«Dynama» haniebna vylecieła ź Lihi Jeŭropy, prajhraŭšy «Zienitu» 1:8 VIDEA
Siońnia ŭ Pieciarburhu adbyŭsia matč u adkaz treciaha kvalifikacyjnaha raŭnda Lihi Jeŭropy pamiž miascovym «Zienitam» i minskim «Dynama».
Fota: Zienit.
Pieršy matč u Minsku 9 žniŭnia zaviaršyŭsia ŭpeŭnienaj pieramohaj «Dynama» — 4:0, i minčanam dla vychadu ŭ płej-of dastatkova było nie prajhrać z razhromnym likam. Fanaty «Zienita» nie zmahli trapić na arenu praz sankcyi UEFA, nakładzienyja na haspadaroŭ pola.
Rasijskaja kamanda padčas usioj hulni prykmietna čaściej vałodała miačom.
Na 22-j chvilinie Raman Biahunoŭ parušyŭ praviły ŭ svajoj štrafnoj. «Standart» dakładnym udaram realizavaŭ paŭabaronca haspadaroŭ Leandra Paredas.
Na 65 chvilinie fantastyčny ŭdar zrabiŭ Naboa z 25 mietraŭ. Minčanie znoŭ prapuścili sa štrafnoha — 2:0.
A zatym dubl zrabiŭ Dziuba na 75 i 79 chvilinach — 4:0.
U apošnija 20 chvilin asnoŭnaha času ŭ «Zienita» było niekalki surjoznych momantaŭ, i minčanie ź ciažkaściu adsunuli hulniu ad svaich varot.
Asnoŭny čas matču skončyŭsia ź likam 4:0, i kamandam pryjšłosia hulać dadatkovy čas.
Na 99 chvilinie adbyŭsia zakid u štrafnuju na Korzuna, jaki vyjhraŭ adzinaborstva ŭ Aniukova, prabiŭ pa varotach, adnak Łunioŭ adbiŭ. A voś dynamaviec Siejdu Jachaja dabiŭ miač u pusty kut — lik staŭ 4:1, što zadavalniała minčan.
Adnak kancoŭka hulni vydałasia niervovaj. Na 109 chvilinie zienitaviec Dziuba lohka syšoŭ ad Šytava i prabiŭ u stvor. Harbunoŭ adbiŭ na nahu Dryusi, jaki zrabiŭ lik 5:1.
Na 115 chvilinie dynamaviec Biahunoŭ sfaliŭ u štrafnoj, arbitr pakazaŭ na «kropku», i «Zienit» skarystaŭsia svaim šancam — Dziuba zrabiŭ lik 6:1.
Na apošnich chvilinach «Zienit» zarabiŭ jašče adno pienalci, i Robiert Mak zrabiŭ lik 7:1.
I adrazu ž paśla hetaha Robiert Mak aformiŭ dubl, i zrabiŭ lik 8:1.
Rasijanie iduć dalej, a «Dynama» haniebna vylataje z turniru.