Kruty — samy małady ministr. Chto ŭznačaliŭ Minekanomiki?
Novym ministram ekanomiki staŭ Dźmitryj Kruty. Jamu ŭsiaho 37 hadoŭ. Jahony papiarednik istotna starejšy — Uładzimiru Zinoŭskamu było 63 hady.
Fota belross.tv.
Da Krutoha najmaładziejšym byŭ ministr ŽKH Alaksandr Cierachaŭ, jakomu 40 hadoŭ. Chto ž taki hety Dźmitryj Kruty?
U aficyjnaj bijahrafii paznačana, što Dźmitryj Kruty naradziŭsia ŭ Białyničach u 1981 hodzie. Ale nie treba ličyć hety horad rodnym dla čynoŭnika. Usio dziacinstva chłopca prajšło ŭ Kličavie. Tam jon chadziŭ u škołu №1.
Dźmitryj Kruty — samy vysoki. Fota ok.ru.
Sprava ŭ tym, što ŭ Kličavie pracavaŭ baćka budučaha ministra Mikałaj Kruty. Ad 1989 da 1997 hoda jon uznačalvaŭ Kličaŭski lashas. Potym Krutoha pieraviali ŭ Minsk, dzie jon uznačaliŭ Minskaje vytvorčaje lesahaspadarčaje abjadnańnie. A ŭ 1999 staŭ kiraŭnikom «Biellespapierprama». Baćka Krutoha adkazvaŭ za ŭsiu drevaapracoŭčuju halinu krainy.
Mikałaj Kruty.
Kali Mikałaja Krutoha zvolnili, to ekanamist Jarasłaŭ Ramančuk napisaŭ u svajoj kałoncy: «Zvalnieńnie Krutoha — heta biessensoŭnaja sproba navieści paradak u ramkach sistemy, jakaja nie pracuje».
Dźmitryj Kruty praciahnuŭ liniju baćki. Jon pastupiŭ i advučyŭsia na inžynierna-ekanamičnym fakultecie Technałahičnaha univiersiteta, tam ža skončyŭ aśpiranturu.
U 23 hady Dźmitryj Kruty trapiŭ u Ministerstva lasnoj haspadarki. Jon tam pracavaŭ hałoŭnym ekanamistam siektara apłaty pracy i cenaŭtvareńnia. U 2006 hodzie Kruty pierajšoŭ na pracu u Ministerstva ekanomiki, ale praciahnuŭ adkazvać za les.
Jahonaja novaja pasada hučała jak namieśnik načalnika ŭpraŭleńnia lasnoha kompleksa hałoŭnaha ŭpraŭleńnia ahrapramysłovaha i lasnoha kompleksaŭ Ministerstva ekanomiki. U hetym upraŭleńni Kruty adpracavaŭ až da 2014 hoda, kali byŭ pryznačany namieśnikam ministra ekanomiki.
Takim čynam faktyčna ŭsia karjera Dźmitryja Krutoha była nieparyŭna źviazanaja ź lasnoj haspadarkaj. Navat žonka ciapierašniaha ministra pracavała ŭ «Biełdziaržlesie». U Dźmitryja i Maryi Krutych dvoje dziaciej.
Maryja i Dźmitryj Krutyja. Fota ok.ru.
Dźmitryj Kruty — heta druhi biełaruski ministr, jaki zarehistravany ŭ fejsbuku. Chaj da aktyŭnaści ministra antymanapolnaha rehulavańnia i handlu Uładzimira Kałtoviča jamu jašče daloka. U asnoŭnym Kruty padpisany na supołki pa samastojnym vyvučeńni anhlijskaj movy, niekalki humarystyčnych pablikaŭ, a taksama na błoh Uładzimira Karahina.
Pieršaja zajava Krutoha na novaj pasadzie była ab nieabchodnaści pamienšyć zaležnaść biełaruskaj ekanomiki ad vonkavych šokaŭ. «Vahańni rasijskaha rubla ŭ apošni čas surjozna ŭpłyvajuć na makraekanamičnyja pakazčyki, my hetuju zaležnaść, naturalna, pavinny źmienšyć», — adznačyŭ ministr. Skazaŭ jon i ab patencyjnym ustupleńni Biełarusi ŭ Suśvietnuju handlovuju arhanizacyju.
