Danija budzie navučać dziaciej mihrantaŭ «dackim kaštoŭnaściam»
U Danii ŭsich dziaciej, jakija pražyvajuć u mihranckich (jak praviła, musulmanskich) hieta i dasiahnuli ŭzrostu 1 hoda, abaviažuć naviedvać zaniatki pa «dackich kaštoŭnaściach».
fota pixabay.com
Jak tolki dziciaci z hieta (termin aficyjna vykarystoŭvajecca dackimi ŭładami) spaŭniajecca 1 hod, jano budzie abaviazana naviedvać takija zaniatki minimum 25 hadzin na tydzień. U pieršuju čarhu na ŭrokach «dackich kaštoŭnaściej» dzieci buduć vyvučać movu i kulturu krainy, u tym liku chryścijanskija śviaty, takija jak Kalady i Vialikdzień. Kali baćki-mihranty admoviacca adpraŭlać dziaciej na takija zaniatki, ich mohuć pazbavić usich sacyjalnych vypłat.
Hetaje rašeńnie dackaha ŭrada — nie prosta adzinkavaja miera, nakiravanaja na chutkuju intehracyju mihrantaŭ, a častka šyrokaj inicyjatyvy, meta jakoj — likvidacyja ŭsich mihranckich hieta ŭ krainie da 2030 hoda.
U ramkach hetaj inicyjatyvy ŭrad taksama sprabuje źniščyć hieta pry dapamozie ekanamičnych stymułaŭ. Naprykład, etničnych datčan buduć stymulavać pierasialacca ŭ rajony byłych hieta, a mihrantaŭ z hieta buduć raśsialać u rajony sa značnym daminavańniem karennaha nasielnictva. Taksama niadaŭna ŭrad zabaraniŭ žančynam nasić burki i inšuju vopratku, jakaja zasłaniaje tvar. Za parušeńnie — štraf da $1600. Niekatoryja najbolš radykalnyja deputaty prapanoŭvali pajści jašče dalej: aŭtamatyčna padvojvać pakarańni za ździejśnienyja ŭ hieta złačynstvy, a taksama čaplać na dziaciej z hieta śpiecyjalnyja branzalety, adnak hetyja prapanovy pakul nie byli pryniatyja.
Hieta — nie prosta abstraktnaja nazva, a vyznačany ŭ dackim zakanadaŭstvie termin, jaki pavinien adpaviadać jak minimum dvum z hetych troch kryteraŭ:
- jak minimum 50% nasielnictva — mihranty ź niezachodnich krain;
- jak minimum 40% nasielnictva — biespracoŭnyja;
- jak minimum 2,7% nasielnictva ździajśniali kryminalnyja złačynstvy.
Usiaho ŭ takich hieta žyvie kala 60 tysiač čałaviek — pad 1% nasielnictva Danii. U pieršuju čarhu heta vychadcy z Turcyi, Siryi, Iraka, Livana, Pakistana i Samali.
Pazicyja ciapierašnich uład nakont budučyni hieta vyraznaja. Premjer-ministr Danii Łars Lokie Rasmusen skazaŭ:
«Hieta pavinny źniknuć… Nam treba kardynalna źmianić mietad vyrašeńnia hetych prablem».
Cikava, što takija žorstkija zakony ŭ Danii byli pryniatyja pry supracoŭnictvie libierałaŭ i nacyjanalistaŭ. Libieralnaja partyja Danii, jakaja ŭznačalvaje kiroŭnuju kaalicyju, vyznaje kansiervatyŭny libieralizm, i ŭ adroźnieńnie ad sacyjał-libierałaŭ, vystupaje za bolš strohi kantrol nielehalnaj mihracyi i skieptyčna stavicca da multykulturalizmu.
Padtrymała zakony i kansiervatyŭnaja nacyjanalistyčnaja Narodnaja partyja Danii, jakaja na apošnich parłamienckich vybarach damahłasia vialikich pośpiechaŭ i nabrała 21,1% hałasoŭ vybarščykaŭ.
