 2018 zaniaŭ čaćviortaje miesca ŭ mieteanazirańniach pa kolkaści apadkaŭ. Bolš vypadała tolki ŭ 1977, 1993 i 2000 hodzie. A ŭ žniŭni samym «mokrym» akazaŭsia horad Vierchniadźvinsk, tam vypała 88 mm apadkaŭ, abo 178% ad klimatyčnaj normy. Samy «suchim» — Mścisłaŭ — tam vypała ŭsiaho 6% ad klimatyčnaj normy. U lipieni ž u Žytkavičach akazaŭsia pabity rekord pa kolkaści apadkaŭ, jaki trymaŭsia ad 1993 hoda. Za lipień tut vypała 241 mm apadkaŭ».
Ciaham leta mietearałahičnyja stancyi «zmahalisia» za zvańnie samaj daždžlivaj.
12 lipienia, MS Brest: vielmi mocny doždž, 60 mm apadkaŭ vypała za 12 hadzin.
14 lipienia, MS Žytkavičy: vielmi mocny doždž, 59 mm apadkaŭ vypała za 12 hadzin.
21 lipienia, MS Homiel: vielmi mocny doždž, 72,8 mm apadkaŭ vypała za 12 hadzin.
22 lipienia, MS Kaściukovičy: vielmi mocny doždž, 70 mm apadkaŭ vypała za 3 hadziny 40 chvilin.
25 lipienia, MS Žłobin: vielmi mocny livień, 32 mm apadkaŭ vypała za 15 chvilin.
Siaredniehadavaja tempieratura raście. Heta fakt
Što datyčycca tempieratury pavietra, to jana taksama hetym letam była na +1,2°S vyšejšaja za normu.
«Siaredniaja tempieratura lipienia skłała +19,6°S. Najmienšyja značeńni siaredniamiesiačnaj tempieratury pavietra za leta 2018 adznačalisia ŭ Viciebskaj i Mahiloŭskaj abłaściach (+17,6 + 18,7°S), najbolšyja — ŭ Bresckaj vobłaści (+ 19,2 + 20,5°S)».
Samy haračy dzień hetaha leta byŭ zafiksavany ŭ Pinsku: 14 žniŭnia słupok termomietra tam padniaŭsia da adznaki +32,6°S.
«Hetaje leta było zvyčajnym, biez asablivych anamalij. Faktam zastajecca tolki toje, što siaredniehadavaja tempieratura ad hoda padvyšajecca».
U kancy žniŭnia čakajecca źmianieńnie charaktaru nadvorja.
«Atmaśfiernyja franty i niaŭstojlivyja pavietranyja masy, jakija pastupajuć z Zachodniaj Jeŭropy, buduć vyznačać niaŭstojlivaje nadvorje. Pačatak vieraśnia, pavodle papiaredniaha prahnozu, čakajecca ź niaŭstojlivym prachałodnym i daždžlivym nadvorjem».
A voś jakoj budzie zima, u Biełhidramiecie prahnazavać nie biarucca.
«Na siońniašnim etapie niemahčyma prahnazavać nadvorje z vysokaj stupieńniu dakładnaści bolš čym na 3—5 dzion. Prahnoz na miesiac i ŭžo tym bolš na siezon moža ŭjaŭlać ź siabie tolki adchileńnie prahnastyčnych vieličyń ad siarednich šmathadovych značeńniaŭ. Naprykład, anamalija tempieratury pavietra abo kolkaść apadkaŭ. Tamu papiaredni prahnoz nadvorja na zimu budzie padrychtavany ŭ listapadzie».
